بۇگىن ءماجىلىستىڭ جالپى وتىرىسىندا دەپۋتاتتىق كورپۋس ەلىمىز ءۇشىن، ەكونوميكامىز ءۇشىن ماڭىزدى كەلىسىمدى راتيفيكاتسيالادى. ول – قازاقستان مەن فرانتسيا اراسىنداعى فرانتسۋز دامۋ اگەنتتىگىنىڭ (فدا) قىزمەتى تۋرالى كەلىسىم.

بۇل تۋرالى ءماجىلىس دەپۋتاتى ولجاس قۇسپەكوۆ حابارلاپ ايتتى.

«بۇل بىزگە نە بەرەدى؟ بىرىنشىدەن، كەلىسىم قازاقستان مەن فرانتسيا ۇكىمەتتەرى اراسىنداعى ەكونوميكالىق جانە قارجىلىق ارىپتەستىكتى نىعايتادى. ەلىمىزدىڭ ءتۇرلى ستراتەگيالىق سالالارىندا جاڭا مۇمكىندىكتەرگە جول اشىپ، حالىقارالىق دەڭگەيدە قولداۋ تابۋعا سەپتىگىن تيگىزەدى.

ەكىنشىدەن، فدا – ەنەرگەتيكا، ينفراقۇرىلىم، اۋىل شارۋاشىلىعى، سۋ رەسۋرستارىن باسقارۋ جانە «جاسىل» كولىك سياقتى ەكونوميكانىڭ ماڭىزدى سالالارىندا سەرپىندى جوبالاردى قارجىلاندىراتىن نەگىزگى ۇيىم. قازىر قازاقستاندا وسى باعىتتاردى دامىتۋعا ەرەكشە ءمان بەرىلۋدە.

مەملەكەت باسشىسى بىلتىرعى جولداۋىندا جاڭا ەكونوميكالىق ساياسات جاريالاعان بولاتىن. ونى ىسكە اسىرۋ، ەكونوميكانى ەسەلەي دامىتۋ ءۇشىن اۋقىمدى ينۆەستيتسيا، جاڭا تەحنولوگيالار كەرەك.

وسى كەلىسىمدى راتيفيكاتسيالاۋ ارقىلى مەملەكەتىمىزگە ۇزاقمەرزىمدى جەڭىلدەتىلگەن نەسيەلەر مەن گرانتتار بولىنەدى. سول ارقىلى ماڭىزدى ينفراقۇرىلىمدىق جانە ەكولوگيالىق جوبالاردى جۇزەگە اسىرا الامىز. ياعني، ەكونوميكانى تۇراقتى ءارى قارقىندى دامىتۋعا قاراي ماڭىزدى قادام جاساپ وتىرمىز»، - دەيدى دەپۋتات ولجاس قۇسپەكوۆ.

ايتا كەتەيىك، فرانتسۋز دامۋ اگەنتتىگىنىڭ نەگىزى 1941 جىلى قالانعان. 1998 جىلى اگەنتتىك فرانتسيا ۇكىمەتىنىڭ ساياساتىن قولداۋ ماقساتىمەن قايتا قۇرىلدى.

بۇگىنگى تاڭدا 115 ەلدە جۇمىس ىستەيدى. اگەنتتىك دامۋشى ەلدەرگە 4000-نان استام جوباعا ينۆەستيتسيا سالدى. قارجىلاندىرۋ كولەمى سول ەلدەردىڭ الەۋەتىنە بايلانىستى ءار ءتۇرلى بولادى.  بىراق فدا جىل سايىن دامۋشى ەلدەرگە جۇزدەگەن ميلليون ەۋرو كولەمىندە قارجى ءبولىپ كەلەدى. بۇل – قازاقستان ءۇشىن جاقسى مۇمكىندىك.

«اگەنتتىكتىڭ قازاقستانداعى قىزمەتى مەملەكەتتىك جوبالاردى كەپىلدىكسىز قارجىلاندىرۋعا مۇمكىندىك بەرەدى. بۇل دا ەلدىڭ قارجى سەكتورىن نىعايتىپ، ينۆەستيتسيالىق تارتىمدىلىعىن ارتتىرا تۇسپەك. اگەنتتىك نەسيەلەردى 15 جىلعا دەيىنگى مەرزىمدە جانە تومەن پايىزدىق مولشەرلەمەلەرمەن ۇسىنادى. ول دا ەلىمىزدىڭ قارجىلىق تۇراقتىلىعىن نىعايتۋعا ىقپال ەتەدى.

ءبىر سوزبەن ايتقاندا، بۇل كەلىسىم – قازاقستان ءۇشىن حالىقارالىق دەڭگەيدە ينۆەستيتسيا تارتۋدىڭ ءتيىمدى قۇرالى. ەڭ باستىسى، ەلدىڭ ەكونوميكالىق دامۋىن جاڭا ساتىعا كوتەرۋگە مۇمكىندىك بەرەدى دەپ ويلايمىن»، - دەيدى دەپۋتات.

Abai.kz