ازەربايجان پرەزيدەنتى يلحام اليەۆ اقتاۋداعى ۇشاق اپاتىنا قاتىستى پىكىر ءبىلدىرىپ، قازاقستانمەن دوستىق پەن باۋىرلاستىق وسىناۋ قيىن سىناقتان كەيىن بۇرىنعىدان دا نىعايا تۇسكەنىن ايتتى.

«وسى رەتتە مەن پرەزيدەنت توقاەۆقا قايعىلى وقيعا سالدارىنان قازاقستاننىڭ التى ازاماتى قازا تاپقانىنا بايلانىستى كوڭىل ايتتىم. ول دا ماعان كوڭىل ايتتى. بۇل وقيعا قانشالىقتى قايعىلى ءھام قيىن بولعانىمەن، بۇل دا ءبىر سىناق بولدى. بۇل سىناق - ءار تاراپتىڭ قالاي ارەكەت ەتەتىنىن كورسەتەتىن سىناق. ءبىزدىڭ دوستىعىمىز بەن باۋىرلاستىعىمىز وسىناۋ قيىن سىناقتان كەيىن نىعايا ءتۇستى. قازاقستان دا وسىنداي پىكىردە ەكەنىنە سەنىمدىمىن»، - دەدى اليەۆ.

اليەۆ قازاقستاندىق قۇتقارۋشىلاردىڭ ەڭبەگىن اتاپ ءوتتى.

«وقيعا بولعان سوڭ بىردەن قازاقستاندىق قۇتقارۋشىلار اپات ورنىنا جەدەل جەتىپ، قيراعان فيۋزەلياجدان ادامداردى شىعارۋعا كىرىسكەنىن كورىپ-ءبىلىپ، اقپارات الدىق. ولار سول جەردە جارىلىس بولاتىن-بولمايتىنىن بىلمەگەندىكتەن، ءوز ومىرلەرىن قاتەرگە تىككەن. ۇشاقتىڭ ءبىر بولىگى ورتەنىپ كەتكەن، ال ەكىنشى بولىگى ورتەنىپ كەتۋى مۇمكىن ەدى. بىراق، سوعان قاراماستان ولار ناعىز ەرلىك كورسەتتى. بۇل رەتتە مەديتسينا قىزمەتكەرلەرىنىڭ ەڭبەگى كوپ بولدى.

زارداپ شەككەن جولاۋشىلار دەرەۋ مەديتسينالىق مەكەمەلەرگە جەتكىزىلدى. بۇل ءۇشىن مەن پرەزيدەنت توقاەۆقا دا ريزاشىلىعىمدى ءبىلدىردىم. قازاق باۋىرلارىمىزدىڭ ىنتىماعى، مەن بىلەتىندەي، ازەربايجان حالقىنىڭ جۇرەگىندە تەرەڭ ءىز قالدىردى.

قاراپايىم ازاماتتار اقتاۋداعى كونسۋلدىعىمىزعا گۇل شوقتارىن قويىپ، بىزگە دەگەن ىقىلاستارىن ءبىلدىردى. ناعىز دوستىق پەن باۋىرمالدىق دەگەن وسى! سونىمەن بىرگە، مەن پرەزيدەنت توقاەۆپەن اڭگىمەدە ازەربايجاننىڭ تەرگەۋگە قاتىستى ۇستانىمىن ايتىپ، ونىڭ نازارىنا مەن سىزگە ايتىپ وتكەن جايتتاردى جەتكىزدىم.

ءبىز حالىقارالىق ساراپتاماعا دايىنبىز جانە ەشبىر جاعدايدا بۇل ماسەلەنى مەملەكەتارالىق اۆياتسيا كوميتەتىنىڭ قۇزىرىنا بەرە المايمىز. بۇل ۇستانىم تۇسىنىستىكپەن قابىلداندى. ارينە، ءبىزدىڭ مەملەكەتتىك ورگانداردىڭ وكىلدەرى، كوميسسيا مۇشەلەرى مەن باسشىلارى، پروكۋراتۋرا وكىلدەرى ۇنەمى بايلانىستا.

قازاقستان دا ءوز كەزەگىندە مەملەكەتتىك كوميسسيا قۇردى، بۇل تۋرالى ماعان اڭگىمە بارىسىندا پرەزيدەنت توقاەۆ ايتتى. ولار ارينە، بولعان وقيعانىڭ بارلىق ءمان-جايىن انىقتاۋعا تىرىسادى»، - دەدى پرەزيدەنت اليەۆ.

وسىعان دەيىن ازەربايجان ليدەرى يلحام اليەۆ رەسەي پرەزيدەنتى ۆلاديمير پۋتينمەن تەلەفون ارقىلى سويلەسىپ:

«البەتتە، ءبىزدىڭ ۇشاقتى ابايسىزدا اتىپ الۋى مۇمكىن. ەشقانداي قاساقانا ويلاستىرىلعان شابۋىل ەمەس. سول سەبەپتى كىنانى مويىنداپ، ازەربايجاننان كەشىرىم سۇراپ، دوس ەل رەتىندە ءمان-جايدى قوعامعا ءتۇسىندىرۋ كەرەك ەدى. بۇل جاسالۋعا ءتيىس قادامدار ەدى. وكىنىشكە وراي العاشقى ءۇش كۇندە رەسەي تاراپى اقىلعا كەلمەيتىن ساندىراق نۇسقالاردى ايتۋدان باسقا ەشتەڭە ىستەمەدى»، - دەگەن بولاتىن.

سونىمەن قاتار، ازەربايجان رەسەيگە بىرنەشە تالاپ-شارت قويعان. ولار:

بىرىنشىدەن، رەسەي ازەربايجاننان كەشىرىم سۇراۋى ءتيىس.

ەكىنشىدەن، ول وز كىناسىن مويىنداۋى قاجەت.

ۇشىنشىدەن، قىلمىستىق جاۋاپكەرشىلىك اياسىندا بارلىق كىنالىلەر جازالانۋى كەرەك.

تورتىنشىدەن، ازەربايجان ەلىنە، جاپا شەككەن جولاۋشىلار مەن ەكيپاج قۇرامىنا تيىستى وتەماقى تولەنۋى قاجەت.

تاقىرىپقا تۇزدىق:

اقتاۋداعى اۋە اپاتىن تەرگەۋ جونىندەگى كوميسسيا اپات بولعان ۇشاقتىڭ قارا جاشىكتەرىن برازيلياداعى ورتالىققا جىبەرۋ تۋرالى شەشىم قابىلدادى. بۇل تۋرالى 29 جەلتوقساندا كولىك مينيسترلىگى حابارلادى.

«CENIPA ورتالىعىندا قاجەتتى تەحنيكالىق مۇمكىندىكتەر قاراستىرىلعان، ءتيىستى قۇرالدارمەن جابدىقتالعان جانە ولاردى وقۋ ءۇشىن سەرتيفيكاتتالعان زەرتحانا بار. بۇل ماسەلە پرەزيدەنت قاسىم-جومارت توقاەۆتىڭ جەكە باقىلاۋىندا»، - دەلىنگەن حابارلامادا.

Abai.kz