مەملەكەت باسشىسىنىڭ الماتىنى "باق قالا" رەتىندە قايتا جاڭعىرتۋ جونىندەگى تاپسىرماسىن ورىنداۋ اياسىندا مەگاپوليستى اۋقىمدى كوگالداندىرۋ باعدارلاماسى قارقىندى جۇزەگە اسىرىلىپ جاتىر.

بۇل تۋرالى الماتى اكىمى ەربولات دوساەۆ 2025–2027 جىلدارعا ارنالعان قالا بيۋدجەتىنىڭ جوباسى تالقىلانىپ جاتقان ءماسليحات سەسسياسىندا مالىمدەدى.

نەگىزگى باستامالاردىڭ ءبىرى 2022 جىلى بەكىتىلگەن "جاسىل الماتى" جول كارتاسى. باعدارلامانىڭ باستى ماقساتى 2030 جىلعا دەيىن 2,5 ملن جاسىل جەلەك وتىرعىزۋ. جىل سايىن 320 مىڭ اعاش پەن بۇتا وتىرعىزۋ كوزدەلگەن. 2025 جىلعا دەيىن 1,2 ملن، ال 2030 جىلعا دەيىن شامامەن 1,3 ملن اعاش وتىرعىزىلادى.

2024 جىلى 320 مىڭ جاسىل جەلەكتىڭ 224 مىڭ كوشەتى وتىرعىزىلدى، ونىڭ ىشىندە 150 مىڭنان استامى اعاش، ال 74 مىڭى بۇتا. اعاش وتىرعىزۋ جۇمىستارى جالعاسۋدا، جىل سوڭىنا دەيىن تاعى 96 مىڭ كوشەت وتىرعىزۋ جوسپارلانعان.

"مەملەكەت باسشىسىنىڭ "الماتى – باق قالا" مارتەبەسىن قايتا جاڭعىرتۋ تاپسىرماسىن ساپالى جۇزەگە اسىرۋ ماقساتىندا 2023-2024 جىلدارى 500 كم اۆتوسۋارۋ جانە تامشىلاتىپ سۋارۋ جەلىلەرى ورناتىلدى. 2025 جىلى تاعى 290 كم جەلى تارتۋ ءۇشىن 4,1 ملرد تەڭگە بولىنەدى. بۇل جۇيە 1 ملن-نان استام اعاشتى اۆتوماتتى سۋارۋ جۇيەسىمەن قامتۋعا مۇمكىندىك بەرەدى", – دەدى ەربولات دوساەۆ.

ەستەرىڭىزگە سالا كەتەيىك، 2024 جىلدىڭ ءساۋىر ايىندا "الماتى – ءبىزدىڭ ورتاق ءۇيىمىز" ناۋقانى اياسىندا "الماتى – باق قالا" اكتسياسى وتكىزىلدى. ءىس-شارا بارىسىندا 7 مىڭنان استام جاسىل جەلەك، ونىڭ ىشىندە 4 015 جەمىس اعاشى (ونىڭ 3 855-ءى الما اعاشى), 1 090 جاپىراقتى اعاش جانە 2 600 بۇتا وتىرعىزىلدى.

نەگىزگى كوگالداندىرۋ جۇمىستارى قالانىڭ ماڭىزدى ايماقتارىندا جۇرگىزىلدى: "ALA" ساياباعىندا 2 270 الما اعاشى، ۇاك كوشەسىنىڭ سولتۇستىگىندەگى ساياباقتا 500 جەمىس اعاشى (250 الما اعاشى جانە 250 ورىك اعاشى), بورالداي وزەنى بويىنداعى باقىلاۋ الاڭىندا 1 000 جاپىراقتى اعاش وتىرعىزىلدى.

اۋداندىق اكىمدىكتەر دە الما اعاشتارى اللەيالارىن جانە بۇتالاردى وتىرعىزۋعا بەلسەندى اتسالىستى. الاتاۋ اۋدانىندا 70 الما اعاشى جانە 250 بۇتا، مەدەۋ اۋدانىندا 220 الما اعاشى، ونىڭ ىشىندە 150-ءى الماتى حايۋاناتتار باعى اۋماعىندا، بوستاندىق اۋدانىندا 230 الما اعاشى، ونىڭ ىشىندە 150-ءى تۇڭعىش پرەزيدەنت ساياباعىندا وتىرعىزىلدى.

"جاسىل الماتى" جول كارتاسى – تەك ەكولوگيالىق جاعدايدى جاقسارتۋعا عانا ەمەس، سونىمەن قاتار قالا تۇرعىندارىنىڭ ءومىر ساپاسىن ارتتىرۋعا باعىتتالعان باستاما. جاسىل جەلەكتەر ميكروكليماتتى جاقسارتۋعا، اۋا لاستانۋ دەڭگەيىن تومەندەتۋگە جانە جايلى قالالىق ورتا قۇرۋعا ىقپال ەتەدى.

Abai.kz