اقتاۋ ماڭىنداعى ازىربايجاندىق ۇشاق اپاتىندا قازا تاپقانداردىڭ وتباسىلارىنا كوڭىل ايتامىن، قۇداي ساقتاپ، امان قالعاندار تەزىرەك اياققا تۇرىپ كەتسىن.

ءوز باسىم دۇنيەجۇزىلىك باق تورىنەن ورىن العان وقيعادا ماڭعىستاۋداعى اعايىننىڭ، وقيعا مڭىندا بولىپ، زارداپ شەككەندەرگە دەرەۋ كومەك كورسەتكەن ەلەكتريكتەردىڭ، ءوڭىردىڭ توتەنشە جاعداي قىزمەتكەرلەرىنە، ءورت سوندىرۋشىلەرىنە، دارىگەرلەرىنە ريزاشىلىعىمدى بىلدىرگىم كەلەدى: سىن ساعاتتا ولار ەلىمىزدىڭ ابىرويىن اسپانداتىپ جىبەردى! بۇرىن ءبىزدى بىلە بەرمەيتىن باسقا جۇرت: «قازاقتار دەگەن قينالعاندارعا قول ۇشىن بەرۋگە دايىن، قايىرىمدى، قازاقستاننىڭ مەملەكەتتىك ورگاندارى ىسكەر ءارى ۇيىمشىل، وزگە ەلدىڭ ۇشاعى قۇلاعاندا لايىقتى كومەك بەرە الاتىن ەل ەكەن» دەگەن ويعا كەلگەنى ءسوزسىز.

كەشەلى-بەرى اپات تۋرالى اقپارات اعىنىنىڭ استىندا قالدىق.

الەمدىك باق-تا باستى تاقىرىپقا اينالعان وقيعانىڭ سەبەپتەرىن سان-ساققا جۇگىرتىپ جاتقانى انىق كورىندى.

اۆياتسيادان اۋىلى الىس ماقۇرىمدار دا حايپ ۇستاپ جاتقانى راس، بەدەلدى ماماندار مەن ساراپشىلار دا پىكىر ايتىپ جاتىر.

وسىعان بايلانىستى ءبىر وي ايتايىن.

ۇشاق ازىربايجاندىكى،

رەسەيدەگى گروزنىيعا باعىت العان.

رەيستە ءازىربايجان، رەسەي، قازاقستان جانە قىرعىزستان ازاماتتارى بولعان.

ءازىربايجاننان رەسەيگە ۇشقان ۇشاق قازاقستان اۋماعىندا قۇلادى.

مىنە، ەندىگى جەردە ۇشاق اپاتىنىڭ سەبەبىن انىقتاۋدا ساياسات ارالاسىپ كەتۋى ابدەن مۇمكىن! ويتكەنىع ءار ەل ءوزىن اقتاپ، كىنانى باسقاعا ارتۋى ىقتيال. جانە دە بۇل گەوساياسات ارالاسقان العاشقى اۋە اپاتى ەمەس. بۇرىن دا سونداي جاعدايلار ورىن العان. رەسەيلىك دحر اسپانىندا جارىلعان مالايزيانىڭ «بوينگى» مەن رەسەيلىك سمولەنسك ماڭىندا اپاتقا ۇشىراعان، ىشىندە پولشا پرەزيدەنتى كاچينسكي مەن ۇكىمەت دەلەگاتسياسى بار «تۋ-154م» شە؟

وسىندايدا اقيقاتتى انىقتاۋ ءۇشىن ۇشاقتاعى «قارا جاشىكتەن» الىنار اقپاراتتىڭ ءرولى زور.

مەنىڭ بىلۋىمشە، پوستسوۆەتتىك كەڭىستىكتە اپاتقا ۇشىراعان ۇشاقتاردىڭ «قارا جاشىكتەرى» ماسكەۋدە ورنالاسقان حالىقارالىق اۆياتسيالىق كوميتەتكە جىبەرىلەدى. ماسەلەن، 2019 جىلى جەلتوقساندا الماتى ماڭىندا اپاتقا ۇشىراعان «Bek Air» اۋە كومپانياسىنىڭ «Fokker» 100 ۇشاعىنىڭ «قارا جاشىگى» ءدال وسى ماسكەۋگە جىبەرىلگەن. ياعني، قۇپيانىڭ كىلتى سول جاقتا بولماق. نەگە «قارا جاشىكتەر» ۇشاق تيەسىلى ەلدە اشىلىپ، زەرتتەلمەيدى؟

مۇنداي جاعدايدا قورىتىندى ءجۇز پروتسەنت اقيقات بولادى دەپ ايتا الامىز با؟

باستى سۇراق سول: «التى قازاقستاندىق ازامات قازا تاپقان رەيستىڭ اپاتقا ۇشىراۋىنىڭ گەوساياسي جايتتارعا تاۋەلسىز، راس سەبەبىن انىقتاۋدا قازاقستان جاعى ماسكەۋدىڭ بۇرا تارتىپ كەتپەۋىنە كەپىلدىك بەرە الا ما؟».

مەنى تولعاندىراتىن ءدال وسى سۇراق.

كوپ نارسە ءتىرى قالعان ۇشقىشتار مەن جولاۋشىلاردىڭ سوزدەرىنە دە بايلانىستى، ارينە...

ءامىرجان قوسان

Abai.kz