بيىلعى جىلى ەلىمىزدە ۇلى ابايدىڭ 180 جىلدىعىمەن قاتار ۇلت رۋحانياتىنا ولشەۋسىز ۇلەس قوسقان بىرنەشە كورنەكتى تۇلعالاردىڭ مەرەيتويلارى وتەتىنى ءمالىم. ەلىمىزدىڭ تاۋەلسىزدىك جىلدارى جەتكەن جەتىستىكتەر از ەمەس. وسى جىلدار ىشىندە قازاقستان حالىقارالىق ارەنادا الەم مويىنداعان ەلگە اينالدى.

ساياسي تۇلعالارىمىزدان بولەك، مادەنيەت پەن ونەردە، سپورت پەن عىلىمدا جەتكەن جەتىستىكتەرىمىزدى ناسيحاتتاۋ، وسى ارقىلى بالاۋسا ۇرپاق ساناسىنا وتانشىلدىق تاربيە ءسىڭىرۋ – وزەكتى ماسەلە. 2025 جىل قازاقستان ءۇشىن مەرەيتويلار جىلى دەسەك قاتەلەسپەيمىز. سەبەبى بيىل: شوقان ءۋاليحانوۆتىڭ تۋعانىنا 190 جىل; اباي قۇنانبايۇلىنىڭ تۋعانىنا 180 جىل; مىرجاقىپ دۋلاتۇلىنىڭ تۋعانىنا 140 جىل; مۇستافا شوقايدىڭ تۋعانىنا 135 جىل; نارتاي بەكەجانوۆتىڭ تۋعانىنا 135 جىل; نىعمەت نۇرماقوۆتىڭ تۋعانىنا 130 جىل; ساپارعالي بەگاليننىڭ تۋعانىنا 130 جىل; ءابۋ سارسەنباەۆتىڭ تۋعانىنا 120 جىل; ءىلياس ەسەنبەرليننىڭ تۋعانىنا 120 جىل; اسقار توقماعامبەتوۆتىڭ تۋعانىنا 120 جىل ت.ب.

سونىڭ ىشىندە، ءال-فارابيدىڭ ادەبي وبرازىن سومداعان ءانۋار ءالىمجانوۆتىڭ 95 جىلدىعى، ايگىلى اقىن تۇمانباي مولداعاليەۆتىڭ 90 جىلدىعى بار. ۇلت قايراتكەرلەرىنىڭ مەرەيتويلارىن تىڭعىلىقتى اتاپ وتۋگە جاۋاپتى ورگاندار دايىندىقتى باستاپ كەتتى.

وسى رەتتە «اق جول» دەموكراتيالىق پارتياسىنىڭ توراعاسى ازات پەرۋاشەۆ ءماجىلىس مىنبەرىنەن قازاقتىڭ تاعى ءبىر كورنەكتى تۇلعاسى، قازاقستاننىڭ حالىق جازۋشىسى قابدەش ءجۇمادىلوۆتىڭ دە 90 جاسى ۇمىت قالماۋى كەرەكتىگىن ايتىپ، دەپۋتاتتىق ساۋال جولداپتى.

دەپۋتاتتىق ساۋال: «ۇلت تاعدىرىنا ۇلەس قوسقان قايراتكەردىڭ جولىنا ادال بولايىق!»

«اق جول» دەموكراتيالىق پارتياسى دا العا قاراپ، كەلەسى جىلعا ءوز ۇسىنىسىن قوسايىن دەپ وتىر. حالىق جازۋشىسى، قوعام قايراتكەرى قابدەش ءجۇمادىل ءتىرى بولعاندا 2026 جىلى 90 جاسقا تولار ەدى. الدا ارتىنا مول ادەبي مۇرا قالدىرعان ايتۋلى قالامگەردىڭ مەرەيتويى كەلە جاتىر»، - دەگەن ازات پەرۋاشەۆ دەپۋتاتتىق ساۋالىن قر پرەمەر-ءمينيسترىنىڭ ورىنباسارى ەرمەك كوشەرباەۆقا جولداعان.

دەپۋتاتتىق ساۋال:

«قابدەش ءجۇمادىلوۆتىڭ ارتىندا 10 رومان، 20-دان استام پوۆەست، 70-تەن استام شىعارما قالدى. «سوڭعى كوش»، «دارابوز»، «قازدار كايتىپ بارادى» سىندى مول مۇرا قازاق  ادەبيەتىنىڭ التىن قورىنا ەندى.

جازۋشى، ءوز ەڭبەكتەرىندە قازاق حالقىنىڭ تاۋەلسىزدىگى جولىنداعى كۇرەسىن شىنايى بەينەلەپ، ۇلت بوستاندىعى ءۇشىن جانىن قيعان ەرلەر، ونىڭ ىشىندە بوگەنباي، قابانباي، وسپان باتىرلاردىڭ ازاتتىق جولىنداعى كۇرەسىن تەرەڭ زەرتتەپ، ولاردى تەك ساربازدار رەتىندە عانا ەمەس، تۇتاس حالىقتىڭ تاعدىرى ءۇشىن كۇرەسكەن تۇلعالار رەتىندە سيپاتتايدى.

قابدەش ءجۇمادىل بارلىق شىعارمالارىندا ۇلتىن ۇلىقتاپ، ءتىلىمىز بەن ءدىنىمىز ءۇشىن باسىن بايگەگە تىگىپ، تاريحىمىزدى قارا كۇيەدەن تازارتىپ، ەلدىك رۋحىمىزدى كوتەرۋ جولىندا جاساعان جانكەشتى ەڭبەگىن مويىنداعانىمىز ءجون.

