كەشە قازاقستاندىق ترياتلونشى ەكاتەرينا شابالينا ءۇشسايىستىڭ ەكىنشى كەزەڭىندە-اق جارىستان شىعىپ قالدى. سەبەپ – دەنساۋلىعىنىڭ كۇرت سىر بەرۋى.

سپورتشىنىڭ ايتۋىنشا، سۋدا ءجۇزىپ كەلە جاتقاندا جانىنداعى قارسىلاستارىنىڭ ءبىرى ونى باسىنان بىرنەشە رەت ۇرىپ جىبەرگەن. سوققى العان ە.شابالينا ابايسىزدا سۋ جۇتىپ، تۇنشىعىپ قالا جازداعان.

– وكىنىشكە قاراي، ءجۇزۋ بارىسىنداعى مۇنداي قاراۋلىقتاردى، سۋ بەتىندەگى، سۋ استىنداعى «توبەلەستەردى» تورەشىلەر بايقاي قويمايدى. سۋ جۇتىپ قويعان سوڭ، كوپ ۇزاماي جۇرەگىم ايني باستادى. بالكىم، سەنا وزەنىنىڭ لاستىعى تۋرالى تالاي اقپارات وقىعانىمنىڭ دا اسەرى بولعان شىعار، ايتەۋىر قالعان قاشىقتىقتى قالىپتى ءجۇزىپ وتكەنىممەن، ءجيى-ءجيى لوقسىپ، مازام كەتتى. ءۇشسايىستىڭ ءجۇزۋ كەزەڭىنەن كەيىنگى ۆەلوجارىس بارىسىندا ءارى قاراي شىداۋ مۇمكىن بولمادى – جول جيەگىنە توقتاپ، ابدەن قۇسۋىما تۋرا كەلدى. السىرەپ تە كەتتىم. امال جوق، جارىستان شىعۋا ءماجبۇر بولدىم، – دەيدى ەكاتەرينا.

دارىگەرلەر سپورتشىعا قاجەتتى ءدارى-دارمەك بەرگەن. شابالينانىڭ احۋالى قازىر جاقسى.

سۋرەت: Abai.kz سكرينى

سەنا وزەنىندەگى سۋ ساپاسىنىڭ سىن كوتەرمەس جاعدايى تۋرالى ءبىز 30 شىلدە كۇنى جازعان بولاتىنبىز (قاراڭىز: «سەنگەن سەنام سەن بولساڭ...»).

شۆەد ترياتلونشىسى تيلدا مونسسون دا وزەن سۋىنان ءبىرتۇرلى ءيىس شىعاتىنىن، سۋدىڭ ءتىپتى دە ءمولدىر ەمەس، قوڭىرقاي ءتۇسى بار ەكەنىن ايتادى. «اۋىرىپ قالماسام بولار ەدى قورقىپ وتىرمىن» دەپتى ول ءوز ەلىنىڭ Expressen باسىلىمىنا بەرگەن سۇحباتىندا.

* * *

برازيليانىڭ داڭقتى فۋتبولشىسى ءارى باپكەرى زيكونى پاريجدە توناپ كەتىپتى. شىعىن كولەمى – جارتى ميلليون دوللار!

«فۋتبولدان برازيليا كومانداسى وليمپياداعا قاتىسىپ جاتقان جوق قوي، زيكو پاريجدە نەعىپ ءجۇر؟» دەگەن سۇراق تۋى مۇمكىن. راس، بۇل ەلدىڭ فۋتبول قۇراماسى ىرىكتەۋ سىنىنان وتە الماي، وليمپيالىق ويىندارعا كەلگەن جوق. ال زيكوعا «برازيليا سپورتىنىڭ وسى وليمپياداداعى ەلشىسى بولىڭىز» دەپ ءوز ەلىنىڭ وليمپيالىق كوميتەتى قولقا سالىپ، ارنايى شاقىرتۋمەن ەرتىپ كەلگەن ەكەن.

بىلتىر 70 جاسقا تولعان داڭقتى فۋتبولشى مەيمانحانادا وتىرىپ، تاكسي شاقىرعان. ول كەلگەن سوڭ، قولىنداعى شابادانىن تاكسيست ەكەۋى جۇكسالعىشقا سالىپ، كولىككە وتىرا بەرگەندە، الدەبىرەۋ كەلىپ، جۇرگىزۋشىگە الدەنە دەپ ايعايلاپ، ۇرىسا باستاعان. سويتسە، بۇل ادەيى نازار اۋدارتىپ، بۇلاردىڭ ارت جاققا مۇلدە قاراماۋى ءۇشىن جاسالعان ايلا-شارعى ەكەن. تاكسيست الگىمەن اۋرە بوپ، ونىڭ نە ءۇشىن ايعايلاپ جاتقانىن تۇسىنبەي، اۋزى اشىلىپ تۇرعاندا، ال زيكو ولاردىڭ داۋى نەمەن بىتەرىن كۇتىپ، ارتقى ورىندىقتا اڭ-تاڭ بولىپ وتىرعاندا، ۇرىنىڭ سەرىگى جۇكسالعىشتى بايقاتپاي اشا قويىپ، شاباداندى الىپ كەتىپتى.

