شىعارماشىلىق قاۋىم مەملەكەت قولداۋىن سەزىنىپ كەلەدى
بۇگىن قر مادەنيەت جانە اقپارات مينيسترلىگىنىڭ كەڭەيتىلگەن القا وتىرىسى ءوتتى. جيىندا قازاقستان جازۋشىلار وداعىنىڭ توراعاسى مەرەكە قۇلكەنوۆ سويلەپ، ەلىمىزدەگى شىعارماشىلىق قاۋىمعا مەملەكەت تاراپىنان قانداي قولداۋلار كورسەتىلىپ جاتقانىن ايتتى.
«قازاقستاننىڭ مادەنيەت سالاسىن باسقارعان تۇلعالاردىڭ ءبارى – تەمىربەك جۇرگەنوۆتەن باستاپ ءبىرازى كوپ ەڭبەك ءسىڭىردى. سول مادەنيەتىمىزگە قازىر ايدا عالىمقىزى دا كوپ جۇمىس اتقارىپ جاتىر. ونى نە ءۇشىن ايتىپ وتىرمىن؟! بىلتىر 13 جەلتوقساندا جازۋشىلار وداعىنىڭ 90 جىلدىق مەرەيتويىن وتكىزدىك. كوپشىلىك بۇل جيىننىڭ جوعارى دەڭگەيدە وتكەنىن ايتىپ جاتىر. بۇل جيىنعا تمد ەلدەرىنىڭ بارىنەن جازۋشىلار قاتىسىپ، ريزا بولىپ قايتتى. ەگەر مادەنيەت مينيسترلىگى، الماتى قالاسى اكىمدىگى قولداۋ بىلدىرمەسە، وداقتىڭ 90 جىلدىعى وتپەس ەدى. مەن ىلعي ايتامىن: ءبىزدىڭ شىعارماشىلىق ۇيىمدار مەملەكەت باسشىسىنىڭ، ۇكىمەتتىڭ، سونىڭ ىشىندە مادەنيەت مينيسترلىگىنىڭ قولداۋىن ۇنەمى سەزىنىپ كەلە جاتىر. سوندىقتان، شىعارماشىلىق ۇيىمدار ۇكىمەتكە، سونىڭ ىشىندە ءوزىنىڭ مينيسترلىگىنە (مادەنيەت جانە اقپارات مينيسترلىگى – رەد.) كۇمانمەن قاراماۋى كەرەك.
بىلتىر بىرقاتار ونەر ادامىنا مەملەكەتتىك سىيلىق تابىستالدى. سوندا العاندار قۋانىپ، الماعاندار ايعاي شىعاردى. ارتىق سوزدەر ايتىلدى. سىيلىق دەگەن – جارىس. ەڭ مىقتى دۇنيەلەر عانا ماراپات الادى. ادەبيەت سالاسى بويىنشا ەكى قالامگەرىمىز مەملەكەتتىك سىيلىق يەگەرى بولدى: ءبىرى – سۆەتقالي نۇرجانوۆ، ءبىرى – قۇلبەك ەرگوبەك. ەكەۋى دە لايىقتى ادام. ەندەشە، نەگە بۇل ماراپاتتى الماعان ادامدار ولارعا كۇمانمەن قارايدى؟ نەگە قۋانبايمىز، نەگە ماراپات يەلەرىن قۇتتىقتامايمىز؟! تاڭعالاتىن تاعى ءبىر نارسە، كينەماتوگرافيا، تەاتر سالاسىنداعى كەيبىر ادامدار مىقتى-مىقتى تۇلعالاردىڭ قولىن قويدىرىپ، مەملەكەتكە قىزمەت ەتىپ جۇرگەن ادامداردىڭ ۇستىنەن پرەزيدەنتكە حات جازادى. مىنە، وسىنى توقتاتۋ كەرەك. ءتىپتى، حاتتى وقىماي قول قوياتىندار بار. بىرەۋدى وسىلاي ناحاقتان قارالاۋعا بولا ما؟ سوندىقتان، پرەزيدەنتكە، ۇكىمەتكە، مينيستر اتىنا جازىلعان حاتقا قول قوياردا وعان بايىپپەن قاراۋ كەرەك.
بىزدە مادەنيەت سالاسىنىڭ جۇمىسى جولعا قويىلدى. وبلىستىق مادەنيەت باسقارمالارىنىڭ جۇمىسىنا قازاق جازۋشىلارىنىڭ كەز كەلگەنى ريزا!
