قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي «Jibek Joly» تەلەارناسىنا سۇحبات بەردى.

«Jibek Joly» تەلەارناسىنداعى جۋرناليست ەربولات مۇحامەدجاننىڭ «ۋادە» اۆتورلىق باعدارلاماسى اياسىندا قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي ەلىمىزدەگى سىبايلاس جەمقورلىقپەن كۇرەستىڭ وزەكتى ماسەلەلەرىن تالقىلادى.

اگەنتتىك توراعاسى سىبايلاس جەمقورلىقتىڭ سەبەپتەرى تۋرالى ايتا كەلە، بۇل قىلمىستىڭ پايداكۇنەمدىك ماقساتتا جاسالاتىنىن جانە ادامداردى اشكوزدىك جەتەلەيتىنىن اتاپ ءوتتى.

«ءاربىر قىلمىستىڭ ءوز سەبەبى بار. ال سىبايلاس جەمقورلىق ىستەرىندە بۇل – پايداكۇنەمدىك. ادامداردى اشكوزدىك باسقارادى»، – دەدى اسحات جۇماعالي.
«پارا الاتىن شەنەۋنىكتەردى اشكوزدىك جەتەلەيدى. بۇل – ادام بويىنداعى ەڭ قاۋىپتى كەمشىلىكتەردىڭ ءبىرى».

اگەنتتىك توراعاسى سىبايلاس جەمقورلىققا قارسى كۇرەس جۇيەلى كوزقاراستى تالاپ ەتەتىنىن باسا ايتتى.

«ءبىزدىڭ مىندەتىمىز – جۇيەلى ءتاسىل قالىپتاستىرۋ: ادامداردى تاربيەلەۋ، قۇقىقتىق ساۋاتتىلىقتى ارتتىرۋ، ادالدىق قاعيداتتارىن ناسيحاتتاۋ. وسىلايشا ءبىز قوعامنىڭ سىبايلاس جەمقورلىققا قارسى يممۋنيتەتىن كۇشەيتەمىز»، – دەدى ول.

اسحات جۇماعالي سىبايلاس جەمقورلىققا قارسى كۇرەستە تەك ۋاكىلەتتى ورگاندار عانا ەمەس، بارلىق مەملەكەتتىك ينستيتۋتتار، سونىڭ ىشىندە سىبايلاس جەمقورلىققا قارسى يدەولوگيانى قالىپتاستىرۋدا ماڭىزدى ءرول اتقاراتىن مادەنيەت مينيسترلىگى دە ەكەنىن دە اتاپ ءوتتى.

«بۇل ىسكە بارلىق مەملەكەتتىك ورگاندار، سونىڭ ىشىندە مادەنيەت مينيسترلىگى دە قاتىسادى. يدەولوگيا ماسەلەسى وتە ماڭىزدى»، – دەدى ول.

اگەنتتىك توراعاسى سىبايلاس جەمقورلىق قىلمىستارى ءۇشىن قاتاڭ جازا قاراستىرىلعانىن ەسكە سالدى.

«بۇگىنگى تاڭدا اسا ءىرى كولەمدە پارا العانى ءۇشىن 15 جىلعا دەيىن باس بوستاندىعىنان ايىرۋ جازاسى قاراستىرىلعان»، – دەپ اتاپ ءوتتى ول.
«سىبايلاس جەمقورلىق ءۇشىن سوتتالعان شەنەۋنىكتەر شارتتى تۇردە مەرزىمىنەن بۇرىن بوساتۋ قۇقىعىنا يە ەمەس. سونىمەن قاتار، ولار مەملەكەتتىك قىزمەتكە جانە كۆازيمەملەكەتتىك سەكتورعا جۇمىسقا ورنالاسۋ قۇقىعىنان ءومىر بويىنا ايىرىلادى»، – دەپ تۇيىندەدى اسحات جۇماعالي.

سۇحباتقا سىلتەمە:

Abai.kz