مادەنيەت جانە اقپارات ءمينيسترى ايدا بالاەۆا الەۋمەتتىك جەلى قولدانۋشىلارىنان ويلانباي ارەكەت ەتپەۋدى، سونداي-اق زاڭ تالاپتارىنا سايكەس ونلاين-پلاتفورمانىڭ بۇعاتتالۋى مۇمكىن جازبالار مەن پىكىرلەر قالدىرماۋدى سۇرادى. بۇل تۋرالى مينيستر Facebook-تەگى پاراقشاسىندا جازدى.

بالاەۆانىڭ سوزىنشە، قازىرگى ۋاقىتتا ينتەرنەت كەڭىستىگىندە بىرقاتار وزەكتى ماسەلەلەر قىزۋ تالقىلانۋدا. مونيتورينگ كورسەتكەندەي، ونلاين-پلاتفورمالاردا كوبىنەسە زاڭعا قايشى، قاراپايىم تىلمەن ايتقاندا، شىندىققا جاناسپايتىن اقپارات ءجيى تارالادى.

«وسىعان بايلانىستى جەلىلىك رەسۋرستاردىڭ اكىمشىلەرىن جاڭالىقتار اعىنىن مۇقيات قاداعالاپ، راستالماعان اقپاراتتىڭ تارالۋىنا جول بەرمەۋگە جانە زاڭعا قايشى كونتەنتتى جويۋعا شاقىرامىن. الەۋمەتتىك جەلى قولدانۋشىلارىنان دا ويلانباي ارەكەت ەتپەۋدى، سونداي-اق زاڭ تالاپتارىنا سايكەس ونلاين-پلاتفورمانىڭ بۇعاتتالۋى مۇمكىن جازبالار مەن پىكىرلەر قالدىرماۋدى سۇرايمىن.

ميلليونداعان ازامات جاڭالىقتاردى ونلاين پلاتفورمالاردان الاتىنىن ەسكەرە وتىرىپ، ءبىزدىڭ مينيسترلىك تىيىم سالۋ شارالارىنا سيرەك جۇگىنەتىنىن اتاپ وتكىم كەلەدى. دەگەنمەن، جەلىلىك رەسۋرستاردىڭ اكىمشىلەرى دە ءوز ارەكەتتەرىنىڭ سالدارىن ءتۇسىنىپ، اقپارات تاراتۋدا ەڭ الدىمەن وقىرمان مەن قوعام الدىنداعى جاۋاپكەرشىلىكتى ءجىتى ۇعىنۋعا ءتيىس», - دەپ جازدى مينيستر.

ايدا بالاەۆانىڭ مالىمەتىنشە، تاتيستيكاعا سۇيەنسەك، 2023-جىلدان 2024-جىلعا دەيىنگى ارالىقتا قازاقستان ينتەرنەت سەگمەنتىندە انىقتالعان زاڭعا قايشى كونتەنت كولەمى ەكى ەسە ءوسىپ، 116 354 ماتەريالعا جەتتى. ەڭ كوپ تارالعان زاڭبۇزۋشىلىقتار قاتارىندا – تەرروريزمدى، ءدىني ەكسترەميزمدى جانە ەسىرتكى قۇرالدارىن ناسيحاتتاۋ، ونلاين-كازينو مەن قارجى پيراميدالارىن جارنامالاۋ بار.

وتكەن جىلى ونلاين-پلاتفورمالاردا 78 539 زاڭعا قايشى ماتەريال انىقتالىپ، ونىڭ 24,3%-ى جويىلدى.

«دوستار، كەز كەلگەن مەملەكەتتىڭ تۇراقتىلىعىن قامتاماسىز ەتەتىن باستى فاكتورلار – اۋىزبىرشىلىك پەن ىنتىماق. سوندىقتان ءبارىمىز مەملەكەت باسشىسى اتاپ وتكەندەي، ناعىز قۇقىقتىق مەملەكەت قالىپتاستىرۋدىڭ باستى كىلتى سانالاتىن زاڭ مەن ءتارتىپ قاعيداتىن بەرىك ۇستانۋىمىز قاجەت», - دەپ قورىتىندىلادى مادەنيەت جانە اقپارات ءمينيسترى.

Abai.kz