قازاقستاندا الەۋمەتتىك جەلىلەرگە «دەسترۋكتيۆتى مازمۇندى تاراتقانى ءۇشىن» جاۋاپكەرشىلىك ەنگىزىلۋى مۇمكىن. قاسىم-جومارت توقاەۆ بۇل ماسەلەنى ۇكىمەتتىڭ كەڭەيتىلگەن وتىرىسىندا قاراۋدى تاپسىردى.

مەملەكەت باسشىسى تسيفرلاندىرۋ ازاماتتار مەن مەملەكەت اراسىنداعى ءوزارا ءىس-قيمىل پروتسەسىن جەڭىلدەتەتىنىن جانە سىبايلاس جەمقورلىق تاۋەكەلدەرىن ازايتاتىنىن اتاپ ءوتتى. بىراق بۇل پروتسەستىڭ كەمشىلىگى - الاياقتىقتىڭ كوبەيۋى.

«جاپپاي تسيفرلاندىرۋ مەملەكەتتىڭ ازاماتتارمەن جانە بيزنەس وكىلدەرىمەن قارىم-قاتىناسىن ايتارلىقتاي جەڭىلدەتەدى. سونداي-اق بيۋروكراتيانى جانە سىبايلاس جەمقورلىق قاتەرلەرىن ازايتادى. بۇل – تۇسىنىكتى. الايدا تاياقتىڭ ەكى ۇشى بار، تسيفرلاندىرۋ دامىعان سايىن الاياقتىق كوبەيىپ بارادى. قوعامدىق پىكىرگە تەرىس ىقپال ەتۋ، بيلىكتىڭ بەدەلىن ءتۇسىرۋ جانە ەل ىشىندە الاۋىزدىق تۋدىرۋ ءۇشىن جالعان مالىمەت تاراتىپ، اقپاراتتىق شابۋىل جاساۋ بەلەڭ الۋدا. مۇنداي ارەكەتتەر ازاماتتاردىڭ قاۋىپسىزدىگىنە جانە ەلدەگى تۇراقتىلىققا ۇلكەن قاتەر توندىرەدى.

سوندىقتان ينتەرنەت-پلاتفورمالاردا ارانداتۋشىلىق سيپاتتاعى اقپارات تاراتقانى ءۇشىن جاۋاپكەرشىلىككە تارتۋدى زاڭمەن بەكىتۋ ماسەلەسىن ويلاستىرۋ كەرەك. بىراق كيبەرقاۋىپسىزدىكتى كۇشەيتۋ شارالارى تسيفرلاندىرۋ ۇدەرىسىنە توسقاۋىل بولماۋعا ءتيىس. قوعامدا مەملەكەتتىڭ ازاماتتاردى كيبەرالاياقتاردان قورعاۋ ءۇشىن قابىلداپ جاتقان شارالارى ناتيجەسىز دەگەن قاساڭ پىكىر قالىپتاسىپ كەلەدى. ستاتيستيكا دا كوڭىل كونشىتپەيدى. جىل سايىن 20 مىڭنان استام ينتەرنەت-الاياقتىق فاكتىسى تىركەلەدى. قىلمىستىڭ 80 پايىزعا جۋىعى اشكەرەلەنبەيدى. سوندىقتان ۇكىمەت قۇقىق قورعاۋ ورگاندارىمەن جانە قارجى سالاسىن رەتتەۋشىلەرمەن بىرگە ازاماتتاردىڭ جەكە دەرەكتەرىن قورعاۋدى مەيلىنشە قامتاماسىز ەتۋى كەرەك»، - دەدى مەملەكەت باسشىسى.

Abai.kz