رەسەيدىڭ جاڭارتىلعان يادرولىق دوكتريناسى كۇشىنە ەندى. رەسەي پرەزيدەنتى ۆلاديمير پۋتين وزگەرتىلگەن دوكتريناعا قول قويدى. يادرولىق دوكترينا رەسەيدە كەڭەستىك كەزەڭنەن كەيىن العاش رەت اۋقىمدى نەگىزدە وزگەرىسكە ۇشىراپ وتىر. بۇل تۋرالى Mezgil.kz اقپاراتتىق پورتالى جازدى. 

جاڭارتىلعان قۇجات بويىنشا، رەسەي اۋماعىنا قاناتتى زىمىراندارمەن نەمەسە قۋاتتى دروندارمەن شابۋىل جاسالسا، رەسەيدىڭ اۋماقتىق تۇتاستىعىنا قاۋىپ تونسە، وندا رەسەي يادرولىق قارۋدى قولدانۋى مۇمكىن.

جاڭارتىلعان دوكترينادا قوسىمشا تارماقتار پايدا بولدى. ونىڭ ىشىندە يادرولىق قارۋدى ءبىرىنشى بولىپ قولدانۋعا سەبەپ بولاتىن جايتتار دا جازىلعان. «رەسەي اۋماعىنا قاراي ستراتەگيالىق بومبالاۋشى ۇشاقتار، قاناتتى زىمىراندار مەن اۋقىمدى دروندار ۇشىپ كەلە جاتقانى نەمەسە رەسەي اۋماعىنا كىرگەنى جايلى اقپارات انىقتالسا، وندا رەسەي ءبىرىنشى بولىپ سوققى جاساۋى مۇمكىن» دەلىنگەن قۇجاتتا.

ەندىگى تاڭدا رەسەيدىڭ اۋماعىنا عانا ەمەس، كورشىلەس بەلارۋس جەرىنە شابۋىل جاسالسا دا ماسكەۋ تاراپىنان شابۋىل جاساۋشىعا قارسى يادرولىق قارۋ قولدانىلۋى مۇمكىن. بەلارۋس پەن رەسەي «وداقتاس ەل» جوباسى اياسىندا اۋماقتارىن بىرلەسە قورعاۋعا كەلىسكەن. ال 2023 جىلى رەسەي بەلارۋس اۋماعىنا يادرولىق قارۋ ورنالاستىردى.

تاعى ءبىر وزگەرىستە، بىلاي دەلىنەدى: «يادرولىق قارۋى بار ەلدىڭ قولداۋىمەن، يادرولىق ەمەس مەملەكەتتىڭ رەسەيگە نەمەسە رەسەيدىڭ وداقتاسىنا (بەلارۋسقا) جاساعان شابۋىلى ولاردىڭ بىرلەسە جاساعان شابۋىلى رەتىندە قابىلدانادى».

يادرولىق دوكترينانى وزگەرتۋدى ساراپشىلار ۋكراينا سوعىسىمەن تىكەلەي بايلانىستىرادى. رەسەي پرەزيدەنتىنىڭ ءباسپاسوز حاتشىسى دميتري پەسكوۆ بۇل اقپاراتتى راستاپ، ەندىگى تاڭدا يادرولىق دوكترينا بويىنشا ۋكراينانىڭ باتىستىق زىمىرانداردى رەسەيگە قارسى قولدانۋى رەسەي تاراپىنان يادرولىق سوققىمەن جاۋاپ بەرۋگە مۇمكىندىك بەرەتىنىن ايتتى.

يادرولىق سوققى جاساۋعا قاتىستى شەشىمدى رەسەي پرەزيدەنتى قابىلدايدى. بۇل تۋرالى قۇجاتتا ناقتى جازىلعان.

Abai.kz