قازاقستان رەسپۋبليكاسىنىڭ
مەملەكەتتiك كەڭەسشىسى
ە.ت. قارين مىرزاعا!

قۇرمەتتى ەرلان تىنىمبايۇلى!

مەملەكەت باسشىسى قاسىم-جومارت توقاەۆتىڭ توراعالىعىمەن 2025 جىلعى 28 قاڭتاردا قازاقستان رەسپۋبليكاسى ۇكىمەتىنىڭ كەڭەيتىلگەن وتىرىسى وتەتىنى حابارلاندى.

وسى ورايدا، قازاق كوشىنە قاتىستى تۋىنداعان جاعدايلارعا شولۋ جاساي وتىرىپ، ءوز ويلارىمدى ءسىزدىڭ نازارىڭىزعا تاعى ءبىر مارتە سالعاندى ءجون كوردىم.

توق ەتەرىن ايتساق، قازاق كوشى كارىم ءماسىموۆ زامانىنداعى بۇرىنعى تاز كەپەشىن قايتا كيدى...

سەنبەسەڭىز، مىنە، سالىستىرىپ كورىڭىز.

ءبىرىنشى، 2011 جىلعى «جاڭاوزەن وقيعاسى» كەزىندە تيمۋر قۇلىباەۆ: «ەگەر ەرەۋىلشىلەردىڭ جەتەكشىلەرى تۋرالى ايتاتىن بولساق، ول جاقتا الماتىدان بارعاندار جەتەكشىلىك ەتىپ جۇرگەن جوق. ولاردا وزدەرىنىڭ قاراقالپاقستاننان بىرگە كەلگەن رەسمي ەمەس جەتەكشىلەرى بار. ول جاققا كەلەتىن ادامدار سانىن باياعىدا-اق شەكتەۋ كەرەك ەدى...»، - دەسە;

2021 جىلعى «قاڭتار وقيعاسى» كەزىندە قازىرگى دەپۋتات ابزال قۇسپان: «…ۇستالعانداردىڭ اراسىندا قىتايدان كەلگەن قانداس اعايىندار كوپتەپ كەزدەستى…»، - دەدى.

بىراق، ابزال قۇسپان سول قىتايدان كەلگەن قانداس اعايىنداردىڭ نە سەبەپتى قامالعانىن جانە ولاردىڭ سانى قانشا ەكەنىن اشىق ايتقان ەمەس. ءىس جۇزىندە، ابزال قۇسپان تيمۋر قۇلىباەۆتىڭ ءسوزىن قايتالادى.

ەكىنشى، 2013 جىلى جەلتوقسان ايىندا تيمۋر قۇلىباەۆ پەن كارىم ءماسىموۆتىڭ ىقپالىمەن شەتتەن ورالعان قانداستارعى ءتورت جىلسىز ازاماتتىق بەرىلمەيتىن قاتاڭ زاڭ قابىلدانسا;

2022 جىلى 5 قىركۇيەكتە ەڭبەك جانە حالىقتى الەۋمەتتىك قورعاۋ مينيسترلىگى شەتتەن كەلگەن ەتنيكالىق قازاقتارعا ۇكىمەت ايقىنداعان وڭىرلەردە بەس جىل تۇرعان سوڭ بارىپ ازاماتتىق بەرىلەتىن ەتىپ جاسالعان «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسىن» جاريالادى.

ءۇشىنشى، 2010 جىلعى قىزىلاعاشتاعى سۋ تاسقىن كەزىندە تۇڭعىش پرەزيدەنت نۇرسۇلتان نازارباەۆ: «مەنىڭ بىلۋىمشە، سول اۋىلداعى سۋ استىندا قالعان ەلدىڭ جارتىسىنا جۋىعى – سىرتتان كەلگەن قانداستارىمىز. قازاقستان – ءوز قانداستارىن، ورالمانداردى الىپ كەلىپ جاتقان الەمدەگى بىردەن-ءبىر ەل. مەملەكەتتەن قاراجات شىعارىپ، شاقىرىپ، تارىداي شاشىراپ كەتكەن قازاعىمىزدىڭ باسىن قوسايىق دەپ مەن كوپ شارۋا جاساپ جاتىرمىن. ول ازاماتتار، ارينە، قازاقستانعا ءالى ەڭبەگى سىڭگەن جوق. قازاقستاننىڭ بۇگىنگى وركەندەپ-وسكەنىنە ولاردىڭ ەشقانداي ەڭبەگى جوق…»، -دەسە;