سونىمەن قاتار ول تەك جازۋشى عانا ەمەس، سونداي-اق ۇلت تاعدىرىنا ەرەكشە ۇلەس قوسقان قايراتكەر ەدى.

اشارشىلىق كەزىندە توتاليتارلى جۇيەدەن قاشىپ ارعى بەت اسقان قاراكوز قانداستارىمىزدىڭ تاعدىرىنا بەيجاي قاراماي، ولاردىڭ كوشى-قونى، ءتىل جانە مادەنيەت ماسەلەلەرىن اشىق كوتەرىپ، ۇلتتىق مۇددەنى قورعاۋ  جولىندا اتسالىستى.

الپىسىنشى جىلدارى قىتايدا ساياسي جاعداي كۇردەلەنە باستاعاندا، قابدەش ءجۇمادىل قازاق باۋىرلارىنىڭ اۋىر بولاشاعىنا اراشا ءتۇستى. ماسكەۋگە دەيىن بارىپ، باۋىرلارىمىزدىڭ كوشى-قونىن ۇيىمداستىرۋ ماسەلەسىن كوتەردى. ناتيجەسىندە، 1962 جىلى 200 مىڭنان استام قانداسىمىزدىڭ تاريحي وتانىنا ورالۋىنا سەبەپكەر بولدى.

بۇل وقيعا ەل تاريحىنان ايرىقشا ورىن الدى. سول كەزدەن ءوز جەرىندە ۇلتتىق ازشىلىققا اينالعان حالقىمىزعا باس قوسىپ، سانىمىزدى كوبەيتىپ، ورالعان قانداستارىمىزدىڭ ۇرپاقتارى ءوسىپ-ءونىپ، ەلىمىزدىڭ لايىقتى ازاماتتارى بوپ، قازاقستان دامۋىنا ءوز ۇلەستەرىن قوسۋدا.

قابدەش اعامىزدىڭ كوزىن كورگەن زامانداستارى رەتىندە، ەرلىگىن ەستە ساقتاۋ جانە ونى لايىقتى تۇردە قۇرمەتتەۋ - بىزدەر ءۇشىن بورىش پەن ابىروي.

ونىڭ مەرەيىن - توي رەتىندە ەمەس، ەل بىرلىگى مەن، ەرلىك پەن ادالدىقتى ۇلىقتايتىن شارا رەتىندە ۇيىمداستىرۋ ورىندى. بۇل تەك وتكەندى قۇرمەتتەۋ ەمەس، سونىمەن قاتار بولاشاق ۇرپاققا رۋحاني باعىت بەرۋ، كىم ەكەنىمىزدىڭ تەرەڭ ماعىناسىن ءتۇسىندىرۋ ءۇشىن دە مۇمكىندىك.

«ەرىم دەيتىن ەل بولماسا، ەلىم دەيتىن ەر قايدان بولسىن». وسىنداي تۇلعالاردى ماقتان تۇتىپ، ولاردىڭ اماناتىنا ادال بولۋ - ءبىزدىڭ پارىزىمىز. وسىعان بايلانىستى، «اق جول» دەمپارتياسى قازاق حالقىنىڭ ءبىرتۋار قالامگەرى، ءارى جاناشىرى قابدەش ءجۇمادىلدىڭ 90 جىلدىعىن جوعارى دەڭگەيدە اتاپ وتكىزۋدى ۇسىنامىز.

سونىمەن قاتار، ونىڭ ەسىمىن ۇلىقتاۋ ماقساتىندا ەلدى-مەكەندەردىڭ كوشەلەر مەن نىساندارعا اتىن بەرۋ ماسەلەسىن قاراستىرۋدى ءجون دەپ سانايمىز!

«اق جول» پارتياسىنىڭ دەپۋتاتتارى: ا.پەرۋاشەۆ، س.ەرۋباەۆ، ە.بارلىباەۆ، د.ەسپاەۆا، ق.يسا، ە.بەيسەنباەۆ.

ءتۇيىن: «اق جول» پارتياسىنىڭ ۇسىنىسىنا الىپ-قوسارىمىز جوق. قابدەش ءجۇمادىلوۆ قالام قۋاتىمەن، قايراتكەرلىگىمەن حالىقتىڭ قۇرمەتىنە بولەنگەن ءىرى تۇلعا. قانداي قۇرمەتكە دە لايىق!

قىزىل يمپەريانىڭ قانى تامىپ تۇرعان كەزىندە دە ەكى ايىرىلعان ەلدىڭ باسىن قوسىپ، قازاق كوشىنىڭ اۋىر جۇگىن قارا نارداي كوتەرگەن تۇلعا. تاۋەلسىز كەزەڭدە دە اقيقاتشىل تۇلعاسىنان اينىماي، ۇنەمى شىندىقتى ايتقان كۇرەسكەر.

قالامگەردىڭ ادەبي مۇراسى دا ءوزىنىڭ ءورشىل ومىرىنەن ورىلگەن. ۇلت تاعدىرىمەن بىتە قايناسقان. شىعارما كەيىپكەرلەرى كەلەر ۇرپاققا جارقىن ۇلگى. ونەگەلىك، تاربيەلىك قۋاتى وتە زور. ءوزى ولسە دە ءسوزى ولمەيتىن جازۋشىنىڭ مەرەيتويىن ءوز دەڭگەيىندە اتاپ ءوتۋ، ەسىمىن ەلەۋلى نىساندارعا بەرىپ قۇرمەت كورسەتۋ كەرەك باستاما!

Abai.kz