مەن ءبىزدىڭ قازاقستاندا ءۇش ميلليونعا جۋىق ورىس ەتنوسى بار دەگەنگە سەنبەيمىن!

نەگە دەيسىز عوي، ويتكەنى سولتۇستىك وبلىستار مەن پاۆلودار جاعىن وتە جاقسى  بىلەمىن. وسى سولتۇستىكتە ون جەتى جىلعا جۋىق قىزمەت ەتكەندىكتەن، بۇل جاقتاعى ءاربىر اۋدان مەن ەلدىمەكەننىڭ قانشا تۇرعىنى بار ەكەنىن جاتقا ايتا الامىن دەسەم ارتىق كەتكەندىك ەمەس.

وسى وڭىرلەردەگى وكرۋگتەردە ون-ون بەس، ەڭ كوپ دەگەندە جيىرما شاقتى عانا وتباسى تۇرادى. بۇلاردىڭ جارتىسى قازاقتار بولسا، قالعاندارى سلاۆيان  جۇرتتارى.

ەلىمىز 1991 جىلى ءوز تاۋەلسىزدىگىن العان كەزدەن باستاپ، ون جىلدىڭ ارالىعىندا ەتنيكالىق ورىستاردىڭ 99 پايىزى ارتىنان جاۋ قۋعانداي، تىك كوتەرىلىپ، وزدەرىنىڭ تاريحي وتانىنا كوشىپ كەتتى.

نەمىستەر دە سولاي. كەزىندە جۇكتەرىن تيەۋگە كونتەينەر جەتىسپەي، وسى ەكى ۇلت پەرروندا قىزىل كەڭىردەك بولىپ، توبەلەس شىعارىپ جاتاتىن. مەن مۇنى سول جاقتا جۇرگەنىمدە تالاي كورىپ ءجۇردىم. اۋىلداردىڭ جارتىسىنان كوبى، قاڭىراپ، بوس قالدى. ءاربىر كوشەدە ەكى-ۋش وتباسىدان قالعان بولاتىن. وسى جاقتاعى اۋدانداردىڭ تۇرعىندارى 15-20 مىڭنان اسپايدى.

بۇلاردىڭ جارتىسى قازاقتار. ەندى، ويلاپ قاراڭىز: ءار اۋداننىڭ تۇرعىندارىنىڭ سانى وسى مولشەردە. وڭتۇستىك جانە باتىس وبلىستارمەن سالىستىرۋعا مۇلدە كەلمەيدى. مىسالى: ەسىل، اتباسار اۋداندارىن قوسىپ، ءبىر اۋدان قىلۋعا ابدەن بولادى.

ايتارىم - سولتۇستىك وبلىستاردا ورىستاردىڭ، ياعني سلاۆيانداردىڭ سانى  بۇرىنعىداي ەمەس، قاتتى كەمىپ كەتكەن. اقمولا، قوستاناي، سولتۇستىك قازاقستان، پاۆلودار اۋماقتارىندا تۇراتىن ورىستاردىڭ سانى كوپ دەگەندە، ءبىر ميلليونعا ارەڭ جەتۋى مۇمكىن. سوندا دەيمىن-اۋ، ەلىمىزدە قايدان الىنعان ءۇش ميلليونعا جۋىق ورىس بار دەگەن ەسەپ؟.. مەن بۇعان سەنبەيمىن!

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz