ۋكراينانىڭ «جەڭىس جوسپارى» قانداي؟
پرەزيدەنت زەلەنسكي ۋكراينا راداسىندا تۇرىپ، ۋكراينانىڭ «جەڭىس جوسپارىن» تانىستىردى. سونىمەن، ۋكراينانىڭ «جەڭىس جوسپارى» قانداي؟ بۇل تۋرالى Mezgil.kz اقپاراتتىق پورتالى جازدى.
ءبىرىنشى ماسەلە - ۋكراينانى ناتو-عا شاقىرۋ!
زەلەنسكي رەسەي ونداعان جىلدار بويى ەۋروپاداعى گەوساياسي بەلگىسىزدىكتى، اتاپ ايتقاندا ۋكراينانىڭ ناتو مۇشەسى ەمەستىگىن پايدالانىپ كەلگەنىن اتاپ ءوتتى. ءدال وسى نارسە رەسەيدىڭ ۋكراينا قاۋىپسىزدىگىنە قول سۇعۋعا يتەرمەلەدى. پرەزيدەنتتىڭ ايتۋىنشا، ۋكراينانى ناتو-عا شاقىرۋ ارقىلى پۋتين «ءوزىنىڭ گەوساياسي ەسەپتەرى جەڭىلىپ جاتقانىن» ءتۇسىنۋى كەرەك.
ەكىنشى ماسەلە – قورعانىستى كۇشەيتۋ!
«ءبىز اگرەسسورعا قارسى كۇرەستە ۋكراينا قورعانىسىن نىعايتۋ تۋرالى ايتىپ وتىرمىز»، - دەيدى ۋكراينا پرەزيدەنتى. زەلەنسكي ۋكراينانىڭ پوزيتسيالارىن قورعاۋ جانە «سوعىستى رەسەي تەرريتورياسىنا قايتارۋ» قاجەت ەكەنىن ايتتى.
بۇل تارماق - ۋكراينانىڭ قورعانىس جانە قاۋىپسىزدىك كۇشتەرىنىڭ پوزيتسيالارىن نىعايتۋدى، رەسەي فەدەراتسياسى اۋماعىنداعى وپەراتسيانى جالعاستىرۋدى، رەسەيدىڭ شابۋىلدىق الەۋەتىن جويۋدى، ۋكراينا قارۋلى كۇشتەرىنىڭ رەزەرۆتىك بريگادالارىن جيناقتاۋعا سەرىكتەستەرگە كومەك كورسەتۋدى، اۋە قورعانىسىن نىعايتۋدى، ۇشقىشسىز ۇشۋ اپپاراتتارى مەن زىمىرانداردى پايدالانۋ وپەراتسيالارىن كەڭەيتۋدى، رەسەي اۋماقتارىنا سوققى جاساۋ ءۇشىن الىس قاشىقتىقتاعى قارۋدى قولدانۋعا شەكتەۋلەردى الىپ تاستاۋدى جانە ۋكراينانى ناقتى ۋاقىت رەجيمىندە سپۋتنيكتىك دەرەكتەرمەن جانە باسقا بارلاۋ قۇرالدارىمەن الىنعان مالىمەتتەرمەن قامتاماسىز ەتۋدى قامتيدى.
ءۇشىنشى ماسەلە – رەسەيدى وقشاۋلاۋ!
«ول ءۇشىن اقش، ۇلىبريتانيا، فرانتسيا، يتاليا جانە گەرمانيا باسشىلارىنا جولدانعان ناقتى ۇسىنىس-وتىنىشتەرىمىز بار. ونى تاعى بىرقاتار مەملەكەتتەرگە جولدايتىن بولامىز»، - دەدى زەلەنسكي.
ۋكراينا پرەزيدەنتىنىڭ ايتۋىنشا، ۋكراينا ءوز جەرىندە رەسەي فەدەراتسياسى تاراپىنان بولاتىن كەز كەلگەن اسكەري قاۋىپتەن قورعاۋعا جەتكىلىكتى كەشەندى يادرولىق ەمەس ستراتەگيالىق تەجەۋ پاكەتىن ورنالاستىرۋدى ۇسىنىپ وتىر.
ءتورتىنشى ماسەلە – ستراتەگيالىق ەكونوميكالىق الەۋەت!
