ەلىمىزدە تۇرعىن ءۇي كەزەگى ءتىزىمىن وزەكتەندىرۋ جىلىنا ءتورت رەت جۇرگىزىلەدى. بۇل تۋرالى ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ ءمالىم ەتتى. 

— تۇرعىن ءۇي ساياساتىن رەفورمالانعانعا دەيىن ءۇي كەزەگىمەن اكىمدىكتەر اينالىستى جانە ءتىزىمدى وزەكتەندىرۋ جۇمىسى جىلىنا ءبىر رەت جۇرگىزىلدى. بۇل تۇرعىن ءۇي كەزەگى، ءتىزىم جانە تۇرعىن ۇيمەن قامتاماسىز ەتۋ بويىنشا كوپتەگەن سۇراق تۋعىزدى. بۇگىندە تۇرعىن ءۇي ساياساتىن رەفورمالاۋ شەڭبەرىندە تۇرعىن ءۇي كەزەگىن وزەكتەندىرۋ توقسانىنا ءبىر رەت، ياعني جىلىنا ءتورت رەت جۇرگىزۋ كوزدەلگەن، — دەدى قۋاندىق قاجكەنوۆ ۇكىمەت وتىرىسىنان كەيىن وتكەن ءباسپاسوز ءماسليحاتتا.

ۆيتسە-ءمينيستردىڭ ايتۋىنشا، ەندى تۇرعىن ءۇي كەزەگى تىزىمىمەن وتباسى بانكى اينالىسادى.

— قازىر 650 مىڭنان استام ادام تۇرعىن ءۇي كەزەگىندە تۇر جانە ءتىزىمدى وزەكتەندىرۋ بويىنشا اۋقىمدى جۇمىس جۇرگىزىلدى. ناتيجەسىندە 50 مىڭعا جۋىق ادام تۇرعىن ءۇي كەزەگىنەن الىنىپ تاستالدى. ولار باسپانا العاندار، باسقا وڭىرگە كوشكەندەر جانە جاڭا ورىندا تىركەۋگە تۇرماعان ازاماتتار. ولاردىڭ ورنىنا باسپاناعا مۇقتاج باسقا جاندار كەزەككە قويىلدى، — دەپ تولىقتىردى ءمينيستردىڭ ورىنباسارى.

Abai.kz