2025 جىلعى 3 قاڭتاردا «انا ءتىلى» گازەتىنە بەرگەن سۇحباتىندا قازىرگى پرەزيدەنتىمىز قاسىم-جومارت توقاەۆ: «وسى وقيعاعا قاتىسى بار ازاماتتار بويىنشا مىنا ماسەلەنى ەسكە سالعىم كەلەدى. قازاق حالقى شەتەلدەن كەلگەن وتانداستارىن «قانداسىم» دەپ، قۇشاق جايا قارسى الدى. تاريحي وتانىنا ورالعاندار قازاقستاننىڭ زاڭدارىنا قاتاڭ باعىنىپ، قوعامدىق ءتارتىپتى ساقتاپ، زاڭسىز ارەكەتتەردەن اۋلاق بولۋى كەرەك. ولار بۇرىن وزدەرى تۇرعان ەلدە بيلىكتىڭ تالابىن ساقتاپ، ونداي ارەكەت جاساعان جوق قوي؟!»، - دەدى.

ءتورتىنشى، 2012 جىلى «ەگەمەن قازاقستان» گازەتى اكتسيونەرلىك قوعامىنىڭ سول كەزدەگى پرەزيدەنتى ساۋىتبەك ابدراحمانوۆ ورىنباسارىنا شەتتەن ورالعان قازاقتار تۋرالى «ءوز ەلىندە ءوزى قوناق بولعىسى كەلەتىن ورالمان اعايىنداردىڭ ويلاعاندارى نە؟» دەگەن ماقالا جازدىرىپ، ونى ءوزى باسقارىپ وتىرعان باس گازەتكە باستىرىپ، الىستان كەلگەن اعايىندى: «ءبىز بۇل جەردە تيەسىلى كۆوتانى الىپ، سوعان سايكەس بەلگىلى ءبىر جەڭىلدىكتەردى پايدالانىپ، ارتىنشا كەلگەن جاقتارىنا قايتادان قاشىپ كەتكەن قازاقتار تۋرالى ءتىپتى ايتىپ تا وتىرعان جوقپىز...», - دەپ قارالاتسا;

جاقىندا سول ساۋىتبەك ابدراحمانوۆتىڭ ورنىندا وتىرعان ديحان قامزابەكۇلى «Abay.live» يۋتۋب ارناسىنا سۇحبات بەرىپ، «شەتتەن كەلگەن اعايىننىڭ ءبىرازى ماڭگى، كەشىرىڭىزدەر، ورالماننىڭ رولىندە جۇرگىسى كەلەدى...», - دەپ جالا جاپقانىن بۇكىل جۇرت ەستىدى...

قۇرمەتتى ەرلان تىنىمبايۇلى!

ءوزىڭىز دە وقىپ، ويلانىپ قالعان بولارسىز، ءوزىنىڭ تۋعان حالقى تۋرالى بىرىنەن-ءبىرى اۋمايتىن قارالاۋلار مەن ۇلى كوشتى توقتاتۋ ءۇشىن الدىڭعىسىن سوڭعىسى سول بەتى قايتالاعان بۇل ارەكەتتىڭ تۇپكى ماقساتى ايتپاسا دا تۇسىنىكتى شىعار دەپ ويلايمىن.

