استانا قالاسىندا «قارلىعاش» رمك بالاباقشاسىنىڭ ۇيىمداستىرۋىمەن جانە قازاقستان رەسپۋبليكاسى وقۋ-اعارتۋ مينيسترلىگى جانىنداعى بالالاردىڭ ەرتە دامۋى ينستيتۋتىنىڭ قولداۋىمەن  «ءوسۋ نۇكتەسى. ترانسفورماتسيا كەزەڭى» حالىقارالىق كونفەرەنتسياسى ءوتتى.

كونفەرەنتسياعا قازاقستان، نورۆەگيا، قىرعىزستان، رەسەي فەدەراتسياسى جانە باسقا دا ەلدەردەن 100-دەن استام قاتىسۋشى جينالدى.

شارانىڭ ماقساتى – مەكتەپكە دەيىنگى ءبىلىم بەرۋ سالاسىنداعى زاماناۋي تاسىلدەر مەن ۇزدىك تاجىريبەلەرمەن الماسۋ. قاتىسۋشىلار مەكتەپكە دەيىنگى ءبىلىم مازمۇنىنداعى ماڭىزدى ماسەلەلەر مەن ونىڭ ادام كاپيتالىن نىعايتۋداعى ءرولىن تالقىلادى.

كونفەرەنتسيادا 4 حالىقارالىق جانە 20-عا جۋىق قازاقستاندىق سپيكەر ءسوز سويلەپ، بالالاردى تاربيەلەۋ مەن دامىتۋداعى ۇزدىك تاجىريبەلەردى باياندادى. باياندامالاردىڭ تاقىرىپتارى مەكتەپكە دەيىنگى ءبىلىم بەرۋدەگى جاھاندىق ۇردىستەردى، نورۆەگيالىق جانە ازەربايجاندىق ءبىلىم بەرۋ جۇيەلەرىنىڭ ەرەكشەلىكتەرىن، بالالاردىڭ ەكولوگيالىق ويلاۋىن دامىتۋدى، ۇلتتىق ويىنشىقتاردىڭ ءرولىن، ينكليۋزيۆتى تاسىلدەردى، سونداي-اق STEAM تەحنولوگيالارى مەن باسقا دا يننوۆاتسيالاردى ەنگىزۋدى قامتىدى.

قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعىنىڭ باسشىسى الەكسەي تسوي قاتىسۋشىلاردى قارسى الىپ، كونفەرەنتسيانىڭ قازاقستانداعى مەكتەپكە دەيىنگى ءبىلىم بەرۋ سالاسىنداعى ماڭىزدى وقيعالاردىڭ ءبىرى ەكەنىن اتاپ ءوتتى.

— «وسى كونفەرەنتسيانى وتكىزۋ ەلىمىزدىڭ ءبىلىم بەرۋدەگى يننوۆاتسيالاردى ەنگىزۋگە دەگەن ۇمتىلىسىن كورسەتەدى. قازىرگى زامانعى قوعامنىڭ قارقىندى دامۋى جاعدايىندا ءبىلىم بەرۋ جۇيەسى دە وزگەرىستەردى تالاپ ەتەدى. بۇل الاڭ بارلىق قاتىسۋشىلارعا جاڭا يدەيالار مەن پراكتيكالىق شەشىمدەر ۇسىناتىنىنا جانە مەكتەپكە دەيىنگى ءبىلىم بەرۋ سالاسىنداعى حالىقارالىق ىنتىماقتاستىقتى ودان ءارى نىعايتۋعا ىقپال ەتەتىنىنە سەنەمىن»، — دەپ اتاپ ءوتتى ول.

كونفەرەنتسيا اياسىندا الەمدىك جەتەكشى ساراپشىلار، وقۋ-اعارتۋ مينيسترلىگى وكىلدەرى مەن مەكتەپكە دەيىنگى ءبىلىم بەرۋ پەداگوگتارىنىڭ قاتىسۋىمەن ءۇش باعىتتا: مەدياشىعارماشىلىق، ۇلتتىق قۇندىلىقتارعا نەگىزدەلگەن ءبىلىم بەرۋ جانە ەكولوگيالىق تاربيە بويىنشا دوڭگەلەك ۇستەل ءوتتى. «قارلىعاش» بالاباقشالارىندا سەكتسيالىق وتىرىستار ۇيىمداستىرىلدى. سونىمەن قاتار، مەكتەپكە دەيىنگى ءبىلىم بەرۋ سالاسىنا ارنالعان يننوۆاتسيالىق ازىرلەمەلەر، وقۋ-ادىستەمەلىك ماتەريالدار، تانىمدىق ادەبيەتتەر مەن زاماناۋي IT جابدىقتارى ۇسىنىلعان كورمە-يارماركا ءوتتى.

كونفەرەنتسيا قورىتىندىسى بويىنشا مەكتەپكە دەيىنگى ءبىلىم بەرۋ ساپاسىن ارتتىرۋ بويىنشا بىرقاتار ناقتى باستامالاردى قامتيتىن قورىتىندى قارار قابىلداندى. سونىمەن، ولار وتاندىق جانە شەتەلدىك ۇيىمدارمەن تاجىريبە الماسۋ ءۇشىن "QARLYGASH" بىرىڭعاي الاڭىن دامىتۋدى، ۇزدىك تاجىريبەلەردى تاراتۋ ماقساتىندا پەداگوگتەر ءۇشىن حالىقارالىق تاجىربيەلەر، كۋرستار مەن سەمينارلار ۇيىمداستىرۋدى قامتيدى.

Abai.kz