بۇگىن قازاقستان حالقى رەسپۋبليكا كۇنىن اتاپ وتۋدە. 1990 جىلى 25 قازاندا جوعارعى كەڭەستىڭ قاۋلىسىمەن قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلداندى.

بۇل ەلىمىزدىڭ تاۋەلسىزدىك جولىنداعى العاشقى قادامى ەدى. قازاق كسر-ءنىڭ ەگەمەندىگىن جاريالانىپ، قازاقستاننىڭ تاۋەلسىز مەملەكەت رەتىندەگى ساياسي-قۇقىقتىق نەگىزدەرى قالاندى.

وندا تۇڭعىش رەت قازاق مەملەكەتىنىڭ تۇتاستىعى ونىڭ اۋماقتارىنىڭ بولىنبەيتىندىگى جانە مىزعىماستىعى تۋرالى، قازاقستان حالىقتارىنىڭ ءتىلىن، مادەنيەتىن دامىتۋ، ۇلتتىق بىرەگەيلىكتى نىعايتۋ سياقتى قاعيداتتارى بەكىتىلدى.

سونداي-اق قۇجاتتا ساياسي، ەكونوميكالىق جانە الەۋمەتتىك ماسەلەلەردى دەربەس شەشۋ ءپرينتسيپى جاريالاندى. قازاق كسر-ءى ءوزىنىڭ ىشكى اسكەرلەرىن، مەملەكەتتىك قاۋىپسىزدىك جانە ىشكى ىستەر ورگاندارىن قۇرۋ قۇقىعىن الدى. ال پرەزيدەنت اكىمشىلىك-اتقارۋشى جوعارعى بيلىكتىڭ باسشىسى بولىپ تانىلدى. وسى دەكلاراتسيانىڭ ارقاسىندا قازاقستان كەڭەستىك زاڭداردى توقتاتىپ، ءوز زاڭدارىن جاساۋعا كىرىستى.

سۋرەت اقوردا تەلەگرام ارناسىنان الىندى.

قازاقستان پرەزيدەنتىنىڭ قۇتتىقتاۋى

قاسىم-جومارت توقاەۆ، قازاقستان پرەزيدەنتى:

- قۇرمەتتى وتانداستار! بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن! قازاقستاننىڭ ەگەمەندى ەل ەكەنىن ايگىلەيتىن ۇلىق مەيرام – سان عاسىرلىق تاريحى بار مەملەكەتتىلىگىمىزدىڭ قايتا جاڭعىرۋىنىڭ سيمۆولى.

ۇلتتىق مەرەكە حالقىمىزدى مىزعىماس قۇندىلىقتار توڭىرەگىنە توعىستىرىپ، جالپىۇلتتىق بىرەگەيلىگىمىزدى نىعايتا تۇسۋگە ىقپال ەتەدى.

ءبىز بەرەكەلى بىرلىك پەن ىرىستى ىنتىماقتىڭ ارقاسىندا اسا كۇردەلى سىن-قاتەرلەردى ەڭسەرىپ، اۋقىمدى وزگەرىستەردى جۇزەگە اسىرىپ كەلەمىز. قوعامداعى زاڭ مەن ءتارتىپ، ازاماتتاردىڭ ەڭبەكقورلىعى مەن كاسىبي بىلىكتىلىگى قازىرگى رەفورمالاردىڭ بەرىك تىرەگىنە ءارى قوزعاۋشى كۇشىنە اينالدى.

ءبىز بولاشاققا نىق سەنىممەن قاراپ، ادىلەتتى قازاقستاندى قۇرۋ جولىندا ناقتى قادامدار جاساي بەرەمىز.

ەلىمىزدىڭ ەرتەڭى قانداي بولاتىنى ءاربىر وتانداسىمىزعا بايلانىستى ەكەنى انىق. ازاماتتارىمىز وسى قاستەرلى جاۋاپكەرشىلىكتى تەرەڭ ءتۇسىنىپ، مەملەكەتتىگىمىزدى نىعايتۋعا ءوز ۇلەسىن قوسادى دەپ سەنەمىن. سىزدەرگە زور دەنساۋلىق، تولايىم تابىس جانە باق-بەرەكە تىلەيمىن!

سۋرەت اقوردا تەلەگرام ارناسىنان الىندى.

مەملەكەتتىك تۋ كوتەرۋ ءراسىمى

وسىدان سوڭ پرەزيدەنت قاسىم-جومارت توقاەۆ ۇلىق مەرەكە – رەسپۋبليكا كۇنىنە ارنالعان مەملەكەتتىك تۋ كوتەرۋ سالتاناتتى راسىمىنە قاتىستى. ءىس-شارا «اقوردا» رەزيدەنتسياسىنىڭ الدىندا ءوتتى. قۇرمەت قاراۋىلىنىڭ باستىعى پرەزيدەنتكە راپورت بەردى.

بۇدان كەيىن قاسىم-جومارت توقاەۆتىڭ بۇيرىعىمەن مەملەكەتتىك تۋ كوتەرىلىپ، ءانۇرانىمىز شىرقالدى. ۇلتتىق مەرەكەنى رەسپۋبليكا بويىنشا رەسمي تۇردە اتاپ ءوتۋ وسى سالتاناتتى شارادان باستالدى. سونىمەن قاتار قازاقستاننىڭ بارلىق وڭىرىندە مەملەكەتتىك تۋ كوتەرۋ ءراسىمى وتەدى.

سۋرەت arasha.kz سايتىنان الىندى.

ماۋلەن اشىمباەۆ، قر سەناتىنىڭ توراعاسى:

- بارشاڭىزدى ۇلتتىق مەرەكەمىز – رەسپۋبليكا كۇنىمەن شىن جۇرەكتەن قۇتتىقتايمىن! پرەزيدەنتىمىز قاسىم-جومارت كەمەلۇلى توقاەۆ اتاپ وتكەندەي، 25 قازان ازاتتىقتىڭ التىن قازىعى قاعىلعان كۇن رەتىندە قاستەرلى.

وسى مەرەكەگە وراي ەلىمىزدىڭ بارلىق وڭىرىندە كوك بايراعىمىز كوتەرىلىپ، سالتاناتتى ءراسىم ءوتتى. شىن مانىندە، ەگەمەندىك تۋرالى دەكلاراتسيا – تاۋەلسىزدىككە جول اشقان اسا ماڭىزدى قۇجات. سول ارقىلى حالقىمىزدىڭ عاسىرلارعا جالعاسقان مەملەكەتتىلىك ءداستۇرى قايتا جاڭعىردى. وسىنداي تاريحي ءساتتى ۇلىقتاۋ ەگەمەندىكتىڭ قادىر-قاسيەتىن ارتتىرىپ، قوعامدا وتانشىلدىق رۋحتى دارىپتەيدى.

سونداي-اق مۇنداي قادام ۇلتتى ۇيىستىرىپ، حالىقتى جىگەرلەندىرە تۇسەدى. سوندىقتان ەڭسەلى ەلدىكتىڭ باستاۋى بولعان بۇل كۇننىڭ ءمانى زور. بارشاڭىزدى ۇلتتىق مەرەكەمەن قۇتتىقتاي وتىرىپ، ەلىمىزگە اماندىق، جەرىمىزگە تىنىشتىق، ءار وتباسىنا شاتتىق تىلەيمىن! ەگەمەندىگىمىز باياندى بولىپ، تاۋەلسىز قازاق ەلى جاساي بەرسىن!

سۋرەت parlam.kz سايتىنان الىندى.

ەرلان قوشانوۆ، قر ءماجىلىسىنىڭ توراعاسى:

- سىزدەردى ەلىمىزدىڭ ەڭ ۇلىق مەرەكەسى – رەسپۋبليكا كۇنىمەن شىن جۇرەكتەن قۇتتىقتايمىن!   بۇل – ەل ەگەمەندىگىنە جول اشقان ەرەكشە كۇن. تاۋەلسىزدىگىمىزدىڭ باستاۋى دا وسىدان 34 جىل بۇرىن ءدال وسى كۇنى قابىلدانعان مەملەكەتتىك ەگەمەندىك تۋرالى دەكلاراتسيادان تامىر تارتادى.

سوندىقتان دا بايتاق وتانىمىزدىڭ ءاربىر ازاماتى ءۇشىن اتا-بابا ارمانىن اقيقاتقا اينالدىرعان بۇل كۇننىڭ ماڭىزى زور.

وسى جىلدار ىشىندە تاريحي قۇجاتتا ايتىلعان مالىمدەمەلەردىڭ بارلىعى جۇزەگە استى. وندا قامتىلعان قاعيداتتار اتا زاڭىمىزعا ارقاۋ بولدى. قازاقستان تۇعىرى بەرىك، بىرلىگى بەكەم، بولاشاعى جارقىن، الەم تانىعان ىرگەلى ەلگە اينالدى.

مەملەكەت باسشىسى قاسىم-جومارت توقاەۆتىڭ باستاماسىمەن قايتا جاڭعىرعان وسىناۋ ۇلتتىق مەرەكە الداعى ۋاقىتتا دا ەلدىگىمىزدى نىعايتىپ، ىنتىماعىمىزدى ارتتىرىپ، بيىك بەلەستەرگە باستاي بەرسىن. بارشاڭىزعا زور دەنساۋلىق، باق-بەرەكە تىلەيمىن!

شەت مەملەكەتتەردىڭ قۇتتىقتاۋى

ۇلىق مەرەكە – رەسپۋبليكا كۇنىنە بايلانىستى شەت مەملەكەتتەردىڭ باسشىلارىنان اقورداعا اقجارما قۇتتىقتاۋلار كەلىپ جاتقانىن اقوردانىڭ ءباسپاسوز قىزمەتى جاريا ەتتى.

اقش، قىتاي، رەسەي، ۇلىبريتانيا، فرانتسيا، تۇركيا، جاپونيا، كورەي، ساۋد ارابياسى، اراب مەملەكەتتەرى، ەۋروپا ەلدەرى مەن ورتالىق ازيا ەلدەرى باسشىلارىنان، حالىقارالىق ۇيىمداردان قۇتتىقتاۋلار لەك-تەگىمەن كەلۋدە.

Abai.kz