پرەزيدەنت ۋكراينادا تابيعي رەسۋرستار، ونىڭ ىشىندە قۇنى تريلليونداعان اقش دوللارىن قۇرايتىن ماڭىزدى مەتالدار شوعىرلانعانىن ايتتى. بۇل – ۋران، تيتان، ليتي، گرافيت جانە باسقا دا ستراتەگيالىق قۇندى رەسۋرستار نە رەسەي مەن ونىڭ وداقتاستارىن نە ۋكراينا مەن دەموكراتيالىق الەمدى جاھاندىق باسەكەلەستىكتە نىعايتاتىن رەسۋرستار!
ۋكراينا اقش-قا، ەو-عا ۋكرايناداعى ماڭىزدى رەسۋرستاردى بىرلەسىپ قورعاۋ، بىرلەسكەن ينۆەستيتسيا جانە ءتيىستى ەكونوميكالىق الەۋەتتى پايدالانۋ تۋرالى ارنايى كەلىسىم ۇسىنادى.
بەسىنشى ماسەلە – سوعىستان كەيىنگى كەزەڭگە ارنالعان!
زەلەنسكي سوعىستان كەيىن ۋكراينادا ەڭ تاجىريبەلى جانە ەڭ ءىرى اسكەري كونتينگەنتتەردىڭ ءبىرى بولاتىنىن اتاپ ءوتتى. ونىڭ ايتۋىنشا، ۋكراينانىڭ بۇل تاجىريبەسىن اليانس قورعانىسىن نىعايتۋ جانە ەۋروپاداعى قاۋىپسىزدىكتى قامتاماسىز ەتۋ ءۇشىن پايدالانۋ كەرەك!
ۋكراينا پرەزيدەنتى زەلەنسكيدىڭ ايتۋىنشا، بۇل ۋكراينانىڭ «جەڭىس جوسپارىنىڭ» ءبىر بولىگى عانا. ياعني، تولىق جوسپار ەمەس!
«ەگەر بۇل جوسپار قولداۋ تاپسا، سوعىستى كەلەسى جىلدان كەشىكتىرمەي اياقتاي الامىز»، - دەيدى زەلەنسكي.
پرەزيدەنت زەلەنسكي وسىعان دەيىن ۋكراينانىڭ «جەڭىس جوسپارىن» اقش-قا، ەۋروپا مەملەكەتتەرىنە اپارىپ تانىستىرعان. ال پرەزيدەنت زەلەنسكيدىڭ اقش پرەزيدەنتى بايدەنگە تانىستارعان «جەڭىس جوسپارىنىڭ» ءتورت تارماعى باق-تا جاريالانعان.
وندا:
اۋەلگىسى – باتىس تاراپىنان ۋكرايناعا قاۋىپسىزدىك كەپىلدىكتەرىن بەرۋ;
ونان سوڭ – ناتو-عا كىرۋ كەزىندە ءوزارا قورعانىس تۋرالى پاكتىگە بالاما ازىرلەۋ;
ءۇشىنشى تارماق – كۋرسك وبلىسىنداعى ۋكراينا وپەراتسياسىن ودان ارى جالعاستىرۋ، زاماناۋي قارۋ-جاراقپەن قامتاماسىز ەتۋ ماسەلەسىن بىرجاقتى ەتۋ;
جانە سوڭعىسى – ۋكرايناعا حالىقارالىق قارجىلىق كومەك بەرۋ ماسەلەسىن شەشۋ، - دەپ كورسەتىلگەن.
نازار اۋدارارلىق ماسەلە: بۇل جوسپاردا سوعىس قيمىلدارىن ۋاقىتشا توقتاتۋ نەمەسە وق اتۋدى توقتاتۋ تۋرالى مۇلدە جازىلماعان. بۇعان دەيىن زەلەنسكي: «ءبىز ەگجەي-تەگجەيلى ازىرلەگەن «جەڭىس جوسپارى» بەس تارماقتان تۇرادى. تورتەۋى - بىزگە ءداپ بۇگىن قاجەت، بىرەۋى - سوعىستان كەيىن كەرەك. «جەڭىس جوسپارى» – ۋكراينانى تەز ارادا كۇشەيتەتىن جوسپار. كۇشتى ۋكراينا ءپۋتيندى كەلىسسوز ۇستەلىنە وتىرۋعا ماجبۇرلەيدى!»، - دەپ مالىمدەگەن.
Abai.kz
