قازاق ەلىندەگى شەتەلدىك كومپانيالاردىڭ اۋدارماشى قابىلداۋدا ءوز انا تىلدەرى مەن ورىس ءتىلىن ءبىلۋدى تالاپ ەتىپ كەلە جاتقانىنا ەت ۇيرەنگەلى قاشان. مارقۇم بەردىبەك ساپارباەۆ اقتوبە وبلىسىن باسقارىپ تۇرعاندا قازاقتىڭ مۇنايىنىڭ قىزىعىن كورىپ وتىرعان قىتاي كومپانياسىنا قازاق ءتىلدى اۋدارماشى الۋدى مىندەتتەپ، تاۋبەسىنە ءتۇسىرىپ ەدى. مارقۇم شەرحان مۇرتازا دا دەپۋتات كەزىندە قازاقتىڭ نەبىر قاسقا-جايساڭىنىڭ انا ءتىلىن بىلمەيتىن مينيستر بالالارىن ەل كوزىنشە قاتاڭ سىنعا العانى كوپكە ايان.

ءومىر وزگەرسە دە، ۇرپاق اۋىسسا دا ورىس تىلىمەن ءىس جۇرگىزەتىن قازاق بيلىگى وزگەرمەيتىن سياقتى. كەشەلى بەرى قازىبەك يسا، امانجول ءالتاي، جاناربەك ءاشىمجان، رينات زايىتوۆ قاتارلى ايدىك اقىندار باستاتقان حالىق قالاۋلىلارى بار قازاق پارلامەنتىنىڭ سمس مامانىن جۇمىسقا الۋ تۋرالى جارناماسى جۇرت تالقىسىنا ءتۇستى.

«Prdrive.kz» اتتى PR سالاسىنىڭ دامۋىنا باعىتتالعان Instagram پاراقشادا «ءماجىلىس پارلامەنتىنىڭ مەديا-توبىنا SMM-مامانى (نەگىزىنەن ورىس تىلىندە سويلەيتىن) قاجەت» دەگەن اشىق ۆاكانسيا جاريالانعان. وندا «ورىس تىلىندە ساۋاتتى جازا ءبىلۋى» باستى شارت ەتىلىپ،  قازاق ءتىلى تۋرالى  جاي عانا «ءبىلۋى دە قۇپتالادى» دەلىنگەن.

جۋرناليست جالعاس ەرتايدىڭ پارلامەنت باسشىسىن، پرەزيدەنت ءباسپاسوز حاتشىسىن تەكتەپ بۇل جارنامانىڭ كوشىرمەسىن ءوز فەيسبۋك پاراقشاسىنا سالعانى سول ەكەن، ارتى قىزۋ تالقىعا ۇلاسقان. جۋرناليست كامشات تاسبولات:

«بۇل قازاق پارلامەنتى ەمەس، رەسەي فەدەراتسياسى دۋماسىنىڭ بۇراتانا حالىق باسقارماسىنىڭ زاڭ شىعارۋشى ورگانى شىعار-اۋ، ماسقارا! وتكەندە يتاليادا بولدىق، ورىسشا سويلەگەندەرگە قىزمەت كورسەتپەيدى، «سوعىس باستادىڭدار» دەپ سىنايدى، سونىمەن تاربيەلەيدى، ۇياتىن وياتادى… بىزگە وتارسىزدانۋ ءۇشىن ءالى ءجۇز جىل كەرەك شىعار… كورشى رەسەيدىڭ مەملەكەتتىك ءتىلىن ەمەس، قازاقستاننىڭ مەملەكەتتىك ءتىلىن دامىتۋ كەرەگىن قاشان تۇسىنەدى ەكەن بۇلار؟» دەپ جازدى. جۇرت تالقىسىنان كەيىن جارنامانىڭ وشىرىلگەنى ءمالىم بولدى.

قازاق پارلامەنتىنە ورىس ءتىلدى پيار مەنەدجەر ۇستاۋ نە ءۇشىن كەرەك بولدى؟ سونداعى تۇپكى ماقساتتارى نە، كىمگە جاققىسى كەلدى؟ پارلامەنت ەڭ الدىمەن مەملەكە قۇرۋشى قارا ورمان قازاق حالقىنىڭ وكىلدىك ورگانى ەمەس پە ەدى؟ وزدەرى سايلاعان، سەنىم ارتقان دەپۋتاتتاردىڭ بۇل ماسەلەگە ات ءۇستى قاراعانى قالاي؟ الدە "حالىقارالىق ورىس ءتىلىن دامىتۋ قورىنا" اقشا ءبولۋدى ءبىر اۋىزدان قولداعانداي، پارلامەنتتىڭ جارناماسىن ورىسشا جاساۋعا قارسىلىقسىز كەلىسكەن بە؟ كوپتىڭ كوكەيىندەگى سۇراق وسى.

Abai.kz