6-11 قاراشا ارالىعىندا جۇمات شانين اتىنداعى شىمكەنت قالالىق اكادەميالىق قازاق دراما تەاترىنىڭ ۇجىمى 95 جىلدىق مەرەيتويىن بارلىق ءسان-سالتاناتىمەن تويلادى. وسى ايتۋلى داتاعا وراي قازاقستان رەسپۋبليكاسىنىڭ مادەنيەت  جانە اقپارات مينيسترلىگى مەن شىمكەنت قالاسى اكىمدىگىنىڭ قولداۋىمەن، مۇحتار اۋەزوۆ اتىنداعى قازاق ۇلتتىق دراما تەاترىنىڭ ۇيىمداستىرۋىمەن، ورتالىق ازيا ەلدەرى تەاترلارىنىڭ ءىح حالىقارالىق  تەاتر فەستيۆالى  ءوتتى. ەكى جىلدا ءبىر رەت وتەتىن بۇل ونەر مەرەكەسى كۇللى تۇركى الەمىنىڭ مادەني ومىرىندەگى ەلەۋلى وقيعا بولىپ تابىلادى.

اتالمىش ونەر مەرەكەسىنە قازاقستانمەن قوسا تۇركيا، ازەربايجان، قىرعىزستان، وزبەكستان، قاراقالپاقستان، تاتارستاننان ات تەرلەتىپ كەلگەن تەاتر ۇجىمدارى مەن قازاق تەاتر جانە كينو ونەرىنىڭ كوريفەيلەرى - ءاسانالى ءاشىموۆ، تۇڭعىشباي قادىرۇلى جامانقۇلوۆ (تارازي) قاتىستى. ولاردىڭ  ءبارى تەاتر الدىنداعى قىزىل كىلەممەن ءجۇرىپ ءوتتى. رەجيسسەر، دراماتۋرگ، اكتەر، قازاقتىڭ ۇلتتىق كاسىبي تەاتر ونەرىنىڭ نەگىزىن سالۋشىلاردىڭ ءبىرى، مەملەكەت جانە قوعام قايراتكەرى، قازاقستاننىڭ حالىق ءارتىسى  جۇمات تۇرعىنبايۇلى شانين ەسكەرتكىشىنە القىزىل گۇل شوقتارىن قويدى.

تەاتر ساحناسىنداعى سالتانات ارنايى تۇسىرىلگەن بەينەفيلمدى تاماشالاۋمەن باستالدى. ءبىر عاجابى – كەش قازاق جانە اعىلشىن تىلدەرىندە جۇرگىزىلدى. شىمكەنت قالاسىنىڭ اكىمى عابيت ءابدىماجيتۇلى سىزدىقبەكوۆ قۇتتىقتاۋ ءسوز سويلەپ، تەاتر ۇجىمىنا تولاعاي تابىس تىلەدى. ءسوزىنىڭ سوڭىندا قالاباسى ءبىر توپ ازاماتتارعا شىمكەنت قالاسى اكىمدىگىنىڭ العىس حاتىن تابىس ەتتى. ولاردىڭ اراسىندا اكتەرلەر – ابزال تولەنوۆ، ەرلان دۇيسەباەۆ، دۇيسەبەك ارالباەۆ، سامات ازىمقۇلوۆ، باقىتجان ابدىحالىقوۆ، اكتريسا ءداميرا قۇماربەك، سۋرەتشى-بەزەندىرۋشى ماقپال ۇسەنوۆا، كومەندانت بوتاگوز ەسماحانبەتوۆا، اۆتوكولىك جۇرگىزۋشىسى ءپىرالى تاناەۆ،  ۆاحتەر كۇلجان اجىباەۆا بار.