ءبىر عاجابى، وسىدان ون بەس جىل بۇرىن ماڭعولياعا جاي ەتنوگراف رەتىندە ساپارلاي بارىپ، شەتتەگى قازاقتار تۋرالى: «موڭعوليا مەن قىتايدا تۇرىپ جاتقان قازاقتار ەلدەن تىس ءومىر ءسۇرىپ جاتقان سياقتى سەزىلەدى. الايدا، ءداستۇر مەن ۇلتتىق قۇندىلىقتاردىڭ فورمالارى ەلدەن گورى سول «ەلدەن تىس» جەردە ءومىر ءسۇرىپ جاتقان قازاقتاردا جاقسى ساقتالعان. بۇل - كوپتەگەن ۇلتتاردىڭ تابيعي بولمىسىندا كەزدەسە بەرمەيتىن ەرەكشە قۇبىلىس. ءبىز ادەتتە ولاردى «ەلدەن تىس» جەردە تۇرىپ جاتىر دەپ سانايمىز. بىراق ناعىز قازاقى وي، قازاقى ءفالساپا سولاردىڭ اراسىندا بارىنشا دامىعان...»، - دەپ، اۋزىنىڭ سۋى قۇرىپ كەلگەن ەرلان قارين مىرزا بۇگىن مەملەكەتتىك كەڭەسشى بولىپ وتىرىپ، سول ءوزى بارىپ داستارحانىنان ءدام تاتقان قانداستارى تۋرالى ادام توزگىسىز قارالاۋلار مەن جالالاۋلار ايتىلىپ جاتقاندا ءبىر اۋىز ءسوز ايتىپ، اراشا تۇسە الماعانى – مەنى قاتتى تاڭ قالدىرىپ وتىر.

ارينە، مەن بۇل جەردە ەكى پرەزيدەنتتى دە كىنالاۋدان مۇلدە اۋلاقپىن. ەكەۋىنە دە قانداستارى تۋرالى ناقتى اقپارات جەتپەگەن.

تۇڭعىش پرەزيدەنت ءوزىنىڭ اينالاسىنداعى ازازىلدەرگە الدانعانىن تەز ءبىلىپ، كوشى-قون زاڭىن تەز قالپىنا كەلتىرىپ، قانداستارى تۋرالى تاماشا تاريحي شەشىمدەر قابىلداپ كەتكەنى تۋرالى ۇنەمى ايتىپ تا، جازىپ تا كەلەمىن.

ال، كەشە عانا «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز!» دەپ، قۇشاعىن ايقارا اشىپ وتىرعان قاسىم-جومارت كەمەلۇلىنا دا اناۋ كەرمەك ءسوزدى ايتقىزعان – سول ءبىر جاقتىلى اقپارات  ەكەنى داۋسىز!

نە ءۇشىن «ءبىر جاقتىلى اقپارات» دەپ وتىرمىز؟!

تاعى قايتالاپ ايتامىن، «تالعار وقيعاسى» جانە وسى وقيعانىڭ «باس كەيىپكەرى» بولعان قارجاۋباي نۇرىموۆ پەن ونىڭ قارىنداسى باقىت رەيموۆا تۋرالى قاسىم-جومارت كەمەلۇلىنا مۇلدە ناقتى اقپارات جەتپەگەنى كورىنىپ تۇر! اقورداعا باراتىن، پرەزيدەنت ءسۇيىپ وقيتىن «ەگەمەن قازاقستان» مەن «انا ءتىلى» گازەتى دۇنيەنى ءدۇر سىلكىندىرگەن وسى «تالعار وقيعاسى» مەن ونداعى ەكى بىردەي بالاسىنان ايرىلىپ قارا جامىلعان جاندار تۋرالى ءبىر اۋىز ءسوز جازباعان. تاعى قايتالاپ ايتام، ون شاقتى گازەت-جۋرنالدى ۋىسىندا ۇستاپ وتىرعان مەدياماگنات ديحان قامزابەكۇلى بىردە-ءبىر ءجۋرناليسىن جىبەرىپ، اتالعان قاندى وقيعا تۋرالى جۋرنالستىك زەرتتەۋ جۇرگىزدىرمەگەن. جۋرناليستەرىن جىبەرىپ، زارداپ شەگۋشىلەر مەن كۋاگەرلەردەن جانە قۇقىق قورعاۋشىلار مەن جەرگىلىكتى بيلىك وكىلدەرىنەن جەكە-جەكە سۇحباتتار الىپ، ولاردىڭ ءتول سوزدەرىن گازەت ارقىلى پرەزيدەنتكە جەتكىزبەگەن...

ارينە، مۇنداي جاعدايدا پرەزيدەنت تەك قۇقىق قوعاۋ ورگاندارى مەن جەرگىلىكتى اتقارۋشى بيلىكتىڭ ءبىر جاقتىلى اقپاراتىنا عانا جۇگىنۋگە ءماجبۇر بولادى. مۇمكىن، ولار پرەزيدەنتكە تەك ءوز مۇددەلەرىن قورعايتىن دەرەكتەر بەرەتىن شىعار...

