قر سىرتقى ىستەر ءمينيسترىنىڭ ورىنباسارى الىبەك باقاەۆ مىرزانىڭ نازارىنا!

ۇكىمەت باسقارىپ تۇرعان كەزىندە اسقار ءمامين دە، ءاليحان سمايىلوۆ تا پرەزيدەنتىمىز قاسىم-جومارت توقاەۆتىڭ كوشى-قون ساياساتى بويىنشا بەرگەن تاپسىرمالارى مەن نۇقاۋلارىن ءوز دەڭگەيىندە ورىنداعان جوق. ءوز دەڭگەيىندە ورىنداۋ بىلاي تۇرسىن، كەرى كەتىردى!

بيىلعى 20 اقپاندا سەناتتا وتكەن ۇكىمەت ساعاتىندا سەنات توراعاسى ماۋلەن اشىمباەۆ: «وڭتۇستىكتەن سولتۇستىككە ەرىكتى تۇردە قونىس اۋدارۋ باعدارلاماسى ءبىز كۇتكەن ناتيجە بەرمەگەنىن مويىنداۋىمىز كەرەك!», - دەدى.

مەن ماۋلەن ساعاتحانۇلىنىڭ بۇل ءسوزىن قازاقستان رەسپۋبليكاسى ۇكىمەتىنىڭ 2022 جىلعى 30 جەلتوقساندا بەكىتكەن «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسىنا» دا، ودان بۇرىنعى باعدارلامالارعا بەرىلگەن ەڭ ءادىل باعا دەپ ەسەپتەيمىن!

* سەنات دەمەكشى، 2023 جىلى 19 ساۋىردە سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى ماقۇلداعان «حالىقتىڭ كوشى-قونى تۋرالى» زاڭنىڭ 20-بابىنىڭ 5) تارماعى ۇكىمەت ايقىنداعان سەگىز وبلىستان باسقا توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتاردىڭ «قانداس» مارتەبەسىن الۋىن شەكتەپ تاستادى;

* بۇرىن حالىققا قىزمەت كورسەتۋ وتالىعىنان بەس جۇمىس كۇنى ىشىندە وپ-وڭاي بەرىلىپ كەلگەن «قانداس» مارتەبەسى ەندى «قۇتتى مەكەن» ءموبيلدى قوسىمشاسى ارقىلى وتىز بەس جۇمىس كۇنىندە بەرىلەتىن بولىپ، قيىنداتىلدى;

* تامارا دۇيسەنوۆا قازاقستان رەسپۋبليكاسى پرەمەر-ءمينيسترىنىڭ ورىنباسارى ءارى قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى بولىپ تۇرعان كەزىندە زاڭعا ەنگىزىلگەن «اتا جولى» كارتاسىنا بايلانىستى، «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى زاڭمەن بەكىتىلمەگەن بولىپ شىقتى;

قىتايدا تۇراتىن قازاقتار تاعى دا ساياسي قىسىمعا ۇشىراپ، ونداعى قازاق زيالىلارى توپ-توبىمەن قاماققا الىنا باستادى...

بۇل ماسەلەلدەر باق-تا تولاسسىز كوتەرىلىپ كەلەدى. پرەزيدەنتكە، پارلامەنتكە، ۇكىمەتكە، مينيسترلىكتەرگە جازىلعان حاتتاردا ەسەپ جوق.

قىسقاسى، الدىڭعى ەكى ۇكىمەت قاسىم-جومارت توقاەۆتىڭ «قاسيەتتى پارىزىن» قاسىرەتكە اينالدىرىپ جىبەرۋگە تىرىسىپ باقتى!

سۋرەت تۋيتتەر سكرينى

ءوز باسىم كوشى-قون ساياساتى وسى شۋلى كۇيىندە قالا بەرەدى دەپ ويلامايمىن.

ەرتە مە، كەش پە، ولجاس بەكتەنوۆ باسقاراتىن ۇكىمەت بۇل سالانى قايتا قولعا الىپ، كوشى-قون ءۇردىسىن رەتتەۋگە ارنالعان زاڭداردى قايتا قارايدى دەپ سەنەمىن.