ءاربىر وبلىستا جازۋشىلار بار. سولار جەرگىلىكتى اكىمدىكتىڭ، مادەنيەت مينيسترلىگىنىڭ قامقورلىعىن كورىپ وتىر. ءتىپتى، بۇرىن-سوڭدى بولماعان قولداۋىن سەزىنىپ وتىر. اربىرىنە ستيپەنديا تاعايىندالىپ، ارقايسىنىڭ كىتابىن شىعارىپ بەرۋگە تىرىسىپ جاتىر. سونداي قامقورلىقتى كورمەۋ، كورگىسى كەلمەۋ دۇرىس ەمەس دەپ ويلايمىن.
مادەنيەتىمىز قاي جاعىنان بولسىن جاقسى دامىپ كەلە جاتىر. ءوزىم ساناپ شىقتىم، بىلتىر رەسپۋبليكامىزدا 5-6 مارتە تەاترلار فەستيۆالى ءوتتى. شىعىس قازاقستاندا، الماتى وبلىسىندا، ماڭعىستاۋدا، اتىراۋدا فەستيۆالدەر ءوتىپ، وعان قاتىسقان تەاتر ۇجىمدارى جۇلدەلى بولىپ، قۋانىپ قايتتى. ويتكەنى، پرەزيدەنتىمىز مادەنيەتكە ەرەكشە كوڭىل ءبولىپ وتىر. قازىر ءبىزدى باسقارىپ وتىرعان مادەنيەت جانە اقپارات ءمينيسترى ايدا عالىمقىزى كەز كەلگەن جازۋشى مەن ونىڭ شىعارماسىن بىلەدى. كەز كەلگەن تەاتر ادامىمەن، وپەرا انشىسىمەن سويلەسە الادى. ونداي ادامدى قادىرلەۋىمىز كەرەك. وسىلاي جۇمىس ىستەپ جاتقان ادامعا شامامىز كەلگەنشە كومەكتەسۋگە تىرىسۋىمىز كەرەك»، - دەدى مەرەكە قۇلكەنوۆ.
جازۋشىلار وداعىنىڭ توراعاسى ەلىمىزدە كىتاپ شىعارۋ جۇمىسى دا جولعا قويىلعانىن، سونداي اق وعان مەملەكەت تاراپىنان نەندەي قولداۋلار كورسەتىلىپ جاتقانىن ايتتى.
«ەلىمىزدە وتە ساپالى، مازمۇندى كىتاپتار شىعىپ جاتىر. ءتىپتى، اراسىندا «حالتۋرا» كىتاپتار دا بار. بۇل رەتتە جازۋشىلار وداعى دا بەلسەندى جۇمىس ىستەپ، تەك ساپالى كىتاپتاردىڭ شىعۋىنا اتسالىسۋى كەرەك دەپ ويلايمىن. وبلىستاعى مادەنيەت باسقارمالارى بىرىگىپ جۇمىس ىستەۋگە كومەكتەسۋى كەرەك. وسى رەتتە اقتوبە وبلىسىنىڭ مادەنيەت باسقارماسى باسقالارعا ۇلگى كورسەتىپ وتىر. جىل سايىن 10 جازۋشى ميلليون تەڭگەدەن قالاماقى الىپ وتىر. ونى قازىر جامبىل مەن الماتى وبلىستارى دا قولداپ كەتتى. نەگە دەيسىز عوي؟ ويتكەنى، ءبىزدىڭ مادەنيەتىمىز ءوسىپ كەلە جاتىر. وسى سالانى باسقارىپ وتىرعاندار مادەنيەت پەن ادەبيەتتىڭ نە ەكەنىنە باسقاشا قارايتىن بولدى. مۇمكىندىگىنشە جەرگىلىكتى تالانتتارعا قولداۋ كورسەتۋگە تىرىسىپ جاتىر. بۇل قازاق دەگەن حالىقتىڭ مادەنيەتى وسكەنىن بىلدىرەدى.
قازىر وبلىستاردا بيۋدجەت ءوستى. ونىڭ ىشىندە مادەنيەت سالاسىندا جۇمىس ىستەيتىن ازاماتتارعا قولداۋ دا ارتتى. كىتاپحاناشىلاردىڭ دا جاعدايى دۇرىستالدى دەپ ويلايمىن. تاۋلىك بويى جۇمىس ىستەيتىن كىتاپحانالاردا كىتاپتان باس الماي وتىرعان جاستاردىڭ دا قاتارى كوبەيدى»، - دەدى جازۋشىلار وداعىنىڭ توراعاسى.
Abai.kz
