"ناۋرىزدىڭ 23-25 ارالىعىندا وتكەن اقش-ۋكراينا، اقش-رەسەي كەلىسسوزى كورسەتكەندەي ءپۋتيننىڭ اق ۇيمەن بايلانىسىن قالپىنا كەلتىرۋدەگى ماقساتى سوعىستى توقتاتۋ ەمەس، ترامپتان پايدالانىپ ەكونوميكالىق پايدا مەن گەوساياسي مۇددەنى كوزدەپ وتىر", - دەپ جازادى نيۋ-يورك تايمس.

اق ءۇي مەن رەسەي وكىلدەرى ەكەۋارا كەزدەسۋدە ءبىرىنشى كەزەكتە ۋكراينا ماسەلەسىن ەمەس، ەكى تاراپتىڭ قاتىناسىن رەتتەۋدى تالقىلاعان. سوسىن بارىپ سوعىستى توقتاتۋ ءجايىن ءسوز ەتكەن. وندا دا رەسەي تارابى ءوزىنىڭ شارتىن تىقپالاۋمەن بولعان.

ول شارتتار: قارا تەڭىزدە كەمەلەر مەن ەنەرگيا كوزدەرىن اتقىلاۋدى توقتاتادى. ەسەسىنە اقش تاراپ ورىس بانكتەرىن حالىقارالىق كوممۋنيكاتسيا جۇيەسىنە قايتا قوسۋى كەرەك.

ۋكرايناعا ەۋروپانىڭ ەمەس، بۇۇ-نىڭ بىتىمگەرلىك كۇشتەرى ورنالاسۋى كەرەك!

كرەمل ءۇشىن ۋكراينا ماسەلەسىنەن دە اقش-پەن بايلانىسى ماڭىزدى بولىپ تۇر. كوز الدىداعى تۇيتكىلدى پايدالانىپ (سوعىس توقتاتۋدى), ۇزاق مەرزىمدىك ورىس مۇددەسىن قامتاماسىز ەتپەك. رەسەي ءۇشىن اقش پەن اۋە تاسىمالىنداعى ارىپتەستىكتى قالپىنا كەلتىرۋ سونىڭ ءبىر باسقىشى. امەريكا تارابى بوينگ ۇشاقتارىنىڭ بولشەكتەرىن جەتكىزۋدى شەكتەگەندىكتەن قازىر رەسەيدىڭ اۋە تاسىمالى داعدارىس كۇيدە. ولار اق ۇيدەن سول شەكتەۋدى الىپ تاستاۋدى، ماسكەۋگە اۋە جولىن قايتا اشۋدى، وعان قارىمجى رەتىندە 2022 جىلى شىعارعان امەريكا ۇشاقتارىنا ءسىبىر اسپانىنان ۇشۋعا شەكتەۋدى الىپ تاستايتىندارىن ايتىپ وتىر. اقش ينۆەستورلارىن تارتۋ ءۇشىن امەريكانى "دوس ەمەس ەلدەر تىزىمىنەن" دە سىزىپ تاستاماق.

قورىتا كەلگەندە پۋتين ترامپقا رەسەي مەن ناتو-نىڭ ءوزارا ءبىر-ءبىرىنىڭ مۇددەسىنە قارسى كەلمەيتىن بالانىسى ساقتالعاندا عانا تىنىشتىق ورنايتىنىن ءتۇسىندىرىپ، سول ارقىلى ۋكراينانىڭ ناتو-عا كىرمەۋىن، ءتىپتى ورتالىق ەۋروپا مەن شىعىس ەۋروپادان ىعىسۋىن تالاپ ەتىپ، ۋكراينانىڭ اسكەري كۇشىن السىرەتىپ، ءتۇپتىڭ تۇبىندە ۋكراينا بيلىگىن قولبالاعا اينالدىرۋدى كوزدەيدى.

"ول ماقساتقا جەتۋ ءۇشىن ساۋداگەر ترامپتىڭ تابەتىن ورىستىڭ جەر استى بايلىعىنا تارتا السا جەتىپ جاتىر", - دەيدى اقش باسىلىمى.

Abai.kz