سوندىقتان، الداعى جەردە قاتىستى زاڭدار پارلامەنتتە قايتا قارالىپ جاتسا، بۇل سالاداعى كەمشىلىكتەردى تۇزەتۋ ءۇشىن ۇسىنىستار بەرۋىمىز كەرەك قوي.

ول ءۇشىن وسى سالاعا جاۋاپتى مينيسترلىك وكىلدەرىمەن كەزدەسىپ، تۇيتكىلدى تۇيىندەردى ولاردىڭ نازارىنا سالۋىمىزعا تۋرا كەلەدى.

وسى ماقساتپەن، قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى الىبەك اسەتۇلى باقاەۆ مىرزاعا حات جازىپ، قابىلداۋىن سۇراعان ەدىك.

14 تامىزدا الىبەك باقاەۆ ەمەس، ونىڭ ورنىنا ءسىم كونسۋلدىق قىزمەت دەپارتامەنتىنىڭ ديرەكتورى اقاتاەۆ باۋىرجان رىمقانۇلى قابىلدادى.

ايتار جوق، باۋىرجان رىمقانۇلى وتە جىلى قابىلدادى. قاسىندا كونسۋلدىق قىزمەت دەپارتامەنتىنىڭ ءبىرىنشى حاتشىسى باۋىرجان ساپارباەۆ باستاعان تاعى ءۇش قىزمەتكەر بولدى. ەركىن وتىرىپ، ءبىر ساعاتتان ارتىق ۋاقىت اشىق اڭگىمەلەستىك.

كونسۋلدىق قىزمەت دەپارتامەنتىنىڭ ديرەكتورىمەن اڭگىمەنى سۇراۋ قويۋدان باستادىق.

سۋرەت اۋىت مۇقيبەكتىڭ جەكە مۇراعاتىنان الىندى.

اۋىت مۇقيبەك:

– قۇرمەتتى باۋىرجان رىمقانۇلى، جاقىندا استانادا شىۇ-نىڭ كەزەكتى ءسامميتى ءوتتى. وسى سامميت قارساڭىندا، قازاقستانعا قحر توراعاسى سي تسزينپين مەملەكەتتىك ساپارمەن كەلدى. قىتاي مەن قازاقستان اراسىندا وتىزعا جۋىق قۇجاتقا قول قويىلدى. ايتىڭىزشى، وسى قىتاي مەن قازاقستان اراسىنداعى جوعارى دارەجەدەگى كەلىسىمدەر بارىسىندا، سىزدەر جاعىنان قىتايداعى ەتنيكالىق قازاقتاردىڭ تاعدىرىنا قاتىستى ماسەلە كەتەرىلدى مە؟!

باۋىرجان رىمقانۇلى:

– مەن ول كەلىسىمدەرگە قاتىناسقان جوقپىن، بىلمەيمىن!

اۋىت مۇقيبەك:

– وندا مەن بۇل سۇراقتى قۇبىلتىپ، باسقا قىرىنان قويايىن سىزگە. ءوزىڭىز جاقسى بىلەسىز، 2017 جىلدان بەرى قىتايداعى ەتنيكالىق قازاقتار ساياسي قىسىمعا ۇشىراپ كەلەدى. بۇل جونىندە سىزدەر تولىق حاباردارسىزدار. شىۇ-نىڭ ءسامميتى قارساڭدا ماناعى وتىزعا جۋىق كەلىسىمنىڭ جوباسى كەمىندە جارتى جىل تالقىلانعان بولۋى كەرەك... ەندەشە، وسى كەلىسىميدەردىڭ جوباسى دايىندالىپ جاتقان كەزدە، ءسىم كونسۋلدىق قىزمەت دەپارتامەنتىنىڭ ديرەكتورى رەتىندە، قىتايداعى ەتنيكالىق قازاقتاردىڭ تاعدىرىنا قاتىستى ءسىز ءوز تاراپىڭىزدان قانداي ۇسىنىستار بەردىڭىز؟! 

باۋىرجان رىمقانۇلى:

– مەملەكەتتىك ساياساتتى پرەزيدەنت جۇرگىزەدى. ءبىز پرەزيدەنتتىڭ ساياساتىن ورىندايمىز!

