"پرەزيدەنت بولسام ۋكراينا-رەسەي سوعىسىن 24 ساعاتتا توقتاتام" دەگەن ۋادەسى ءالى ورىندالماعان ترامپتىڭ كرەمل قوجايىنى پۋتينمەن ەكى ساعاتقا جۋىق سويلەسكەنى، ەكەۋارا اڭگىمەنى "ۇزاق ءارى تۇبەگەيلى" دەپ باعالاعان مالىمدەمەسى ەۋروپانى ءدۇر سىلكىندىردى. كارى قۇرلىق باسشىلارى، فرانتسيا، يسپانيا، گەرمانيا سىترقى ىستە مينيسترلەرى سارسەنبى كۇنى پارجدە ەۋروپا مەن كيەۆ تاراپتىڭ قاتىسۋىنسىز وتكەن كەلىسسوزدەن وڭدى ناتيجە كۇتۋدىڭ ارتىق ەكەنىن مالىمدەدى. ترامپپەن سويلەسكەن زەلەنسكيدىڭ ء"بىز بەيبىتشىلىك ورناتۋ مۇمكىندىگىن، رەسەيمەن كەلىسسوزدەر وتكىزۋدىڭ العاشقى قادامدارىن تالقىلادىق" دەگەنىنە قاراماي قاتقىل مالىمدەمەلەر جاساۋدا.

فرانتسيا سىرتقى ىستەر باسشىسى باررو: "ۋكراينانى تاركى ەتۋ، تىزە بۇگۋگە ماجبۇرلەۋ، كۇشتىلەر ءالسىزدى جۇتاتىن جابايى تابيعات زاڭدىلىعىنا ۇقسايدى. الەمدەگى ديكتاتورلار مەن كۇشتىلەرگە ءالسىز كورشىلەرىڭدى جۇتا بەر، جاۋاپكەرشىلىككە تارتىلمايسىڭ دەگەنمەن بىردەي" -  دەيدى.

ال 2012-2014 جىلدار ارالىعىندا امەريكانىڭ رەەيدەگى ەلشىسى بولعان مايكل ماكۆەلل مىرزا: "نە ءۇشىن ترامپ كومانداسى كەلىسىمگە بارماي تۇرىپ پۋتينگە سىيلىق ۇسىنادى؟ مەن ولارمەن كەلىسسوزدەر جاساسقام. ولارعا الدىن الا ەشتەڭەنى ەمەۋرىنمەن بولسا دا بەرۋگە بولمايدى" دەپ جازادى.

ونىڭ مەڭزەپ وتىرعانى اقش قورعانىس ءمينيسترى كەگسەتتىڭ كەشە ترامپتىڭ پۋتينمەن سويلەسۋىنىڭ الدىندا وتكەن ۋكراينانىڭ قاۋىپسىزدىگى تالقىلانعان جيىندا "2014-جىلدىڭ الدىنداعى شەكارانى قالپىنا كەلتىرۋ قيىن ەكەندىگى، ناتو-نىڭ ۋكراينانىڭ قاۋىپسىزدىگىنە كەپىل قولا المايتىنى" جايىندا ايتقان سوزدەرى ەكەنى ابدەن تۇسىنىكتى. ەۋرووداق باسشىلارى دا ونىڭ سوزىنە قاراپ ترامپتىڭ پۋتينمەن كەلىسىمىنىڭ استارىندا نە جاتقانىن باعامداپ وتىر.

بۇرىن  كەلىسسوزدەر تۋرالى سۇراققا ەكى ۇشتى جاۋاپ بەرەتىن پەسكوۆ تا "ترامپ ءپۋتيندى اق ۇيگە شاقىردى، ءبىز دە شاقىردىق" دەپ جەلپىنىپ وتىر. ترامپتىڭ پۋتينگە حالىقارالىق ىزدەۋ جاريالاعان گاگا سوتىن "زاڭسىز ۇيىم" دەپ سىنعا العانى تەگىن ەمەس سياقتى.

ترامپ پەن پۋتيننىڭ ۋكراينا تاراپقا قوياتىن كەلىسىم-شارتى جۇما كۇنى باستالاتىن ميۋنحەن قاۋىپسىزدىك جيىنىندا تانىستىرىلۋى مۇمكىن ەكەن.

زەلەنسكيدىڭ ورىس تارابىمەن راقايلاسۋدىڭ باستى تالابى رەتىندە ورىس اسكەرىنىڭ جاۋلاپ العان جەرلەرىنەن بۇكىلدەي شىعىپ كەتۋى ەكەنىن الدە نەشە رەت قاداپ ايتقان ەدى. ول تالاپتار ورىندالا ما، جاقىندا بەلگىلى بولادى.

Abai.kz