قۇمار اقساقالوۆ باسقارىپ وتىرعان قوستانايداعى جاعداي كوڭىل كونشىتپەيدى. وبلىس قازاقىلانباعان كۇيدە قالىپ وتىر دەپ جازادى Ertenmedia.kz.

«تەرىسكەيدە ادام ازايىپ جاتىر» دەگەن توقاەۆتىڭ قۇرىلتايداعى سوزىنەن كەيىن كەيبىر ايماق باسشىلارى دەرەۋ ورنىنان كەتۋى ءتيىس ەدى.

قازاقستان ءۇشىن ەڭ قاۋىپتى ستسەناري سولتۇستىكتىڭ بىرتىندەپ بوساپ، بولاشاقتا ساياسي داعدارىس ايماعىنا اينالۋى.

قاراپايىم تىلمەن ايتساق، بوس جەرگە كوز تىگەتىندەر قاشاندا تابىلادى. اقساقالوۆتىڭ اكىم رەتىندەگى ستراتەگيالىق بىلىكسىزدىگى وسى قاۋىپتى كۇن ساناپ جاقىنداتۋ ۇستىندە. كەيىنگى كەزدە وڭتۇستىكتەن سولتۇستىككە كوشكەن قاۋىمنىڭ وكپە-رەنىشى مەن ارىز-شاعىمى جيىلەپ كەتتى. ايماق باسشىلىعى وڭىرگە ورنىققىسى كەلەتىن قازاقتىلدى قاۋىمعا قولايلى ورتا قۇرۋدىڭ تەتىگىن ازىرلەمەگەنىن، ءتىپتى مۇلدە تۇيسىنە الماي وتىرعانىن بايقايسىز. اقساقالوۆتىڭ كومانداسى قازاقتاردىڭ ايماققا نە ءۇشىن كوشىپ جاتقانىن دا ۇقپايتىن ءتارىزدى. كوشى-قونعا كەلگەندە قوستاناي كوپ وڭىردەن قالىس تۇر.

وسى تۇرعىدان العاندا، توقاەۆتىڭ «سولتۇستىكتى ساقتاڭدار!» دەپ دابىل قاعۋى – اقساقالوۆ اكىمدىگىنە بەرىلگەن ناقتى ساياسي باعا.

اقساقالوۆتىڭ ەڭ ۇلكەن قاتەلىگى تەرىسكەيدىڭ ۇلتتىق قاۋىپسىزدىكتىڭ ءبىر كومپونەنتى ەكەنىن تۇسىنبەۋىندە جاتىر. قوستاناي ءالى كۇنگە دەيىن ءوز ىشىنەن مادەني، تىلدىك تۇرعىدان تولىققاندى قازاقى ايماق بولىپ قالىپتاسقان جوق. قوستانايدى «قازاقتاندىرۋدى» كەيبىرەۋ قۇددى ءبىر ەتنيكالىق تازارتۋ نە بولماسا بىرجاقتى «قازاقتارعا باسىمدىق بەرۋ» دەپ تۇسىنەدى. شىن مانىندە، بۇل مەملەكەتتىڭ ءوز ىرگەسىن بەكىتۋ، ەل تۇتاستىعىن نىعايتۋ ءۇشىن جاسالاتىن زاڭدى ارەكەتى. وكىنىشكە قاراي، بۇل ماقساتتا جۇمسالۋى ءتيىس قارجىنىڭ قايدا، قالاي كەتىپ جاتقانى ءسىز بەن بىزگە بەلگىسىز. قوستانايدىڭ ەلسىزدەنۋى اقساقالوۆتى اسا قاتتى مازالامايتىن ءتارىزدى...

Abai.kz