اۋىت مۇقيبەك:

– قۇرمەتتى باۋىرجان رىمقانۇلى، دۇرىس قوي، مەملەكەتتىك ساياساتتى پرەزيدەنت جۇرگىزەدى. ءبىرىنشى، پرەزيدەنتتىڭ ءوزىنىڭ ساياساتى بار. ەكىنشى، پرەزيدەنت سىزدەر ارقىلى اقپاراتتار الادى دا، سول اقپاراتتاردىڭ نەگىزىندە ءوز ساياساتىن بەلگىلەيدى. وسىلايشا، مەملەكەتتىك ساياسات قالىپتاسادى...

باۋىرجان رىمقانۇلى:

– ...

سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى باۋىرجان اقاتاەۆ مىرزامەن بولعان اڭگىمەمىز وسىلاي باستالدى.

كورىپ وتىرسىزدار، شىۇ-نىڭ ءسامميتى قارساڭدا جاسالعان كەلىسىمدەر اياسىندا قازاقستان تاراپىنان قىتايداعى ەتنيكالىق قازاقتاردىڭ تاعدىرىنا قاتىستى ماسەلە مۇلدە كوتەرىلمەگەن. ۇمىت قالعان. ەشكىم ەلەمەگەن...

ەگەر، «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭنىڭ 8-بابىنداعى «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ۇلتتىق-مادەني، رۋحاني جانە تiلدiك قاجەتتەرىن قاناعاتتاندىرۋعا قامقورلىق جاسايدى، ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى»، - دەگەن نورمانى نەگىز ەتە وتىرىپ، ەكى ەل اراسىنداعى كەلىسىمدەردىڭ جوباسى جاسالىپ جاتقان كەزدە سىرتقى ىستەر مينيسترلىگى تاراپىنان پرەزيدەنتكە قىتايداعى ەتنيكالىق قازاقتاردىڭ تاعدىرىنا قاتىستى ۇسىنىس بەرىلگەندە، «قاي مەملەكەتتى مەكەن ەتسە دە، قازاقتىڭ ءبىر عانا تاريحي وتانى بار، ول – قازاقستان. سوندىقتان ءبىز شەتەلدە تۇراتىن باۋىرلارىمىزدى قولداۋعا قاشاندا باسا ءمان بەرەمىز...»، - دەگەن ءسوزدى قاسىم-جومارت كەمەلۇلى ول ۇسىنىستى ەشقاشان شەتكە قاقپايتىن ەدى!

ءبىز بىلەتىن توقاەۆ سوناۋ سىرتقى ىستەر ءمينيسترى بولىپ تۇرعان كەزىنەن بەرى شەكارا سىرتىندا قالعان قانداستارىنا ءوزىنىڭ قامقورلىعىن اياماي جاساپ كەلە جاتقان تۇلعا.

قاسەكەڭنىڭ قانداستارىنا جاساعان ءوزىم بىلەتىن قامقورلىقتارىن مەن سىزدەرگە شەتىنەن ءتىزىپ ايتىپ بەرەيىن.

مىسالى، «قر سالىق كودەكسiنىڭ» 628-بابىنا ساي، قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار كونسۋلدىق الىم تولەۋدەن بوساتىلعان.

بۇل نورمانىڭ قاسىم-جومارت كەمەلۇلى قازاقستان رەسپۋبليكاسىنىڭ سىرتقى ىستەر ءمينيسترى بولىپ تۇرعان كەزدە ەنگىزىلگەنىن ءبىز وتە جاقسى بىلەمىز.

بۇل تۋرالى اقىن الماس احمەتبەكۇلى «ەگەمەن قازاقستان» گازەتىنە بەرگەن «كوك تۋ – ازاتتىق رۋحى» اتتى سۇحباتىندا: «2004 جىلى شەتەلدە تۇراتىن ۇلتى قازاق ادامدارعا قازاقستانعا كەلۋ ءۇشىن رەسىمدەلەتىن ۆيزا تەگىن بەرىلسىن (كونسۋلدىق الىمداردان بوساتىلسىن) دەگەن قاۋلى شىقتى. قاۋلىعا قول قويعان سول كەزدەگى سىرتقى ىستەر ءمينيسترى قاسىم-جومارت توقاەۆ ەدى. ال وعان حاتپەن ۇسىنىس جاساعان ءبىز ەدىك...», - دەپ ەسكە الادى.

