27 اقپاننان باستاپ «بولماعان بالالىق شاق» ءفيلمى بارلىق كينوتەاترلاردا كورسەتىلە باستايدى.

«بولماعان بالالىق شاق» – تانىمال اقىن، قازاقستان جازۋشىلار وداعىنىڭ مۇشەسى، قر «دارىن» جاستار سىيلىعىنىڭ يەگەرى اقبەرەن ەلگەزەكتىڭ كەيىنگى جىلدارى بەستسەللەرگە اينالعان تۋىندىسى «بولماعان بالالىق شاق» شىعارماسىنىڭ جەلىسى بويىنشا تۇسىرىلگەن درامالىق فيلم.

شىنايى وقيعاعا نەگىزدەلگەن بۇل تۋىندى بالالىق شاعىنان اۋىر تاعدىردىڭ سىناعىنا تۇسكەن كەيىپكەردىڭ ءومىرىن سۋرەتتەيدى. باستى كەيىپكەر قيىندىقتار مەن ادىلەتسىزدىككە قاراماستان، ءوز جولىن تابۋعا جانە ادامدىق قاسيەتتەرىن ساقتاۋعا تىرىسادى.

فيلمدە «بولماعان بالالىق شاق» شىعارماسىنداعى وقيعالارعا نەگىزدەلگەن سيۋجەتتەر كورىنىس تاپقان. وقيعانىڭ شىنايىلىعى مەن كەيىپكەرلەردىڭ تەرەڭ پسيحولوگيالىق بەينەسى كورەرمەنگە ۇلكەن اسەر سىيلايدى.

سۋرەت: ايدىن ساحامان

ءفيلمنىڭ باس پروديۋسەرى اۆتوردىڭ ءوزى – اقبەرەن ەلگەزەك، رەجيسسەرى – ايدىن ساحامان، ستسەناريىن جازعان – ەفرات ءشارىپوۆ. كينوتۋىندى 27 اقپاننان باستاپ قازاقستاننىڭ بارلىق كينوتەاترلارىندا كورسەتىلە باستايدى. فيلمدەگى باستى رولدەردى ەرلان ءبىلال، بەرىك ايتجانوۆ، ءاشىم احمەتوۆ پەن جاس اكتەر شاكارىم الماسبەك وينادى.

ايتا كەتۋ كەرەك، اقبەرەن ەلگەزەكتىڭ «بولماعان بالالىق شاق» شىعارماسى قازاق ادەبيەتىنە ۇلكەن جاڭالىق بولىپ ەنگەن تۋىندىلاردىڭ ءبىرى. بۇگىندە كىتاپ ناعىز بەستسەللەرگە اينالىپ، قالىڭ وقىرمانعا 40 000 – نان استام داناسى تارالعان. قازاق ادەبيەتىندە كوركەم شىعارمانىڭ ءدال وسىنداي اۋقىمدى كورسەتكىشپەن تارالۋى ايرىقشا قۇبىلىس. سونىمەن قاتار بۇل شىعارما جەكە اۆتوردان الەمدىك Amazon پلاتفورماسىندا جانە اقش-تاعى تانىمال تاريحي Barnes & Noble ينتەرنەت-كىتاپ دۇكەنىندە، AppStore, Playmarket پلاتفورمالارىندا ساتىلىپ جاتقان تۇڭعىش كىتاپ. جۋىردا اتالعان تۋىندىنىڭ اۋديونۇسقاسى ايگىلى Audiobooks پلاتفورماسىندا جارىق كورگەلى جاتىر. كىتاپتىڭ باشقۇرت تىلىندەگى نۇسقاسى باشقۇرتستان رەسپۋبليكاسىندا جىلدىڭ ۇزدىك پروزاسى رەتىندە تانىلدى. سونىمەن قاتار شىعارما قىرعىز، وزبەك تىلدەرىنە اۋدارىلۋدا. وسىلايشا شىعارما كوركەم ادەبي تۋىندى رەتىندە كەڭ تارالىپ، قالىڭ وقىرماننىڭ، ونىڭ ىشىندە ورتا ازيا كىتاپسۇيەرلەرىنىڭ سۇيىكتى كىتابىنا اينالدى.

سۋرەت: ايدىن ساحامان

شىعارما قازاقستاننىڭ ءۇش بىردەي تەاترىندا ساحنالانىپ تەاتر كورەرمەندەرىنىڭ دە ىقىلاسىنا بولەنگەنىن دە ايتا كەتكەن ءجون. بارلىق تەاترلاردا شىعارمانىڭ ءار قويىلىمى انشلاگپەن ءوتتى. تانىمال اقىننىڭ شىنايى ومىردەن الىنعان بالالىق شاق جايلى شىعارماسى اۋەلى كوركەم ادەبيەتكە اينالىپ، بەستسەللەرلەر قاتارىنان كورىنسە، كەيىننەن تەاتر تۋىندىسى رەتىندە ءوز كورەرمەنىن تاپتى. ال بۇگىندە تانىمال شىعارما ەكرانيزاتسيالانىپ، وتاندىق كينو الەمىنە ساپارىن باستادى. سۇيىكتى شىعارمالارىن تەاتردان كورگەن كوزى قاراقتى كورەرمەن «بولماعان بالالىق شاقتى» ەندى ەل كينوتەاترلارىنان تاماشالاماق.

دەرەككوزى: جاس الاش سايتى

Abai.kz