بيىل الەۋمەتتىك سالادا 95 جەمقورلىق قىلمىس تىركەلىپ، 58 ادام اشكەرەلەندى، 34 ادام سوتتالدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى حابارلادى.

ماسەلەن، سىبايلاس جەمقورلىققا قارسى قىزمەتتىڭ ماڭعىستاۋ وبلىسى بويىنشا دەپارتامەنتى «№2 جاڭاوزەن قالالىق ەمحاناسى» شجق مكك ديرەكتورى مەن باس بۋحگالتەرىنە قاتىستى سوتقا دەيىنگى تەرگەۋدى اياقتادى.

ولار مەملەكەتتىك ساتىپ الۋ شارتى شەڭبەرىندە مەديتسينالىق بۇيىمداردى جەتكىزبەستەن جەكە كومپانيانىڭ شوتىنا 10,5 ملن تەڭگە سوماسىندا اقشا اۋدارۋ ارقىلى قاراجات جىمقىردى دەگەن كۇدىككە ءىلىندى. سوتتىڭ سانكتسياسىمەن كاسىپورىن ديرەكتورى قاماۋعا الىندى. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.

وسى جىلدىڭ 26 تامىزىندا اتىراۋ قالاسىنىڭ سوتى №4 اتىراۋ قالالىق ەمحاناسىنىڭ ديرەكتورى ە.سابيروۆقا، شارۋاشىلىق مەڭگەرۋشىسى ا.الجانوۆاعا، باس بۋحگالتەر م. دۇيسەنعاليەۆاعا جانە كاسىپكەر ا.ەراليەۆاعا قاتىستى ۇكىم شىعاردى.

الدىن الۋ شارالارى شەڭبەرىندە سوت پروتسەسى اشىق رەجيمدە وتكىزىلدى. پروتسەسكە ونلاين تۇردە وبلىستىق دەنساۋلىق ساقتاۋ باسقارماسىنىڭ جانە ونىڭ 28 ۆەدومستۆولىق باعىنىستى ۇيىمدارىنىڭ قىزمەتكەرلەرى قوسىلدى. سوتتالۋشىلار زاڭناما تالاپتارىن بۇزا وتىرىپ جاسالعان شارتتار شەڭبەرىندە ءىس جۇزىندە قىزمەت كورسەتۋسىز كاسىپكەرگە 231,8 ملن تەڭگە سوماسىندا اقشا اۋدارۋ جولىمەن قاراجات جىمقىرعانى ءۇشىن كىنالى دەپ تانىلدى.

سوت ۇكىمىمەن ولارعا 5 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى. سونداي-اق، ەمحانا باسشىسى سابيروۆ ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ايىرىلدى. ءالجانوۆا، دۇيسەنعاليەۆا جانە ەراليەۆا مەملەكەتتىك ۇيىمداردا 7 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرىلدى.

سوت ۇكىمى زاڭدى كۇشىنە ەنگەن جوق. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

Abai.kz