31-قاڭتار، استانا ق. ماجىلىستەگى «AMANAT» پارتياسى فراكتسياسىنىڭ جيىنى بارىسىندا دەپۋتاتتار ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ ەل دامۋىنا قاتىستى بەرگەن تاپسىرمالارىن ىسكە اسىرۋ جانە زاڭنامالىق تۇرعىدا قامتاماسىز ەتۋ ماسەلەلەرىن تالقىلادى. ماجىلىسمەندەر ەل ەكونوميكاسىنىڭ ناقتى ماسەلەلەرىن شەشۋ جانە ازاماتتاردىڭ ءال-اۋقاتىن ارتتىرۋ ماقساتىندا العا قويىلعان بارلىق ماقسات-مىندەتتىڭ ماڭىزىن اتاپ ءوتتى.

ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ پرەزيدەنت قازىرگى جاھاندىق سىن-قاتەرلەردى ەسكەرە وتىرىپ، جاڭا اۋقىمدى جاڭعىرتۋ باستاماسىن ۇسىنعانىن اتاپ ءوتتى. وندا ءىرى ينفراقۇرىلىمدىق جوبالار، تسيفرلاندىرۋ جانە جاساندى ينتەللەكت، اتوم ەنەرگەتيكاسىن دامىتۋ، اوك-ءتى نىعايتۋ، ينۆەستيتسيا تارتۋ ماسەلەلەرى قامتىلدى.

«پرەزيدەنت ۇسىنعان رەفورمالار ەكونوميكاداعى جانە وزگە دە سالالارداعى بۇرىننان بار ماسەلەلەردى شەشۋگە مۇمكىندىك بەرەدى. «AMANAT» پارتياسى ەلىمىزدىڭ جەتەكشى ساياسي كۇشى رەتىندە مەملەكەت باسشىسىنىڭ بارلىق تاپسىرماسىن جۇيەلى جۇزەگە اسىرۋدىڭ قوزعاۋشى كۇشىنە اينالۋعا ءتيىس. ونىڭ ءبارى ازاماتتاردىڭ تۇرمىسىن جاقسارتۋعا باعىتتالعان. ءبىز رەفورمالاردىڭ ىلگەرى باستايتىن قادام ەكەنىن قوعامعا دۇرىس جەتكىزىپ، قازاقستاندىقتاردى قاسىم-جومارت توقاەۆ ۇستانعان باعىت توڭىرەگىندە توپتاستىرۋىمىز كەرەك»، – دەدى ول.

سونداي-اق «AMANAT» پارتياسىنىڭ توراعاسى ۇكىمەتتىڭ ققس مولشەرلەمەسىن ارتتىرۋ جانە ونى قولدانۋ شەگىن تومەندەتۋ جونىندەگى ۇسىنىسى اياسىندا جاڭا سالىق كودەكسىن ازىرلەۋ بويىنشا اتقارىلىپ جاتقان جۇمىس تاسىلدەرىنە ەگجەي-تەگجەيلى توقتالدى. بەيىندى كوميتەت حالىقارالىق تاجىريبەنى، سونداي-اق ونىڭ ەكونوميكا مەن بيزنەس-ورتاعا اسەرىن سارالاي وتىرىپ، وسى نورمالار بويىنشا ناقتى ۇستانىم ازىرلەۋگە ءتيىس.

سونىمەن قاتار قىسقا مەرزىمدە دەپۋتاتتار جەر قويناۋىن پايدالانۋشىلار ءۇشىن تۇسىنىكتى جانە اشىق زاڭنامالىق نەگىز قۇرۋ، ەكونوميكانى ءارتاراپتاندىرۋ، ينفراقۇرىلىمدى، ەنەرگەتيكا مەن اۋىل شارۋاشىلىعىن دامىتۋ جونىندە شارالار قابىلداۋى كەرەك. بۇل قادام ەلىمىزگە شەتەل ينۆەستيتسياسىن تارتۋعا جانە قوسىمشا جۇمىس ورىندارىن قۇرۋعا جول اشادى.