قازاقستان رەسپۋبليكاسى مادەنيەت جانە اقپارات مينيسترلىگى مادەنيەت كوميتەتىنىڭ  تورايىمى كۇمىس قارساقبايقىزى سەيىتوۆا قۇتتىقتاۋ ءسوز سويلەپ، اتالمىش ونەر ۇجىمىنا سىي-قۇرمەت كورسەتتى. اكتريسالار - راۋشان سالوۆا، التىن اينابالاەۆا، گريمەر-پاستيجەر بەيسەنكۇل ءالجانوۆا، قويۋ ءبولىمىنىڭ مەڭگەرۋشىسى باتىربەك قابىلبەكوۆ، راديو تسەحىنىڭ مەڭگەرۋشىسى راشيد ورازباقوۆ  «ەڭبەك ارداگەرى» توسبەلگىسىمەن ماراپاتتالدى. اكتريسا ءمولدىر زياەۆا، اكتەرلەر - ەرسىنبەك امانعاليەۆ، ولجاس مۇسابەكوۆ، باقىتجان داۋلەتجانوۆ «مادەنيەت سالاسىنىڭ ۇزدىگى» توسبەلگىسىمەن ماراپاتتالدى. اكتەر سەرجان قۇتتىباەۆ، اكتريسا گۇلجاينا ءىلياسوۆا، رەجيسسەر اسسيسەنتى عالياش تەلىباەۆا، مۋزەي مەڭگەرۋشىسى قىمبات مولديەۆا،  كوستيۋم تسەحىنىڭ مەڭگەرۋشىسى گۇلجان نۇرسەيىتوۆا،  جارىق بەرۋ تسەحىنىڭ مەڭگەرۋشىسى الىبەك قاساليەۆ قازاقستان رەسپۋبليكاسى مادەنيەت جانە اقپارات مينيسترلىگىنىڭ  قۇرمەت گراموتاسىمەن، ال رەفەرەنت راحناما راحىموۆا، كادر مامانى قاتيرا كەرىمقۇلوۆا، باس اكىمگەر ماقسات قامىتبەكوۆ، مۋزىكا ءبولىمىنىڭ مەڭگەرۋشىسى ءنادىر قالجانوۆ، بۋحگالتەر جانعانىم الىمباەۆا قازاقستان رەسپۋبليكاسى مادەنيەت جانە اقپارات  مينيسترلىگىنىڭ العىس حاتىمەن ماراپاتتالدى.

قازاق ونەرىنىڭ ابىز اقساقالى، كەڭەستىك جانە قازاقستاندىق كينو جانە تەاتر اكتەرى، كينو جانە تەاتر رەجيسسەرى، تەاتر پەداگوگى، پروفەسسور، قازاقستان تەاترلار قاۋىمداستىعىنىڭ پرەزيدەنتى، مۇحتار اۋەزوۆ اتىنداعى قازاق ۇلتتىق دراما تەاترىنىڭ كوركەمدىك جەتەكشىسى، قازاقستاننىڭ حالىق ءارتىسى، كسرو حالىق ءارتىسى، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك ەرى ءاسانالى ءاشىموۆ قۇتتىقتاۋ ءسوز سويلەدى. كەيىننەن ول مۇحتار اۋەزوۆ اتىنداعى ادەبيەت جانە ونەر ينستيتۋتى تەاتر جانە كينو ءبولىمىنىڭ مەڭگەرۋشىسى، تەمىربەك جۇرگەنوۆ اتىنداعى قازاق ۇلتتىق ونەر اكادەمياسى تەاتر ونەرى مەن تەورياسى كافەدراسىنىڭ دوتسەنتى، ونەرتانۋ كانديداتى،  قاۋىمداستىرىلعان پروفەسسور امانكەلدى ورازبايۇلى مۇقاننىڭ جۇمات شانين جايلى جازىلعان «ۇلت تەاترىنىڭ اتاسى» كىتابىنىڭ تۇساۋىن كەستى.

حالىقارالىق تۇركسوي تۇركى مادەنيەتى ۇيىمىنىڭ باس حاتشىسى، قىرعىز رەسپۋبليكاسىنىڭ ەڭبەك سىڭىرگەن مادەنيەت قايراتكەرى حالىق جازۋشىسى، توقتاعۇل اتىنداعى مەملەكەتىك سىيلىقتىڭ لاۋرەاتى، ەۋرازيا جازۋشىلار وداعىنىڭ مۇشەسى، سۇلتان اكىمۇلى راەۆ (قىرعىزستان) زالعا جينالعان جۇرتشىلىقتى ونلاين رەجيمىندە قۇتتىقتادى. مەرەيتويى ءوتىپ وتىرعان تەاتردىڭ قويۋشى-رەجيسسەرلەرى - بەكبولات قۇرمانعوجاەۆ، جۇمابەك ەسىموۆ، باس سۋرەتشىسى قالتورە جۇماقۇلوۆ، ادەبيەت ءبولىمىنىڭ مەڭگەرۋشىسى، دراماتۋرگ  سايا قاسىمبەك حالىقارالىق تۇركسوي تۇركى مادەنيەتى ۇيىمىنىڭ توسبەلگىسىمەن ماراپاتتالدى.