بۇل تۋرالى الداعى ۋاقىتتا كولەمدى ماقالا جازىپ، ارنايى توقتالاتىن بولامىز.

قۇرمەتتى ەرلان تىنىمبايۇلى!

تاعى قايتالاپ ايتام، قازاق كوشى كارىم ءماسىموۆ زامانىنداعى بۇرىنعى تاز كەپەشىن قايتا كيدى!

قاسىم-جومارت كەمەلۇلىنىڭ پرەزيدەنت بولعاننان باستاپ، بۇگىنگە دەيىن بەرگەن تاپسىرمالارى مەن نۇسقاۋلارىنىڭ بىرەۋى ورىندالعان جوق!

ورىندالعاندى قويىپ، كەرىسىنشە، مارقۇم مۇحتار ماعاۋين ايتقانداي، تيمۋر قۇلىباەۆ پەن كارىم ءماسىموۆ باستاعان انتي-قازاق ساياسات جالعاسىپ جاتىر!

مىسالى:

- «حالىقتىڭ كوشى-قونى تۋرالى» زاڭىنداعى 2023 جىلعى 19 ساۋىردە سەنات ماقۇلداعان 20-باپتىڭ 5) تارماعى ۇكىمەت ايقىنداعان سەگىز وبلىستان وزگە توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتارعا «قانداس» مارتەبەسىن بەرىلمەيتىن ەتىپ، ولاردى قونىستاناتىن ءوڭىرىن تاڭداۋ قۇقىعىنان ايىردى، ءسويتىپ، قازاقستان رەسپۋبليكاسىنىڭ ازاماتتىعىن الۋىن شەكتەدى;

- بۇرىن بەس جۇمىس كۇنى ىشىندە بەرىلىپ كەلگەن «قانداس» مارتەبەسىن وتىز بەس كۇندە بەرىلەتىن ەتىپ، جاڭا ءتارتىپ ەنگىزدى;

- «اتا-جولى» كارتاسى جوباسىن اينالىمعا ەنگىزگەنىمەن، اتالعان كارتانى العان ەتنيكالىق قازاقتاردىڭ قۇقىقتارى مەن مىندەتتەرى زاڭمەن بەكىتىلمەگەن بولىپ شىقتى...

قۇرمەتتى ەرلان تىنىمبايۇلى!

سىزدەن وسى ماسەلەلەردى تۇگەلىمەن پرەزيدەنتىمىز قاسىم-جومارت توقاەۆتىڭ نازارىنا ۇسىنۋىڭىزدى، الدا بولاتىن ۇكىمەتىنىڭ كەڭەيتىلگەن وتىرىسىندا مەملەكەت باسشىسىنىڭ ءۇلى كوش تۋرالى جاڭا شەشىمدەر قابىلداۋىنا ىقپال ەتۋىڭىزدى سۇرايمىن.

سونداي-اق، كوشى-قون ساياساتىمەن ۇزاق جىل اينالىسىپ كەلە جاتقان بەلسەندى ازامات، تاجىريبەلى مامان رەتىندە تومەندەگى جوبالاردى ۇسىنۋدى ءجون كوردىم.

ءبىرىنشى، 2021 جىلعى 16 قاراشادا وتكەن ۇلتتىق قوعامدىق سەنىم كەڭەسىنىڭ التىنشى وتىرىسىندا قاسىم-جومارت كەمەلۇلى: «ۇلى كوش 1991 جىلى باستالدى. بۇعان ەلباسىنىڭ تاپسىرماسىمەن قازاق كسر مينيسترلەر كابينەتى قابىلداعان №711 قاۋلى رەسمي تۇردە جول اشتى. بۇل قۇجات 1991 جىلعى 18 قاراشادا قابىلداندى. كوپ ۇزاماي ەلباسى «الىستا جۇرگەن اعايىنعا اق تىلەك» اتتى جولداۋىن جاريالاپ، شەتتەگى قانداستارىمىزدى ەلگە شاقىردى. سونىڭ ناتيجەسىندە ءبىر جارىم ميلليوننان استام قازاق وتانىنا ورالدى. بۇگىندە ولار ەگەمەن ەلىمىزدى وركەندەتۋگە ءوز ۇلەسىن قوسۋدا. سولاردىڭ ىشىندە اۋىت مۇقيبەك جانە تاعى باسقا قوعام قايراتكەرلەرى ۇلى كوشتىڭ تاريحي ءرولىن ەسكەرىپ، ارنايى كۇن بەلگىلەۋ قاجەتتىگىن ايتىپ ءجۇر. ۇكىمەتكە وسى تاريحي داتانى اتاۋلى كۇندەر تىزبەسىنە قوسۋ ماسەلەسىن جان-جاقتى قاراستىرىپ، ءتيىستى ۇسىنىس ەنگىزۋدى تاپسىرامىن;»،-دەپ، 18 قاراشانى ارنايى كۇن بەلگىلەۋ تۋرالى تاپسىرما بەرىپ، ۇكىمەت ول تاپسىرمانى اياقسىز قالدىرعان بولاتىن