قاسەكەڭنىڭ قانداستار ءۇشىن جاساعان تاعى ءۇش قامقورلىعىن ايتايىن.

بۇرىن قازاقستان رەسپۋبليكاسىنىڭ حالىقتىڭ كوشى-قونى، سالىق سالۋ جانە ەڭبەك زاڭناماسى سالاسىنداعى قۇقىق بۇزۋشىلىق ءۇشىن اكىمشىلىك جاۋاپتىلىققا تارتىلعان جاعدايدا، قانداستارىمىز بەن ەتنيكالىق قازاقتاردى دا بەس جىلسىز قازاقستانعا ورالا المايتىن ەتىلىپ، كەلگەن ەلىنە شىعارىپ جىبەرەتىن.

سونداي-اق، قازاقستان رەسپۋبليكاسىنىڭ اۋماعىندا تۇراقتى تۇرۋعا رۇقسات العان جانە تۇراقتى تۇرۋعا رۇقسات بەرىلگەن كۇننەن باستاپ رەتىمەن كەلەتىن كەز كەلگەن ون ەكى ايلىق كەزەڭ شەگىندە كۇنتىزبەلىك ءبىر ءجۇز سەكسەن ءۇش كۇننەن اتىق شەتەلدە تۇرعان ەتنيكالىق قازاقتار مەن ولاردىڭ وتباسى مۇشەلەرىنىڭ  «ىقتيارحاتىنىڭ» كۇشى جويىلاتىن...

2019 جىلى پرەزيدەنتتىڭ قابىلداۋىنا كىرگەن كەزىمدە وسى ماسەلەنى دە كوتەردىم.

قاسىم-جومارت كەمەلۇلىنىڭ تىكەلەي تاپسىرماسىمەن «حالىقتىڭ كوشى-قونى تۋرالى» زاڭىنىڭ 49-بابىنىڭ 17) تارماعىنا «وسى باپتىڭ ءبىرىنشى بولىگىنىڭ 13 جانە 14-1) تارماقشالارىنىڭ كۇشى قولدانىلمايدى» دەگەن نورما ەنگىزىلىپ، شەتتەن ورالعان ۇلتى قازاق ازاماتتار اتالعان ەكى اۋىر جازادان قۇتىلدى.

سول قابىلداۋدا قاسىم-جومارت كەمەلۇلىنا تاعى 18 قاراشانى «ۇلتتىق كوشى-قون كۇنى» دەگەن اتپەن اتاۋلى كۇندەردىڭ تىزبەسىنە ەنگىزۋ تۋرالى ۇسىنىس جاسادىم.

قاسەكەڭ بۇل ۇسىنىسىمدى دا جەرگە تاستاعان جوق. ۇلتتىق قوعامدىق سەنىم كەڭەسىنىڭ VI وتىرىسىندا وسى ماسەلەگە ەرەكشە توقتالىپ، «ۇلى كوش 1991 جىلى باستالدى. بۇعان ەلباسىنىڭ تاپسىرماسىمەن قازاق كسر مينيسترلەر كابينەتى قابىلداعان №711 قاۋلى رەسمي تۇردە جول اشتى. بۇل قۇجات 1991 جىلعى 18 قاراشادا قابىلداندى. كوپ ۇزاماي ەلباسى «الىستا جۇرگەن اعايىنعا اق تىلەك» اتتى جولداۋىن جاريالاپ، شەتتەگى قانداستارىمىزدى ەلگە شاقىردى. سونىڭ ناتيجەسىندە ءبىر جارىم ميلليوننان استام قازاق وتانىنا ورالدى. بۇگىندە ولار ەگەمەن ەلىمىزدى وركەندەتۋگە ءوز ۇلەسىن قوسۋدا. سولاردىڭ ىشىندە اۋىت مۇقيبەك جانە تاعى باسقا قوعام قايراتكەرلەرى ۇلى كوشتىڭ تاريحي ءرولىن ەسكەرىپ، ارنايى كۇن بەلگىلەۋ قاجەتتىگىن ايتىپ ءجۇر. ۇكىمەتكە وسى تاريحي داتانى اتاۋلى كۇندەر تىزبەسىنە قوسۋ ماسەلەسىن جان-جاقتى قاراستىرىپ، ءتيىستى ۇسىنىس ەنگىزۋدى تاپسىرامىن», - دەدى.