اكتەر، رەجيسسەر، تەاتر پەداگوگى، ونەرتانۋ عىلىمىنىڭ كانديداتى، پروفەسسور، قازاقستان تەاتر قايراتكەرلەرى وداعىنىڭ توراعاسى، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، جامبىل وبلىسىنىڭ قۇرمەتتى ازاماتى تۇڭعىشباي جامانقۇلوۆ قۇتتىقتاۋ ءسوز سويلەدى. اكتريسا ءانيپا قارابەكوۆا قازاقستان تەاتر قايراتكەرلەرى وداعىنىڭ «دارا» توسبەلگىسىمەن، اقجارقىن نۇرتازينا، بايان نىسامباەۆا، ۇلجالعاس دارمەنشيەۆا قۇرمەت گراموتاسىمەن، ساۋلە جاراسباەۆا، اقمارال ادىلبەكوۆا   العىس حاتىمەن ماراپاتتالدى.

سالتاناتتى شارا بارىسىندا سالتانات باقاەۆا، «الاتاۋ سەرىلەرى»، «قاعان» ەتنو-فولكلورلىق ءانسامبلى ونەر كورسەتتى.

قازاقستان رەسپۋبليكاسىنىڭ مادەنيەت جانە اقپارات مينيسترلىگى، شىمكەنت قالاسىنىڭ اكىمدىگى، وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتى ۇجىمدارىنىڭ اتىنان مەرەيتويعا ارنالعان ىقىلاس گۇلى تارتۋ ەتىلدى.

ونەر مەرەكەسىنە جۇمات تۇرعىنبايۇلى ءشانيننىڭ بەلنەمەرەلەرى، تەكتى تۇلعادان قالعان جالعىز تۇياق قاسىمحاننىڭ ۇل-قىزى - بولات پەن جانات ارنايى كەلدى. ولاردىڭ ءبارى جۇمات شانين ءومىرىنىڭ سوڭعى ءساتى جايلى جازىلعان دراماتۋرگ سايا قاسىمبەكتىڭ «اتجالمان عاسىر» تاريحي قاسىرەت تۋىندىسىن تامسانا تاماشالادى. سپەكتاكل سوڭىندا ءاسانالى ءاشىموۆ دراما اۆتورىنا ءوزىنىڭ شىنايى ريزاشىلىق سەزىمىن جەتكىزدى.

