مەملەكەت باسشىسى اقش-تىڭ جۋىردا سايلانعان پرەزيدەنتى دونالد ترامپپەن تەلەفون ارقىلى سويلەستى. بۇل تۋرالى اقوردا حابارلادى.

قاسىم-جومارت توقاەۆ دونالد ترامپتى امەريكا قۇراما شتاتتارىنىڭ پرەزيدەنتى بولىپ سايلانۋىمەن قۇتتىقتادى.

«ساياساتكەرلەر ساۋدا، ينۆەستيتسيا سالالارىندا جانە يادرولىق قارۋدى تاراتپاۋ باعىتىندا ستراتەگيالىق سەرىكتەستىكتى دامىتۋعا بەيىل ەكەندەرىن راستادى»، - دەپ جازدى اقوردا.

مەملەكەت باسشىسى حالىقارالىق كۇن تارتىبىندەگى وزەكتى ماسەلەلەر بويىنشا قازاقستاننىڭ ۇستانىمىن جەتكىزدى.

قاسىم-جومارت توقاەۆ پەن دونالد ترامپ ەكىجاقتى ىنتىماقتاستىقتىڭ جوعارى قارقىنىن ساقتاۋ ماقساتىندا ۇدايى بايلانىستا بولۋعا ۋاعدالاستى.

وسىعان دەيىن قازاقستان پرەزيدەنتى توقاەۆ قاراشانىڭ باسىندا سايلاۋدا جەڭىسكە جەتكەن دونالد ترامپقا قۇتتىقتاۋ جەدەلحاتىن جولداعان.

وندا: پرەزيدەنت توقاەۆ قاۋىپسىزدىك، يادرولىق قارۋدى تاراتپاۋ، ينۆەستيتسيا سالالارىنداعى ەكىجاقتى ىنتىماقتاستىق دايەكتى تۇردە دامي بەرەتىنىنە سەنىم بىلدىرگەن.

دونالد ترامپ پرەزيدەنتتىك قىزمەتىنە 2025 جىلدىڭ 20 قاڭتارىنان باستاپ كىرىسەدى. ول وسىعان دەيىن رەسەي مەن ۋكراينا اراسىنداعى سوعىستى توقتاتۋعا بار كۇشىن سالاتىنىن، تاراپتاردى كەلىسسوز ۇستەلىنە وتىرعىزۋ ءۇشىن جوسپار ازىرلەگەنىن ايتقان.

سۋرەت: Abai.kz سكرينى.

ساراپشىلار، رەسەي مەن ۋكراينا اراسىنداعى بەيبىت كەلىسسوزدەردى باستاماس بۇرىن، اقش پرەزيدەنتى ترامپ رەسەي پرەزيدەنتى پۋتينمەن جەكە جولىعادى دەپ بولجايدى. ال بولجامدى تۇردە، قوس دەرجاۆا باسشىسى قازاقستاندا جولىعۋى مۇمكىن دەگەن نۇسقا ايتىلادى.

Abai.kz