ءتىلدى قورعاۋ – ەل تىنىشتىعىن قورعاۋ!

وسىعان دەيىن رەسەيلىك كەلىمسەك باپكەر ستانيسلاۆ چەرچەسوۆتىڭ مەملەكەتتىك تىلگە قاتىستى «ورىنسىز ءازىلى»، انىعىندا قازاق ءتىلىن اشىق كەلەمەج ەتۋى قازاق قوعامىندا قىزۋ تالقى بولدى. قر سپورت جانە تۋريزم مينيسترلىگى ءھام ءمينيسترى داۋعا ارالاسىپ، اۋەلى چەرچەسوۆتەن تۇسىندىرمە تالاپ ەتىپ، ارتىنان «داۋدى ۋشىقتىرماۋ» تۋرالى مالىمدەمە جاساعانى بەلگىلى. ال قازاقستان فۋتبول فەدەراتسياسى چەرچەسوۆتى اقتاۋعا تىرىسقانىمەن، قوعام نارازىلىعىنان سوڭ چەرچەسوۆكە از-ماز ايىپپۇل سالعانىن مالىمدەگەن. بۇل تۋرالى ءبىز ەگجەي-تەگجەيلى جازدىق.

سۋرەت Abai.kz سكرينى.

فۋتبولدان قازاق ەلىنىڭ ۇلتتىق قۇراماسىنىڭ باس باپكەرى ستانيسلاۆ چەرچەسوۆ مەملەكەتتىك ءتىلىمىزدى قۇرمەتتەمەي، وسىمەن ەكىنشى رەت باسى داۋعا قالىپ وتىر. چەرچەسوۆتىڭ ورەسكەل ارەكەتىنە مەملەكەتتىك ورگاندار، پروكۋراتۋرا قۇقىقتىق باعا بەرمەدى.

وسىعان بايلانىستى بەلگىلى زاڭگەر، Abai.kzاقپاراتتىق پورتالىنىڭ تۇراقتى اۆتورى ايىپحان مۇحاماديەۆ باس پروكۋراتۋراعا ارىز جازىپتى.

«قازاقستان حالقىنىڭ ۇلتتىق ار-نامىسى مەن قادiر-قاسيەتiن قورلاۋعا باعىتتالعان مۇنداي قاساقانا ارەكەتتەرگە توسقاۋىل قويىپ، توقتاتىپ وتىرۋ كەرەك!»، - دەيدى زاڭ مامانى. ءبىز پورتال وقىرماندارىنىڭ تالقىسىنا باس پروكۋراتۋراعا جازىلعان وسى ارىزدى ۇسىنىپ وتىرمىز...

سۋرەت قازاقستان رەسپۋبليكاسىنىڭ باس پروكۋراتۋراسى سايتىنان الىندى.

قازاقستان رەسپۋبليكاسىنىڭ

باس پروكۋرورى ب.ن.اسىلوۆقا!

ارىز يەسى: مۇحاماديەۆ ا.

قۇرمەتتى بەرىك نوعايۇلى!

مەنىڭ ارىزىم قوعامدا ۇلكەن داۋ تۋدىرىپ وتىرعان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ ۇلتتار ليگا اياسىندا سلوۆەنيامەن وتكەن ماتچتان كەيىنگى ءباسپاسوز كونفەرەنتسياسىنداعى ايتقان ءسوزى جايلى. س.چەرچەسوۆتىڭ مەملەكەتتىك تىلدە سۇراق قويعان جۋرناليستكە كەلەمەجدەپ: «تى پو فرانتسۋسكي سەيچاس، گوۆوريش؟» - دەگەنى باق-تا ەلدىڭ اشۋ-ىزاسىن تۋدىرىپ وتىر.

كونستيتۋتسيانىڭ 7-بابىندا: «قازاقستان رەسپۋبليكاسىنداعى مەملەكەتتىك تiل - قازاق ءتىلى»، - دەلىنگەن. بۇل نورمانى 1995 جىلعى 30 تامىزدا، رەفەرەندۋمدا بۇكىل قازاقستان حالقى ءبىراۋىزدان بەكىتتى. «قازاقستان رەسپۋبليكاسىنداعى تiل تۋرالى» زاڭنىڭ 4-بابىندا: «مەملەكەتتiك تiل - مەملەكەتتiڭ بۇكiل اۋماعىندا قوعامدىق قاتىناستاردىڭ بارلىق سالاسىندا قولدانىلاتىن مەملەكەتتiك باسقارۋ تiلi»، - دەپ كورسەتىلگەن.

س. چەرچەسوۆتىڭ سوزىندە قر قىلمىستىق كودەكسىنىڭ 174-بابىندا جازىلعان قۇقىق بۇزۋشىلىقتاردىڭ بەلگىلەرى بار. ول كوپتەگەن مەملەكەتتەردە كورسەتىلەتىن ءباسپاسوز كونفەرەنتسياسىندا جاريا تۇردە ماسس-مەديانى، تەلەكوممۋنيكاتسيا جەلىلەرىن جانە ونلاين-پلاتفورمالاردى پايدالانا وتىرىپ،  مەملەكەتتىك ءتىلدى – قازاق ءتىلىن كەمسىتىپ، ءوز ارەكەتىمەن ۇلتتىق الاۋىزدىقتى قوزدىردى. مەملەكەتتىك تىلدە بەرىلگەن سۇراققا مىسقىلداپ، كۇلىپ: «سەن فرانتسۋزشا سويلەپ تۇرسىڭ با؟» - دەپ ايتىپ، قازاقستان ازاماتتارىنىڭ ۇلتتىق ار-نامىسى مەن قادiر-قاسيەتiن قورلاۋعا باعىتتالعان قاساقانا ارەكەت جاسادى.

ەگەر دە وسىنداي مەملەكەتتىك ءتىلدى، ەلدى مازاق ەتۋ قورلاۋ ارەكەتتەرىنىڭ الدىن الىپ توقتاتپاسا – مۇنىڭ ارتى «قوردايداعى» سەكىلدى ۇلتارالىق داۋعا ۇلاسىپ كەتۋى ابدەن مۇمكىن.

پرەزيدەنت قاسىم-جومارت توقاەۆ 2020 جىلى قايعىلى وقيعادان كەيىن قوردايدىڭ تۇرعىندارىمەن كەزدەسكەندە: «ەلىمىزدىڭ ءتىلىن ءبارىمىز قۇرمەتتەۋىمىز كەرەك!» - دەگەن بولاتىن.

قۇرمەتتى بەرىك نوعايۇلى!

مەن سىزگە كونستيتۋتسيانىڭ 83-بابىندا بەكىتىلگەن «پروكۋراتۋرا مەملەكەت اتىنان قازاقستان رەسپۋبليكاسىنىڭ اۋماعىندا زاڭدىلىقتىڭ ساقتالۋىنا زاڭدا بەلگىلەنگەن شەكتە جانە نىسانداردا جوعارى قاداعالاۋدى جۇزەگە اسىرادى»، - دەگەن مىندەتتەرىڭىزدى ورىنداپ، ستانيسلاۆ چەرچەسوۆتى جاۋاپقا تارتۋدى تالاپ ەتەمىن!

ايىپحان مۇحاماديەۆ

Abai.kz