فەستيۆال بارىسىندا جۇمات شانين اتىنداعى شىمكەنت قالالىق اكادەميالىق قازاق دراما تەاترىندا كەشكى قويىلىمدار مەن شىمكەنت قالالىق ورىس دراما تەاترىندا كۇندىزگى قويىلىمدار بىرقاتار درامالىق تۋىندىلار كوزىقاراقتى كورەرمەندەر نازارىنا ۇسىنىلدى. اتاپ ايتقاندا، 6 قاراشا كۇنى ساعات 18:00-دە سايا قاسىمبەكتىڭ «اتجالمان عاسىر» تاريحي قاسىرەت تۋىندىسىن (رەجيسسەرى - بەكبولات قۇرمانعوجاەۆ), 7 قاراشادا ساعات 11:00-دە قىرعىزستاننىڭ مەملەكەتتىك «ۋچۋر» جاستار تەاترى شىڭعىس ايتماتوۆتىڭ «بەتپە-بەت» دراماسىن (رەجيسسەرى - شاميل  دىيحانباەۆ), ساعات 18:00-دە وزبەكستاننىڭ مەملەكەتتىك «ديدور» جاستار ەكسپەريمەنتالدى تەاتر-ستۋدياسى حامزا حاكيمزادە ءنيازيدىڭ «سايقىمازاقتاردىڭ ويىنى» كومەدياسىن (رەجيسسەرى - رۋسلان حايداروۆ), 8 قاراشادا  ساعات 11:00-دە ازەربايجان مەملەكەتتىك اكادەميالىق مۋزىكالىق تەاترى پ.سەيدليدىڭ «كيللەردەن تەلەگرامما» مونو-دراماسىن (رەجيسسەرى - زاۋر اليەۆ), ساعات 18:00-دە عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترى عابەڭنىڭ «ۇلپان» دراماسىن (رەجيسسەرى - گۇلناز بالپەيىسوۆا), 9 قاراشادا ساعات 11:00-دە بەرداق اتىنداعى قاراقالپاق مەملەكەتتىك اكادەميالىق مۋزىكالىق تەاترى ش.ايتماتوۆتىڭ «تەڭىز جاعالاي جۇگىرگەن تارعىل توبەت» تۋىندىسىنىڭ جەلىسىمەن قويىلعان «لۋۆر ۇيرەگى» دراماسىن (رەجيسسەرى - مۇحتار رەيموۆ), ساعات 18:00-دە تۇركيانىڭ «الانيا»  حالىق تەاترى ەرنەست حەمەنگۋەيدىڭ  «شال مەن تەڭىز» دراماسىن (رەجيسسەرى - دينا جۇماباي), 10 قاراشادا ساعات 11:00-دە  سامارقاند وبلىستىق مۋزىكالىق دراما تەاترى الىشەر ءناۋايدىڭ «ءلايلى – ءماجنۇن» تراگەديالىق مەتافورلىق ماحاببات حيكاياسىن (رەجيسسەرى - اسقار حولمۋمينوۆ), ساعات 18:00-دە تاتارستاننىڭ عابدوللا تۋكاي اتىنداعى «ءاتنا» مەملەكەتتىك  دراما تەاترى ا.گيليازوۆتىڭ «قار استىنداعى قاينار بۇلاق» مۋزىكالىق كومەدياسى (رەجيسسەرى - راميل راديكوۆيچ فازليەۆ), 11 قاراشادا ساعات 11:00-دە  مۇحتار اۋەزوۆ اتىنداعى قازاق ۇلتتىق دراما تەاترى انتون پاۆلوۆيچ چەحوۆتىڭ «مەنىڭ سۇيىكتى اعاتايىم» دراماسىن (رەجيسسەرى – اسحات ماكسيموۆيچ ماەميروۆ) ساحنالادى.

سونىمەن قاتار اتالمىش ونەر مەرەكەسىنىڭ اياسىندا تەاتر ماماندارىنىڭ شىعارماشىلىق الەۋەتى مەن كاسىبي دەڭگەيىن ارتتىرۋ ماقساتىندا «شەبەرلىك ساباقتارىن» وتكىزىلدى. وندا تەاتر ماماندارى رەسەيدىڭ ە.ب.ۆاحتانگوۆ اتىنداعى  تەاتردىڭ باس  رەجيسسەرى، «التىن ماسكا» بايقاۋىنىڭ بىرنەشە دۇركىن جۇلدەگەرى يۋري نيكولاەۆيچ بۋتۋسوۆتىڭ، تەمىربەك جۇرگەنوۆ اتىنداعى  قازاق ۇلتتىق ونەر اكادەمياسىنىڭ دوتسەنتى ايگۇل نارەمگەنوۆانىڭ، تەاترتانۋشى، وزبەكستان مەملەكەتتىك مۋزىكالىق كومەديا (وپەرەتتا) تەاترىنىڭ ديرەكتورى بۋري ابدۋجاليلوۆيچ گانيەۆتىڭ شەبەرلىك ساباقتارى ۇيىمداستىرىلدى.

حالىقارالىق فەستيۆالدىڭ جابىلۋ سالتاناتى 11 قاراشا كۇنى ساعات 18:00-دە شىمكەنتتەگى «Tulip Hall» مادەنيەت سارايىندا ءوتتى. وندا ۇزدىك دەپ تانىلعان شىعارماشىلىق ۇجىمدار مەن جەكەلەگەن ونەرپازدارعا سىي-قۇرمەت كورسەتىلدى. ونەر مەرەكەسىنە قاتىسقان بارلىق تەاتر ۇجىمى قازاقستان رەسپۋبليكاسى مادەنيەت جانە اقپارات مينيسترلىگىنىڭ العىس حاتىمەن، ارنايى سىيلىعىمەن ماراپاتتالدى.

