Jibek Joly تەلەارناسىنداعى جۋرناليست ەربولات مۇحامەدجاننىڭ «ۋادە» اۆتورلىق جوباسىنا «قازمۇنايگاز» ۇك» اق باسقارما توراعاسى اسحات حاسەنوۆ سۇحبات بەرىپ، ەلىمىزدىڭ مۇناي بارلاۋ سالاسىنداعى قازىرگى جاعداي مەن وزەكتى ماسەلەلەر تۋرالى باياندادى.

سۇحبات بارىسىندا اسحات حاسەنوۆ قازاقستانداعى ءىرى گەولوگتاردىڭ شوگىندى باسسەيندەر بويىنشا اۋقىمدى زەرتتەۋلەر جۇرگىزگەنىن اتاپ ءوتتى. «ءبىزدىڭ ءىرى گەولوگتارىمىز شوگىندى باسسەيندەر بويىنشا اۋقىمدى زەرتتەۋ جۇمىستارىن جۇرگىزدى. سونىڭ ناتيجەسىندە ماماندار قازاقستاندا مۇناي رەسۋرستارىنىڭ كولەمى 76 ملرد تونناعا جەتۋى مۇمكىن دەگەن تۇجىرىمعا كەلدى. الايدا بۇل كورسەتكىشتى دالەلدەۋ قاجەت. ول ءۇشىن گەولوگيالىق بارلاۋ جانە بۇرعىلاۋ جۇمىستارىن بەلسەندى جۇرگىزۋ كەرەك»، – دەدى ول.

سوڭعى جىلدارى بارلاۋ جۇمىستارىنىڭ قارقىنى باسەڭدەگەنىن ايتقان حاسەنوۆ بۇل پروتسەستىڭ نەگىزگى سەبەپتەرىن ءتۇسىندىردى. «بۇعان نەگىزگى سەبەپ بار. بىرىنشىدەن، مەملەكەت تاراپىنان قارجى بولىنەدى، گەولوگيالىق بارلاۋ كوميتەتى زەرتتەۋ جۇمىستارىن جۇرگىزەدى. بۇل – مەملەكەتتىك دەڭگەيدە اتقارىلىپ جاتقان جۇمىس. ەكىنشىدەن، ءاربىر كومپانيا ءوز قاراجاتى ەسەبىنەن گەولوگيالىق بارلاۋ جۇمىستارىن جۇرگىزەدى. مىسالى، ءبىز زەرتتەۋ جۇمىستارىن جۇرگىزىپ، قازىرگى تاڭدا بۇرعىلاۋ جۇمىستارىن باستاپ كەتتىك»، – دەدى باسقارما توراعاسى.

سونداي-اق، حاسەنوۆ كەڭەس زامانىنداعى جوسپارلى ەكونوميكا كەزەڭىندە بۇرعىلاۋ جۇمىستارى مەتروپروحودكا ادىسىمەن ەسەپتەلگەنىن اتاپ ءوتتى. «كەڭەس زامانىندا جوسپارلى ەكونوميكا بولعاندىقتان، بۇرعىلاۋ جۇمىستارى مەتروپروحودكا ادىسىمەن ەسەپتەلەتىن. ال قازىرگى تاڭدا بۇعان باسقا كوزقاراس قالىپتاسقان، ويتكەنى بۇل كاپيتالدىق تۇرعىدان وتە قىمبات پروتسەسس. ستاتيستيكالىق مالىمەتتەرگە سۇيەنسەك، گەولوگيالىق بارلاۋ جۇمىستارىنىڭ، ونىڭ ىشىندە بۇرعىلاۋ ناتيجەسىندە وڭ ناتيجە بەرەتىندەرى تەك 25%-دى قۇرايدى. ياعني، 10 ۇڭعىما قازىلسا، ونىڭ تەك 2-3-ەۋى عانا ناتيجەلى بولىپ شىعادى. ال بۇل پروتسەستەرگە قىرۋار قارجى جۇمسالادى»، – دەپ مالىمدەدى حاسەنوۆ.

سۇحباتقا سىلتەمە: 

Abai.kz