شابادان ىشىندە اسا قىمبات «رولەكس» ساعاتى، التىن القا، وتە جوعارى باعالاناتىن بريلليانت بۇيىمدار، سوسىن ەداۋىر كولەمدەگى قولما-قول اقشا بولعان. شىعىننىڭ جالپى قۇنى 540 مىڭ دوللار دەسەدى.

زيكونىڭ كۇللى الەمنەن مىڭ-ميلليون ادام جينالاتىن وليمپيادا ورتالىعىندا مۇنشا بايلىقتى نەگە وزىمەن بىرگە الىپ جۇرگەنى تۇسىنىكسىز...

بۇل – وليمپيادا قوناقتارىنىڭ ءبىرىنشى رەت تونالۋى ەمەس. سپورت مەرەكەسىنىڭ العاشقى كۇندەرى ۇرىلار ارگەنتينا فۋتبول قۇراماسىنىڭ ويىنشىسى تياگو المادانىڭ دا كوڭىل كۇيىن بۇزعان بولاتىن. فۋتبولشى كوماندالاستارىمەن بىرگە جاتتىعىپ جاتقاندا، ونىڭ سومكەسىندەگى جالپى قۇنى 50 مىڭ دوللاردان اساتىن التىن ساعاتى مەن جۇزىگى، اقشاسى قولدى بولعان.

* * *

وليمپياداداعى فۋتبول ءتۋرنيرىنىڭ توپتىق كەزەڭى اياقتالدى. ەرتەڭ، ياعني 2 تامىزدا شيرەك فينالدا ماروككو – اقش، جاپونيا – يسپانيا، ەگيپەت – پاراگۆاي، فرانتسيا – ارگەنتينا كوماندالارى كەزدەسەدى.

* * *

ونسىز دا الەمدىك شوۋ-بيزنەس ورتالىعى سانالاتىن فرانتسيا استاناسى وليمپيادا جارىستارىن تاماشالاۋعا، ءوز وتانداستارىن نەمەسە دوستارىن قولداپ-قۋاتتاۋعا كوپتەگەن جۇلدىزدار دا كەلگەن.

ماسەلەن، فوتوگرافتار ايگىلى گولليۆۋد اكتەرى توم كرۋزدىڭ سپورت گيمناستيكاسى جارىستارىندا جانكۇيەرلىك ەتىپ وتىرعانىن ءتۇسىرىپ العان. دۇنيەجۇزىندەگى ەڭ جۇلدەسى كوپ وليمپياشى، ءجۇزۋ سپورتىنان اۆسترالياعا جالعىز ءوزى 23 مەدال الىپ بەرگەن مايكل فەلپس ەندى سايىستاردى كورەرمەن رەتىندە ءوزى تاماشالاپ قانا قويماي، كىشكەنتاي بالاسىنا دا كورسەتىپ ءجۇر. كينواكتريسا نيكول كيدماننىڭ دا قىزىمەن بىرگە سپورت گيمناستيكاسى جارىستارىن تاماشالاپ وتىرعانىن تەلەديداردان كوردىك.

سۋرەت: داريا يساەۆا

اتاقتى يتاليان ءانشىسى ال بانو دزيۋدو باسەكەلەرىنە جانكۇيەر ەكەن. ءوزى دە ءتورت دۇركىن وليمپيادا چەمپيونى بولعان امەريكالىق تەننيسشى سەرەنا ۋيليامس پاريج وليمپياداسىنىڭ اشىلۋ سالتاناتىندا الاۋ ۇستاۋىمەن شەكتەلمەي، كورەرمەن رەتىندە دە جارىس زالدارىنان كورىنىپ ءجۇر. تاعى ءبىر تەننيس فاناتى – الەمدەگى ەڭ داۋلەتتى ادامنىڭ ءبىرى بيلل گەيتس تە قازىر پاريج تورىندە...

سپورت مەرەكەسى ناعىز قىزىق كەزەڭىنە ەندى اياق باستى.

ساكەن سىبانباي

Abai.kz