فەستيۆال اياسىندا كورسەتىلگەن قويىلىمدارعا تورەلىك جاساعان ادىلقازىلار القاسىنىڭ قۇرامىندا قازاقستاننىڭ ەڭبەك ەرى، قازاقستان جانە كسرو حالىق ءارتىسى، مەملەكەتتىك سىيلىقتاردىڭ لاۋرەاتى ءاسانالى ءاشىموۆ (قازاقستان، الماتى), تەاترتانۋشى، ونەرتانۋ دوكتورى، وزبەكستان مەملەكەتتىك ونەر جانە مادەنيەت ينستيتۋتىنىڭ پروفەسسورى مۋحاببات تۋرابوۆنا تۋلياحودجاەۆا (وزبەكستان، تاشكەنت), تەاترتانۋشى، ونەرتانۋ كانديداتى، ءازىربايجان مەملەكەتتىك مادەنيەت جانە ونەر ۋنيۆەرسيتەتىنىڭ پروفەسسورى ايدىن اگايۋنۋس وگلۋ تالىبزادە ء(ازىربايجان، باكۋ), ونەرتانۋ دوكتورى، شوتا رۋستاۆەلي اتىنداعى مەملەكەتتىك تەاتر جانە كينو ۋنيۆەرسيتەتىنىڭ پروفەسسورى، ونەرتانۋ دوكتورى مارينا ۆاسادزە  (گرۋزيا، تبيليسي), تەاتر ءجۋرناليسى، كۋراتور، اۋدارماشى، بۋحارەست ۋنيۆەرسيتەتىنىڭ PhD دوكتورى، رۋمىنياداعى حالىقارالىق تەاتر فەستيۆالىنىڭ كۋراتورى  رالۋكا رەدۋلەسكۋ  (رۋمىنيا، بۋحارەست) بولدى.

فەستيۆالدە قازىلار القاسى نازارعا ۇسىنىلعان قويىلىمداردى تاماشالاپ، مۇقيات ساراپتاۋدان وتكىزگەننەن كەيىن جوعارى دەڭگەيدە كاسىبيلىك تانىتقان قاتىسۋشى-تەاترلاردىڭ جۇمىستارىنا وزدەرىنىڭ ءادىل باعاسىن بەردى. ورتا ازيا ەلدەرى تەاترلارىنىڭ IX حالىقارالىق فەستيۆالىندە «ۇزدىك ەپيزودتىق ەر ادام بەينەسى» جۇلدەسىمەن (500 مىڭ تەڭگەلىك قارجىلاي سىياقى) بەرداق اتىنداعى قاراقالپاق مەملەكەتتىك اكادەميالىق مۋزىكالىق تەاترىنىڭ «لۋۆر ۇيرەگى» سپەكتاكلىندەگى شال ءرولى ءۇشىن بازارباي نازارىمبەتوۆ  ماراپاتتالدى. «ۇزدىك ەپيزودتىق ايەل ادام بەينەسى» جۇلدەسىمەن (500 مىڭ تەڭگەلىك قارجىلاي سىياقى) قىرعىزستان مەملەكەتتىك «ۋچۋر» جاستار تەاترىنىڭ «بەتپە-بەت» سپەكتاكلىندەگى انا ءرولى ءۇشىن باقىتگۇل اسانوۆا، «ەكىنشى پلانداعى ۇزدىك ەر ادام بەينەسى» جۇلدەسىمەن  (800 مىڭ تەڭگەلىك قارجىلاي سىياقى) عابدۋللا تۋكاي اتىنداعى «ءاتنا» مەملەكەتتىك تاتار دراما تەاترىنىڭ «قار استىنداعى قاينار بۇلاق» سپەكتاكلىندەگى  اكە ءرولى ءۇشىن مارات حابيبۋللين،  «ەكىنشى پلانداعى ۇزدىك ايەل ادام بەينەسى»  جۇلدەسىمەن (800 مىڭ تەڭگەلىك قارجىلاي سىياقى) «ديدور» مەملەكەتتىك جاستار ەكسپەريمەنتالدى تەاتر-ستۋدياسىنىڭ «سايقىمازاقتار ويىنى» سپەكتاكلىندەگى ايحان ءرولى ءۇشىن سەۆينچ كۋربونوۆا،  «ۇزدىك ەر ادام بەينەسى» جۇلدەسىمەن (1 ميلليون تەڭگەلىك قارجىلاي سىياقى) الانيا قالالىق تەاترىنىڭ «شال مەن تەڭىز» سپەكتاكلىندەگى شال ءرولى ءۇشىن فيرات ونۋر دەنيز، «ۇزدىك ايەل ادام بەينەسى» جۇلدەسىمەن  (1 ميلليون تەڭگەلىك قارجىلاي سىياقى) جۇمات شانين اتىنداعى شىمكەنت قالالىق اكادەميالىق قازاق دراما تەاترىنىڭ «اتجالمان عاسىر» سپەكتاكلىندەگى جانبيكە ءرولى ءۇشىن ءمولدىر زياەۆا، «ۇزدىك اكتەرلىك انسامبل»  جۇلدەسىمەن (1,5 ميلليون تەڭگەلىك قارجىلاي سىياقى) عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ «ۇلپان» سپەكتاكلى، «ۇزدىك رەجيسسەر» جۇلدەسىمەن  (1 ميلليون تەڭگە) قىرعىزستان مەملەكەتتىك «ۋچۋر» جاستار تەاترىنىڭ «بەتپە-بەت»  سپەكتاكلى ءۇشىن شاميل دايكانباەۆ، ءىح حالىقارالىق فەستيۆالدىڭ باس جۇلدەسى - «ۇزدىك سپەكتاكل» جۇلدەسىمەن (3 ميلليون تەڭگەلىك قارجىلاي سىياقى) الىشەر ءناۋايدىڭ «ءلايلى – ءماجنۇن» تراگەديالىق  مەتافورلىق ماحاببات حيكاياسىن قويعان سامارقاند وبلىستىق مۋزىكالىق دراما تەاترىنىڭ «ءلايلى – ءماجنۇن» سپەكتاكلى ماراپاتتالدى.