بۇعان قوسا، ەرلان قوشانوۆ اكىمدەر كورپۋسى اتقاراتىن جۇمىستىڭ تيىمدىلىگىن ارتتىرۋ ماسەلەسىنە باسا نازار اۋداردى.

«مەملەكەت باسشىسى سايلانعان اكىمدەر مەن ءتۇرلى دەڭگەيدەگى باسشىلاردى كەشەندى دايىندىقتان وتكىزۋدىڭ ماڭىزىن اتاپ ءوتتى. پرەزيدەنت «اكىمدەر مەكتەبى» وقىتۋ جوباسىن ىسكە قوسۋدى تاپسىردى. سونىمەن قاتار، ول وسىنداي جۇمىس جۇرگىزىپ جاتقان «اMANAT» پارتياسىنىڭ تاجىريبەسىن ەرەكشە اتاپ ءوتتى. سايلانعان اكىمدەر سايلاۋشىلاردىڭ سەنىمىن اقتاۋعا، اتقارۋشى بيلىك جۇيەسىندە جۇمىس ىستەۋ ءۇشىن قاجەتتى قۇزىرەتكە يە بولۋعا ءتيىس. پارتيا ۇكىمەتپەن بىرگە وسى مىندەتتى ورىنداۋعا دايىن»، – دەدى ەرلان قوشانوۆ.

جيىن بارىسىندا پرەزيدەنت تاپسىرمالارىن جۇيەلى جۇزەگە اسىرۋ ىسىنە قاتىستى پارتيا فراكتسياسىنىڭ مۇشەلەرى دە ءسوز سويلەدى. نۇرتاي سابيليانوۆ ينۆەستيتسيالىق احۋالدى جاقسارتۋ جونىندەگى شارالار تۋرالى باياندادى، اسحات ايماعامبەتوۆ ءمامس جۇيەسىن جاڭعىرتۋ جانە ءبىلىم بەرۋ سالاسىن ودان ءارى دامىتۋ ماسەلەسىنە توقتالدى، ەرلان سايروۆ الەمدىك ساياساتتاعى وزگەرىستەرگە بەيىمدەلۋگە جانە پرەزيدەنت تاپسىرمالارىن ىسكە اسىرۋ جونىندەگى جۇمىسقا قوعامدى بارىنشا كوپ تارتۋعا شاقىردى. ءوز كەزەگىندە بولاتبەك ناجمەتدينۇلى اۋىل شارۋاشىلىعىندا بارىنشا ءتيىمدى داقىلداردى وسىرۋگە باسىمدىق بەرىلۋى كەرەك ەكەنىن جەتكىزدى، دۇيسەنباي تۇرعانوۆ ەلىمىزدە بىرنەشە اەس سالۋدىڭ ماڭىزىن اتاپ ءوتتى، تاتيانا ساۆەلەۆا ءتيىمسىز شىعىنداردى وڭتايلاندىرۋعا جانە بيۋدجەت قاراجاتىن تولىق ۇنەمدەۋ قاعيداتىنا كوشۋگە توقتالدى.

جيىندى قورىتىندىلاي كەلە، ءماجىلىس سپيكەرى ەرلان قوشانوۆ «AMANAT» فراكتسياسى پرەزيدەنت العا قويعان مىندەتتەردى ىسكە اسىرۋعا قۇقىقتىق نەگىز بولاتىن زاڭداردىڭ ۋاقتىلى ءارى ساپالى ازىرلەنۋىن قامتاماسىز ەتۋگە ءتيىس ەكەنىن اتاپ ءوتتى. بارلىق زاڭ قوعامنىڭ ۇستانىمىن جانە ەكونوميكاداعى پروبلەمالاردى ناقتى شەشۋدى ەسكەرە وتىرىپ قابىلدانۋى كەرەك. بۇل دەپۋتاتتاردىڭ حالىق پەن مەملەكەت باسشىسى الدىنداعى تىكەلەي جاۋاپكەرشىلىگى.

 «AMANAT» پارتياسىنىڭ ءباسپاسوز قىزمەتى

سۋرەتتى تۇسىرگەن ءالي عالىم

Abai.kz