سىبايلاس جەمقورلىققا قارسى ءىس-قيمىل اگەنتتىگى قوعامداعى زاڭ پەن ءتارتىپ قاعيداتىن قامتاماسىز ەتۋگە ەرەكشە نازار اۋدارادى.

ماسەلەن، شىعىس قازاقستان وبلىسىندا وسكەمەن قالاسىنىڭ سوتى وبلىستىق ەكولوگيا دەپارتامەنتىنىڭ باسشىسى د. اليەۆكە، جەرگىلىكتى تۇرعىن م. جۋركاباەۆقا جانە كاسىپكەر ك. دليۋجەۆسكيگە قاتىستى ۇكىم شىعاردى.

اليەۆ پارا العانى ءۇشىن، جۋركاباەۆ دەلدالدىعى، ال دلۋجەۆسكي كوممەرتسيالىق ۇيىمعا التىن وندىرۋگە ەكولوگيالىق رۇقسات الۋ ءۇشىن 4,5 ملن تەڭگە كولەمىندە پارا بەرگەنى ءۇشىن كىنالى دەپ تانىلدى.

سوت ۇكىمىمەن شەنەۋنىك 4 جىلعا، قالا تۇرعىنى – 1 جىل 6 ايعا، كاسىپكەر – 3 جىل 6 ايعا باس بوستاندىعىنان ايىرىلدى، سونداي-اق پايدالى قازبالاردى بارلاۋ جانە ءوندىرۋ سالاسىنداعى كوممەرتسيالىق ۇيىمداردا 5 جىل مەرزىمگە باسشى لاۋازىمداردى اتقارۋعا تىيىم سالىندى.

سونداي-اق، ولار ءومىر بويى مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ايىرىلدى.

سوت اكتىسى زاڭدى كۇشىنە ەنگەن جوق.

الدىن الۋ شارالارى شەڭبەرىندە ۇكىمدى جاريالاۋ ەكولوگيا كوميتەتى مەن ونىڭ اۋماقتىق بولىمشەلەرى قىزمەتكەرلەرىنىڭ قاتىسۋىمەن ونلاين رەجيمدە ءوتتى.

سونىمەن قاتار، كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

Abai.kz