سونىمەن قاتار تۇركسوي ۇيىمىنىڭ كەڭەسشىسى، فيلولوگيا عىلىمىنىڭ دوكتورى، دوتسەنت، اۋدارماشى، سىنشى كەمال بەي گوز   شاراعا ارنايى كەلىپ، تۇركى مادەنيەتىن جانە ونەرىن دامىتۋ حالىقارالىق ۇيىمىنىڭ العىس حاتتارى، توسبەلگىلەرىمەن مۇحتار اۋەزوۆ اتىنداعى قازاق ۇلتتىق دراما تەاترىنىڭ اكتەرى  ازامات ساتىبالدى، ال  اكتريسالارى - زارينا كارمەن، سالتانات باقاەۆا، اتالمىش تەاتر ديرەكتورىنىڭ شىعارماشىلىق جۇمىستار جونىندەگى ورىنباسارى، رەجيسسەر  ەلىك نۇرسۇلتان،  وسى تەاتر ديرەكتورىنىڭ ەكونوميكالىق، قۇقىقتىق جانە  قارجى  ماسەلەلەرى جونىندەگى  ورىنباسارى  عاني عالىمۇلى الىمباەۆ جانە «التىن لاشىن» ستاتۋەتكاسىمەن  «اتجالمان عاسىر» تاريحي قاسىرەت تۋىندىسىندا باس ءرولدى سومداعان جۇمات شانين اتىنداعى شىمكەنت قالالىق اكادەميالىق قازاق دراما تەاترىنىڭ اكتەرى ماحمەتالى داريەۆ ماراپاتتالدى.

شىمكەنت قالاسى اكىمى  عابيت ءابدىماجيتۇلىن سىزدىقبەكوۆتىڭ ارنايى جۇلدەسىمەن ءازىربايجان مەملەكەتتىك اكادەميالىق مۋزىكالىق تەاترى جانە جۇمات  شانين اتىنداعى شىمكەنت قالالىق اكادەميالىق قازاق دراما تەاترىنىڭ اكتەرى ماحمەتالى داريەۆ يەلەندى.

كەش بارىسىندا تانىمال ونەر جۇلدىزدارى ءان  شىرقاپ، بي بيلەدى. قورىتا ايتقاندا، ءىح حالىقارالىق ونەر فەستۆالى شىرايلى شىمقالا تۇرعىندارى مەن قالانىڭ قادىرمەندى  قوناقتارىنا كەرەمەت كوڭىل كۇي سىيلادى.

ءابدىساتتار ءالىپ،

جۋرناليست، اقىن، اۋدارماشى، قازاقستان جۋرناليستەر جانە حالىقارالىق جازۋشىلار وداقتارىنىڭ مۇشەسى، رەسپۋبليكالىق «شىمكەنتىم، شىرايلىم!» ادەبي-كوركەم الماناعىنىڭ باس ديرەكتورى – باس رەداكتورى

Abai.kz