ەلىمىزدە بانكروتتىقتى تالاپ ەتۋشىلەر قاتارى كوبەيگەن. دەگەنمەن، بارلىق ءوتىنىش ماقۇلدانا بەرمەيدى. وعان نە سەبەپ؟ جالپى بانكروتتىقتىڭ قاي ءتۇرى سۇرانىستا؟ جىل باسىنان بەرى ەلدە ەكى مىڭ ادام بانكروت دەپ تانىلدى. "قر ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىق تۋرالى" زاڭىنىڭ مۇمكىندىكتەرىن پايدالانۋعا نيەتتىلەر كوپ. 2023 جىلعى وتىنىشتەر 77 مىڭنان اسسا، بىلتىر 83 مىڭعا جەتتى. ال بيىلعى ءۇش ايدا 37 مىڭعا جۋىقتاعان.

مەملەكەتتىك كىرىستەر كوميتەتى توراعاسىنىڭ ورىنباسارى سەيىلجان احمەتوۆتىڭ ايتۋىنشا، سوتتان تىس بانكروتتىق راسىمىنە سۇرانىس كوپ. ونىڭ اياسىندا بىلتىر 11 مىڭ ادام بانكروت دەپ تانىلدى. بيىل 2 مىڭنان استام ازاماتتىڭ ءوتىنىمى ماقۇلداندى.

ۇلتتىق بانك مالىمەتىنە سۇيەنسەك، اقپاندا مەرزىمى وتكەن نەسيە كولەمى 4%-كە ءوسىپ، 24 ملرد تەڭگەگە جۋىقتادى. مۇنداي تولەمدەردىڭ باسىم بولىگىن تۇتىنۋشىلىق نەسيەلەر قۇرايدى، ەكىنشى ورىندا يپوتەكالىق قارىز تۇر. بۇل – 21,5 ملرد تەڭگە. جالپى بەرەشەگىنەن قۇتىلۋعا اسىقپايتىنداردىڭ دەنى الماتى مەن استانادا تۇرادى. قوس شاھارداعى قارىز 280 ملرد تەڭگەگە تەڭ.

Abai.kz