مەن اتالعان داتانى «ۇلى كوش كۇنى» دەگەن اتپەن اتاۋلى كۇندەردىڭ تىزبەسىنە ەندىرۋدى قايتالاي ۇسىنامىن.

ەكىنشى، ۇكىمەت بەكىتكەن «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسىنىڭ» جەمقورلىققا باعىتتالىپ جاسالعانى بەلگىلى بولدى. ەكى جىل وتپەي جاتىپ، اتالعان تۇجىرىمداما بويىنشا قونىس اۋدارۋ باعدارلاماسىنا بولىنگەن ءبىر ميللياردتان استام تەڭگەنىڭ ۇرلانعانى تۋرالى پروكۋراتۋرا اقپارات تاراتتى.

سوندىقتان، بۇل تۇجىرىمدامانىڭ كۇشىن جويىپ، كەمىندە 50 جىلعا جوسپارلانعان ۇلتتىق جوبا جاسالۋ كەرەك.

سونىمەن بىرگە، «شەگارالىق ءوڭىر تۇرعىندارىن الەۋمەتتىك قولداۋ تۋرالى» ارنايى زاڭ قابىلداۋدى، سول زاڭنىڭ اياسىندا شەگارالىق وڭىرلەردە تۇراقتى تۇراتىن ازاماتتار مەن ولاردىڭ وتباسى مۇشەلەرىنە «شەكارالىق وڭىردە تۇرادى» دەگەن وزگەشە مارتەبە (ستاتۋس) بەرىپ، ولارعا تۇراقتى تۇردە بەرىلەتىن قوسىمشا جەڭىلدىكتەر، ياعىني بازالىق كوەففيتسەنتى، ەڭ از دەگەندە، 10 اەك كولەمىندەگى تولەمدەر قاراستىرىلۋى وتىنەمىن.

سونداي-اق، شەكارادا تۇراتىنداردىڭ زەينەتاقى مەن بارلىق جاردەماقى مولشەرى جانە وندا قىزمەت ەتەتىن مۇعالىمدەر مەن دارىگەرلەردىڭ، اكىمشىلىك پەن اسكەري قىزمەتكەرلەردىڭ ەڭبەكاقسى وزگە وڭىرلەردەگىلەرمەن سالىستىرعاندا ەكى-ءۇش كوپ بولۋى ءتيىس دەپ ەسەپتەيمىن.

ونىڭ سىرتىندا، شاعىن جانە ورتا بيزنەسكە قوسىمشا كومەك رەتىندە ءوسىمسىز نەمەسە تومەن ءوسىمدى نەسيە،  قايتارىمسىز مەملەكەتتىك سۋبسيديا بەرۋدى مىندەتتەگەن ءجون.

ءۇشىنشى، اتاجۇرتىنا ورالعىسى كەلەتىن قانداستار ءۇشىن شەت ەلدەردەگى ەلشىلىكتەر مەن كونسۋلدىقتارداعى ۇزاققا سوزىلعان ۆيزا كەزەگىن بولدىرماۋ جانە دەپلومارتيالىق قىزمەتكەرلەردىڭ جۇمىسىن جەڭىلدەۋ ماقساتىندا  شەتەلدەن ءبىر ايلىق ۆيزاسىز تارتىپپەن كەلگەن ۇلتى قازاق ازاماتتارعا قازاقستاننان ءۇش جىلعا كوپ مارتەلى ۆيزا بەرۋ ءتارتىبىن ەنگىزۋ – بۇگىنگى كۇننىڭ ەڭ باستى پروبلەماسى ءارى تالابى بولىپ تۇر!

