قازىرگى تاڭدا ەرەكشە بالالاردىڭ ەلىمىزدە كۇرت كوبەيۋىنە وراي ولارعا مەديتسينالىق كومەك كورسەتەتىن ورتالىقتاردىڭ دا سانى ارتىپ كەلەدى. سۇرانىسقا قاراي ەرەكشە بالالارعا مەديتسينالىق قىزمەت كورسەتەتىن مەملەكەتتىك مەكەمەلەر مەن قاتار جەكەمەنشىك مەديتسينالىق ورتالىقتاردىڭ دا سانى ارتىپ كەلەدى. رەسمي ستاتيستيكاعا جۇگىنسەك، ەلىمىزدىڭ دەنساۋلىق ساقتاۋ جۇيەسىندە بالالارعا كومەك كورسەتەتىن 55 وڭالتۋ ورتالىعى جۇمىس ىستەيدى ەكەن. الماتىداعى «ارمان الماتى» قوعامدىق قورى تسەرەبرالدى سال اۋرۋىنا شالدىققان بالالاردى ەمدەپ، جاڭا ءومىر سىيلاۋدا. قازىر مۇندا تىرەك-قيمىل اپپاراتى بۇزىلعان ەلۋگە جۋىق بالا ەم قابىلداپ، دەنساۋلىعىن ساۋىقتىرىپ ءجۇر.

ورتالىق ماماندارى بالعىنداردىڭ ساۋىعىپ، قاتارلاستارىنان كەم تۇسپەۋى ءۇشىن قولدان كەلگەننىڭ بارلىعىن جاسايمىز دەيدى.

"ارمان الماتى" ورتالىعى تسەرەبرالدى سال اۋرۋىنا شالدىققان بالالاردى ەمدەيدى. سوڭعى جىلدارى تسەرەبرالدى سال دياگنوزى قويىلعان بالالاردىڭ سانى ارتقان. مۇنداي دەرت كەزىندە بالانى جاستايىن ەمدەپ، وڭالتۋ جۇمىستارىن مىقتاپ قولعا السا، مۇگەدەكتىكتەن ارىلۋعا دا بولادى. «ارمان الماتى» ورتالىعى سال اۋرۋىنا شالدىققان وسىنداي بالعىنداردى ەمدەپ، ومىرگە دەگەن قۇشتارلىقتارىن ارتتىرۋدا. ورتالىقتا، اسىرەسە، تىرەك-قيمىلى بۇزىلعان بالالاردى وڭالتۋ ءۇشىن ماسساج جاساۋ جۇمىستارى جوعارى دارەجەدە جۇرگىزىلەدى.

ورتالىق ديرەكتورى رۋسلان عالىمۇلىنىڭ ايتۋىنشا، «ارمان الماتى» قوعامدىق قورى 2019 جىلدىڭ 7 قازانىندا قۇرىلىپتى.

« ورتالىق مەملەكەتتىك الەۋمەتتىك تاپسىرىس اياسىندا بۇگىنگە دەيىن  الەۋمەتتىك قىزمەتتىڭ 8 ءتۇرىن قامتي وتىرىپ، 175 تسەرەبرالدى سال اۋرۋىنا شالدىققان بالالارعا كومەك كورسەتتى. قازىردىڭ وزىندە ورتالىق ءبىر اي ىشىندە 20-25 بالاعا تەگىن قىزمەت كورسەتەدى»،-دەدى ورتالىق ديرەكتورى.

بۇگىندە ورتالىقتا ماسساج جۇمىستارىنان بولەك مۇندا سال بالالاردىڭ تولىققاندى ەمدەلۋى ءۇشىن بارلىق جاعداي جاسالعان. ماسەلەن، لوگوپەد كابينەتىندە ءتىل مۇكىستىگى بار بالالاردىڭ سويلەۋ قابىلەتىن جاقسارتۋ ءۇشىن ءتۇرلى ەمدەر جاسالادى. ايتا كەتەيىك، ورتالىق باسشىلىعى ءتۇرلى مەرەكەلەردى دە ۇمىت قالدىرمايدى. بالعىندار مەن ولاردىڭ اتا-انالارىن شاقىرىپ، ۇنەمى مەرەكەلىك ءىس-شارا ۇيىمداستىرىپ بەرەدى. اسىرەسە كونتسەرتتەر، كينوعا بارۋ جانە باسقا دا مادەني ءىس-شارالار،  حالىقارالىق ايەلدەر كۇنى، ناۋرىز مەيرامى، وتان قورعاۋشىلار كۇنى جانە جەڭىس كۇنى، 1 ماۋسىم بالالاردى قورعاۋ كۇنى، كۇزگى بال،  جاڭا جىل سىندى مەرەكەلىك كۇندەر ءجيى ۇيىمداستىرىلىپ، وندا بالالار مەن قاتار اتا-انالار دا بەلسەنە اتسالىسادى.

«ارمان الماتى» قوعامدىق قورى: الەۋمەتتىك جانە تۇرمىستىق، الەۋمەتتىك جانە مەديتسينالىق، الەۋمەتتىك-پسيحولوگيالىق، الەۋمەتتىك-پەداگوگيكالىق، الەۋمەتتىك-ەڭبەك، الەۋمەتتىك-مادەني، الەۋمەتتىك-ەكونوميكالىق، الەۋمەتتىك-قۇقىقتىق كومەك كورسەتەدى. ورتالىقتاعى ءار مامان ءوز ىسىنە ۇلكەن جاۋاپكەرشىلىكپەن قارايدى. اسىرەسە ورتالىققا كەلگەن بالالارعا: جاتتىعۋ تەراپياسى، ماسساج، لوگوپەد، ارت-تەراپيا، مۋزىكالىق تەراپيا، دەفەكتولوگ، پسيحولوگ، پەداگوگ سىندى قىزمەت تۇرلەرى كورسەتىلەدى.

بالالاردىڭ بويىنداعى سىرقاتىن ەرتە جاستان انىقتاپ، مۇگەدەكتىكتى انىقتاۋعا جانە الدىن الۋعا باعىتتالعان مۇنداي ورتالىقتاردىڭ ماڭىزى زور! دامۋ كەمىستىگى بار جانە ولاردىڭ تۋىنداۋ قاۋپى بار بالالار وسى ورتالىقتاردا ساۋىقتىرۋ جانە وڭالتۋ كومەگىن الا الادى.

ماقپال نوعايباەۆا

Abai.kz