قر مادەنيەت قايراتكەرى، ايتىسكەر ءارى جازبا اقىن، سەمەي شاھارىنداعى قالالىق مادەنيەت سارايىنداعى  "حالىقتىق اقىندار ورتالىعىنىڭ" جەتەكشىسى، ۇلاعاتتى ۇستاز دامەش ومارباەۆا "ىبىراي التىنسارين اتىنداعى № 37 گيمنازيادا" ونەر سۇيەر جاستارمەن  رۋحاني كەزدەسۋ وتكىزدى.

"اق قاۋىرسىن" ونەر ۇيىرمەسىنىڭ جاس اقىندارى "ايتىسكەر ۇستازبەن" شىعارماشىلىق سۇحبات قۇرىپ، ءوز ولەڭ-جىر تۋىندىلارىن ورتاعا سالدى. بۇل شارا جاس بۋىنعا اقىندىق ونەردى دارىپتەۋ مەن ۇلتتىق مۇرالاردى ناسيحاتتاۋعا ارنالدى.

كەشتىڭ شىمىلدىعىن، ۇيىرمە جەتەكشىسى، ايتىسكەر، قازاق جازبا پوەزياسىنىڭ وكىلى، اۋدارماشى، جاس ۇستاز  ەرىك ومارعالي اشىپ  بەردى. ودان ارمەن قارايعى شارانىڭ كوركىن،  بولاشاق ايتىسكەر اقىن نازار اسۋباەۆ جالىندى سۋىرىپسالما جىرىمەن اشىپ، كۇمبىرلەگەن قوڭىر دومبىرا ۇنىمەن، ءوزىنىڭ كەش قوناعىنا دەگەن مەرەيلى ارناۋىن تارتۋ ەتتى. ارا-تۇرا، جاس وركەن راسۋل جاساربەك  شاعىن اۋدارما ولەڭىنەن وقىپ، ادەبيەت الەمىنە ىنتاسىن كورسەتتى. ال كەلەشەك جاس جازبا اقىن نۇرسانا ارنۇرقىزى ءوزىنىڭ شىعارماشىلىق ولەڭدەرىن ۇسىنىپ، جينالعان قاۋىمدى تەبىرەنتتى.

كەزدەسۋ ەركىن فورماتتا، سۇراق-جاۋاپ تۇرىندە جالعاسىن تاپتى. شاكىرتتەر  اقىن اناعا كوكەيلەرىندە جۇرگەن سۇراقتارىن قويىپ، اقىندىق جولدىڭ قىر-سىرى تۋرالى اقىل-كەڭەس الدى. قالامگەر دامەش ومارباەۆا ءوز ءومىر جولىنان تاعىلىمدى سىر شەرتىپ، جاس اقىندارعا شابىت شوعىن ۇرلەيتىن جۇلدىزدى-اسقاق   جىرلارىن وقىپ، جىگەرلى اسەر سىيلادى.

ءباتتاش سىدىقۇلى اتىنداعى "شەشەندىك ونەر" سىنىبىنىڭ جەتەكشىسى، "ۇزدىك ۇستاز" اتاعىنىڭ يەگەرى، قازاق ءتىلى مەن ادەبيەتى ءپانىنىڭ مۇعالىمى نۇرعامىسوۆا شولپان ماحمۇتقىزى دا كەش قوناعىنا، ءوزىنىڭ، ىزگىلىك تۇنعان  العىسىن ءبىلدىرىپ، بولاشاعى زور، الدا ءۇمىت كۇتتىرەر، سانالى  اقىندارعا  ۇستازدىق ريزا كوڭىلىن جەتكىزدى. ول جاس اقىندارعا:

ء"بىلىم مەن ونەر – ەگىز ۇعىم. ونەر جولىندا تالماي ىزدەنىپ، پوەزيا پەن ايتىس شىڭىن  باعىندىرۋلارىڭىزعا تىلەكتەسپىن!" – دەپ، شىعارماشىلىق تابىستار تىلەدى.

كەش سوڭىندا، ۇستازدار مەن شاكىرتتەر ەستەلىك سۋرەتكە ءتۇسىپ، جىلى لەبىزدەرمەن تاراستى.

دامەش ومارباەۆا "اق قاۋىرسىن" ونەر  ۇيىرمەسىنىڭ جاس اقىندارىنا ءوز قولتاڭباسىمەن كىتاپتارىن تارتۋ ەتىپ، بولاشاقتا بيىك  بەلەستەرگە جەتۋلەرىنە  تىلەكشى ەكەنىن جەتكىزدى.

بۇل رۋحاني كەزدەسۋ جاس ۇرپاقتىڭ ادەبيەتكە دەگەن سۇيىسپەنشىلىگىن ارتتىرىپ، اقىندىق جولداعى العاشقى قادامدارىنا شابىت ۇشقىنىن شاشتى.

Abai.kz