ءتورتىنشى، «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» كونستيتۋتسيالىق زاڭىنىڭ 8-بابىنداعى، جوعارىدا ايتىلعان، «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ۇلتتىق-مادەني، رۋحاني جانە تiلدiك قاجەتتەرىن قاناعاتتاندىرۋعا قامقورلىق جاسايدى، ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى.»،-دەگەن نورمانى «قازاقستان رەسپۋبليكاسىنىڭ ديپلوماتيالىق قىزمەتى تۋرالى» زاڭى مەن «حالىقتىڭ كوشى-قونى تۋرالى» زاڭىنا قاتارىنان ەنگىزۋدى ۇسىنامىن! 

بەسىنشى، «حالىقتىڭ كوشى-قونى تۋرالى» زاڭىنىڭ 3-بابىندا كوشىپ كەلۋدىڭ نەگىزگى بەس ءتۇرى كورسەتىلگەن. بىراق، اتالعان زاڭدا ءبىلىم الۋ جانە ەڭبەك قىزمەتىن جۇزەگە اسىرۋ ماقساتىندا كوشىپ كەلگىسى كەلەتىن ەتنيكالىق قازاقتاردى قازاقستاعا شاقىرۋ تەتىگى قاراستىرىلماعان. سول تەتىكتى زاڭداستىرماي بولمايدى.

التىنشى، «حالىقتىڭ كوشى-قونى تۋرالى» زاڭىنداعى 2023 جىلعى 19 ساۋىردە سەنات ماقۇلداعان 20-باپتىڭ 5) تارماعىن الىپ تاستاماسا، اتالعان نورما ۇكىمەت ايقىنداعان سەگىز وبلىستان وزگە توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتاردىڭ «قانداس» مارتەبەسىن الۋىن، قونىستاناتىن ءوڭىرىن تاڭداۋ قۇقىعىنان ءتىپتى، قازاقستان رەسپۋبليكاسىنىڭ ازاماتتىعىن الۋىن شەكتەپ وتىر.

جەتىنشى، «قانداس» مارتەبەسىن وتىز بەس كۇندە ەمەس، بۇرىنعىداي بەس جۇمىس كۇنى ىشىندە حالىققا قىزمەت كورسەتۋ ورتالىعىن بەرىلەتىن ءتارتىپتى قالپىنا كەلتىرۋ كەرەك.

سەگىزىنشى، «اتا-جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى زاڭمەن بەكىتىلمەسە، وندا اتالعان كارتا اتى بار، زاتى جوق جوبا بولىپ قالۋدا...

قۇرمەتتى ەرلان تىنىمبايۇلى!

ەگەر, شەتتەن كەلەتىن قازاقتار شىنىمەن دە رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين ايتقانداي، «ورىس ءتىلىن بىلمەيتىن قازاقستاندىقتاردىڭ دەنى – باسقا مەملەكەتتەردەن قونىس اۋدارعاندار، ياعني قانداستار ەكەنى، بۇل [جاعداي] ولاردىڭ زاماناۋي قازاقستاندىق قوعامعا تەز سىڭىسۋىنە كەدەرگى كەلتىرەتىنى، بۇل ەل بيلىگى ءۇشىن ايتارلىقتاي پروبلەمالار تۋعىزاتىنى» راس بولسا،  وندا ونى دا اشىق ايتىپ، الىستاعى اعايىندى اۋرەگە سالماي، ۇلى كوشتى توقتاتا تۇرعاندارىڭىز ءجون! 

قۇرمەتتى ەرەكە!

رەسەي ەلشىسى الەكسەي بوروداۆكيننىڭ ءسوزى مەن ونىڭ سىلتەمەسى، مىنە: 

«ورىس ءتىلىن بىلمەيتىن قازاقستاندىقتاردىڭ دەنى – باسقا مەملەكەتتەردەن قونىس اۋدارعاندار، ياعني قانداستار. بۇل ولاردىڭ زاماناۋي قازاقستاندىق قوعامعا تەز سىڭىسۋىنە كەدەرگى كەلتىرەدى، بۇل ەل بيلىگى  ءۇشىن ايتارلىقتاي پروبلەمالار تۋعىزادى»، - دەدى بوروداۆكين.

اۋىت مۇقيبەك

Abai.kz