وكىنىشكە وراي، ءاليحان سمايلوۆ پرەزيدەنتتىڭ بۇل تاپسىرماسىن ورىنداعان جوق!..

مۇنىڭ ءبارى جاي ءسوز ەمەس، قاسەكەڭنىڭ قيىرداعى جانە اتاجۇرتىنا ورالعان باۋىرلارىنا تىكەلەي ءوز قولىمەن جاساعان جاقسىلىقتارى مەن قامقورلىقتارى.

ءبىز قاسىم-جومارت اعانىڭ بۇل جاقسىلىقتارى مەن قامقورلىقتارىن ەشقاشان ۇمىتقان ەمەسپىز جانە ايتۋ مەن جازۋدان جالىعىپ كورگەن جوقپىز!

دەمەك، مينيسترلىكتەر جاعىنان پرەزيدەنتكە كوشى-قون ساياساتىنا، قانداستارعا قاتىستى دۇرىس اقپارات جەتپەيدى جانە ءتيىمدى ۇسىنىستار جاسالمايدى.

ەگەر، جەتسە، جاسالسا، ءبىز بىلەتىن توقاەۆ ول اقپاراتتار مەن ءتيىمدى ۇسىنىستارعا ەشقاشان بەيجاي قارامايدى. وڭتايلى شەشۋ، جۇزەگە اسىرۋ تۋرالى بىردەن تاپسىرما بەرەدى.

رەتى كەلىپ تۇرعاندا ايتا كەتەيىن، اقوردادا قازاقستان رەسپۋبليكاسى پرەزيدەنتىنىڭ كەڭەسشىسى – پرەزيدەنتتىڭ ءباسپاسوز حاتشىسى بەرىك ءۋالي مىرزانىڭ قابىلداۋىندا بولىپ، اتى شۋلى 20-باپتىڭ 5) تارماعىن الىپ تاستاۋ تۋرالى ۇسىنىسىمدى قولىنا بەرىپ، وعان «قۇرمەتتى اۋىت مۇقيبەك! ءسىزدىڭ حاتىڭىزدا كوتەرىلگەن ماسەلەلەر ۇسىنىس رەتىندە ەنگىزىلەتىنىن حابارلايمىز» دەگەن جاۋاپ العانىما، مىنە، توعىز ايدىڭ ءجۇزى بولدى.

شاماسى، سول بەرىك ءۋالي مىرزانىڭ ءوز قولىنا ۇستاتقان حاتىم قاسىم-جومارت كەمەلۇلىنا جەتكەن جوق!

جەتسە، باياعىدا شەشىم تابار ەدى...

اۋەلگى سوزىمىزگە ورالايىق.

ءسويتىپ، سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى باۋىرجان اقاتاەۆ مىرزامەن بولعان كەزدەسۋىمىزدە وسى اڭگىمەنىڭ ءبارى ايتىلدى.

ءتىپتى، 2015 جىلى ءبىزدىڭ ۇسىنىمىزعا ساي، ءبىر اۋىز قازاقشا بىلمەيدى دەپ جۇرت جابىلا سىنايتىن ەرلان ىدىرىسوۆتىڭ ىقپالىمەن شەتتەن كەلەتىن ۇلتى قازاق ادامدارعا ءۇش جىلعا كوپ مارتەلى ۆيزا بەرۋ ءتارتىبى ەنگىزىلگەنىن دە قالدىرماي، اتاپ وتتىك...

ونى قويىپ، قىتاي مەن قازاقستان اراسىنداعى ءبىر ايلىق ۆيزاسىز ءتارتىپ تۋرالى دا ءسوز قوزعادىم.

