پرەزيدەنت قىتاي توراعاسىنا قۇتتىقتاۋ حاتىن جولدادى
قاسىم-جومارت توقاەۆ قازاقستاندىقتاردىڭ جانە جەكە ءوزىنىڭ اتىنان سي تسزينپين مەن قىتاي حالقىن قحر-دىڭ قۇرىلعانىنا 75 جىل تولۋىمەن قۇتتىقتادى.
مەملەكەت باسشىسى قۇتتىقتاۋ جەدەلحاتىندا ەل بىرلىگى مەن تۇتاستىعىنىڭ بىرەگەي نىشانى سانالاتىن بۇل كۇننىڭ ورنى ەرەكشە ەكەنىنە توقتالدى. سونىمەن قاتار قىتايدى الەمدەگى كوشباسشى، ءارى جاھاندىق ورنىقتى دامۋعا، حالىقارالىق تۇراقتىلىق پەن قاۋىپسىزدىكتى قامتاماسىز ەتۋگە زور ۇلەس قوسىپ وتىرعان قۋاتتى مەملەكەت رەتىندە اتاپ ءوتتى.
پرەزيدەنت قازاقستان مەن قىتاي اراسىنداعى سان قىرلى ىنتىماقتاستىق ستراتەگيالىق سەرىكتەستىك رۋحىندا قارقىندى دامىپ كەلە جاتقانىنا نازار اۋداردى. ەكى ەلدىڭ مىزعىماس دوستىق پەن تاتۋ كورشىلىككە نەگىزدەلگەن بايلانىسى قوس حالىقتىڭ يگىلىگى جولىندا ۇدايى نىعايا بەرەتىنىنە سەنىم ءبىلدىردى.
قاسىم-جومارت توقاەۆ سي ءتسزينپيننىڭ اسا جاۋاپتى قىزمەتىنە تولايىم تابىس، ال دوستاس قىتاي حالقىنا باق-بەرەكە تىلەدى.
Abai.kz