شاماسى، ەكى ەل اراسىندا ءبىر ايلىق ۆيزاسىز ءتارتىپ ەنگىزۋ – قىتاي تاراپىنان بولعان ۇسىنىس. وعان ءبىزدىڭ ەلىمىز بىردەن كەلىسىم بەرىپ، ۆيزاسىز ءتارتىپتى ىسكە اسىردى.

قىتاي مۇنداي ۇسىنىستى قىرعىز رەسپۋبليكاسىنا دا قويعانى بەلگىلى.

بىراق، قىرعىز اعايىندار بىردەن «ءلاپپاي، تاقسىر!» دەي سالماعان. ولار گونكونگ پەن ماكاو ەرەكشە اكىمشىلىك رايونداردىڭ تۇرعىندارىنا، سوسىن اكش-قا، انگلياعا جانە ەۋروپا وداعىنا ۆيزاسى بار كىتاي ازاماتتارىنا عانا قىرعىزستانعا جەتى كۇنگە ۆيزاسىز كىرۋگە كەلىسىم بەرىپتى دەپ ەستىدىك.

قىسقاسى، قىرعىز تۋعاندار قىتاي بيلىگىنە وسىنداي تالاپ قويا العان جانە ول تالابىنا قانىشەر يمپەريانى كوندىرە دە بىلگەن...

ءيا، ۇلتقا دەگەن جاناشىرلىق نيەت بولسا، ءبارىن جاساۋعا بولادى!

توقاەۆ پەن ىدىرىسوۆ جاساعان دۇنيەدى مۇرات نۇرتىلەۋ جاساي المايدى دەگەنگە ءوز باسىم سەنبەيمىن. بەر جاعىندا وتىرعان الىبەك باقاەۆ، باۋىرجان اقاتاەۆ سەكىلدى جىگىتتەر ءبىزدىڭ ۇسىنىستارىمىزدى ءمينيستردىڭ نازارىنا ۇسىنسا، مينيستر پرەزيدەنتكە جەتكىزسە، تاعى قايتالاپ ايتايىن، قاسىم-جومارت كەمەلۇلى وعان بەيجاي قاراماس ەدى. ءبارىن وڭ شەشەر ەدى.

ماسەلە، كورىپ وتىرسىزدار، جەتكىزبەي جەلكەسىن قيادى ەمەس پە؟!

بۇل ءبىر عانا سىرتقى ىستەر مينينسترلىگىنە عانا ەمەس، كوشى-قونعا قاتىستى بارلىق مينيسترلىكتەرگە قاراتىلعان ءسوز. اسىرەسە، ەڭبەك جانە حالىقتى الەۋمەتتىك قورعاۋ مينيسترلىگىنە...

سونىمەن، لەكتسيا وقىپ وتىرا بەرەتىن ەمەس، كونسۋلدىق قىزمەت دەپارتامەنتىنىڭ ديرەكتورى باۋىرجان اقاتاەۆ مىرزامەن كەزدەسۋدەدىڭ سوڭىندا ەكى ۇسىنىسىمدى ورتاعا قويىپ، الداعى جەردە كوشى-قون ءۇردىسىن رەتتەۋگە ارنالعان زاڭدار قايتا قارالىپ جاتسا، مينيسترلىك تاراپىنان قولداپ بەرۋىن ءوتىندىم.

ول – ەلىمىزگە قىتايدان ۆيزاسىز تارتىپپەن ءبىر ايلىق مەرزىمگە كەلگەن ۇلتى قازاق ادامدارعا قازاقستاننان بىردەن ءۇش جىلعا دەيىنگى كوپ مارتەلى ۆيزا بەرۋ ءتارتىبىن ەنگىزۋ;

ەكىنشى – «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭنىڭ 8-بابىنىڭ «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى.» دەگەن بولىگىن «حالىقتىڭ كوشى-قونى تۋرالى» زاڭىنىڭ 10-بابىنداعى قازاقستان رەسپۋبليكاسى سىرتقى ىستەر مينيسترلىگىنىڭ جانە قازاقستان رەسپۋبليكاسىنىڭ شەتەلدەگى مەكەمەلەرىنىڭ قۇزىرەتىنە دە قوسۋ...

اۋىت مۇقيبەك

Abai.kz