وقۋشىلاردىڭ سوڭعى وقۋ توقسانى باستالادى

1 ساۋىردەن باستاپ وقۋ جىلىنىڭ IV توقسانى باستالادى. ءتورتىنشى توقساندا وقۋشىلار 8 وقۋ اپتا وقيدى. ءسويتىپ 25 مامىردا وقۋ جىلىن قورىتىندىلايدى.

كولىك سالىعىن تولەمەگەندەر ايىپپۇل ارقالايدى

2024 جىلعا كولىك قۇرالدارى سالىعىن تولەۋ مەرزىمى 2025 جىلعى 1 ساۋىردە اياقتالادى. 2024 جىلعا سالىقتى ەسەپتەۋ كەزىندە 2024 جىلى قولدانىلعان ايلىق ەسەپتىك كورسەتكىش (اەك) 3 692 تەڭگە مولشەرىندە قولدانىلادى.

1 ساۋىردەن باستاپ سالىقتىڭ كەشىكتىرىلۋىنە ايىپپۇل ەسەپتەلەدى. قارىزدى وتەۋ ءۇشىن بورىشكەرگە حابارلاما جىبەرىلگەننەن كەيىن 30 جۇمىس كۇنى بەرىلەدى. قارىز مولشەرى 1 اەك-تەن اسقان جاعدايدا سالىقتىق بۇيرىق شىعارىلادى. ەگەر قارىز وتەلمەسە، سوت ورىنداۋشىلارى ەسەپشوتتار مەن مۇلىكتى بۇعاتتاۋى مۇمكىن.

موپەدتەردى تىركەۋ مىندەتتەلەدى

بيىل 5 ساۋىردەن باستاپ موپەدتەر رەسمي تۇردە مەحانيكالىق كولىك بولىپ سانالادى. سوندىقتان ولاردى پايدالانۋ ءۇشىن بىرقاتار قۇجات بولۋى قاجەت.

2025 جىلدىڭ 5 ساۋىرىنەن باستاپ موپەدتەردى پايدالانۋ ءۇشىن پوليتسيادا تىركەلۋ، ا1, ا نەمەسە ۆ ساناتىنداعى جۇرگىزۋشى كۋالىگى، تەحنيكالىق بايقاۋدان ءوتۋ جانە ازاماتتىق-قۇقىقتىق جاۋاپكەرشىلىكتى ساقتاندىرۋ ءپوليسى قاجەت بولادى.

تىركەلۋ ءۇشىن مامانداندىرىلعان حالىققا قىزمەت كورسەتۋ ورتالىعىنا مىناداي قۇجاتتارمەن جۇگىنۋ قاجەت: جەكە كۋالىك (ەلەكتروندى ءتۇرى دە بولادى), تەحنيكالىق قۇجاتتاما نەمەسە موپەدتىڭ تەحنيكالىق سيپاتتاماسى.

وسىدان كەيىن ءوتىنىش تولتىرىپ، موپەدتى تەكسەرۋدەن وتكىزگەن سوڭ قاجەتتى مەملەكەتتىك باجدى تولەۋ كەرەك.

2025 جىلدىڭ 5 ساۋىرىنەن باستاپ تىركەلمەگەن موپەدتەردى جۇرگىزۋگە جانە A1, A نەمەسە B ساناتتارى بويىنشا جۇرگىزۋشى كۋالىگىنسىز جۇرۋگە بولمايدى.

ساۋىردە قانشا كۇن دەمالامىز?

ساۋىردە مەملەكەتتىك مەرەكەلەر جوق، سوندىقتان 5 كۇن جۇمىس ىستەيتىندەردە 8 دەمالىس كۇنى، 6 كۇن جۇمىس ىستەيتىندەردە 4 دەمالىس كۇنى بولادى. ياعني بۇل ايدا دەمالىس كۇندەرى تەك سەنبى مەن جەكسەنبىگە سايكەس كەلەدى.

ءساۋىر ايىندا قازاقستاندىقتار 8 كۇن دەمالادى:
5, 6, 12, 13, 19, 20, 26, 27 ءساۋىر.

مىناداي كاسىبي مەرەكەلەر مەن اتاۋلى كۇندەر بار:
- 6 ءساۋىر (ءساۋىردىڭ ءبىرىنشى جەكسەنبىسى) – گەولوگتار كۇنى
- 12 ءساۋىر – عىلىمي قىزمەتكەرلەر كۇنى
- 15 ءساۋىر – ۇلتتىق عاشىقتار كۇنى
- 21 ءساۋىر – قازاقستان رەسپۋبليكاسى مەملەكەتتىك كۇزەت قىزمەتى كۇنى

ءبىرىنشى سىنىپقا قۇجاتتار قابىلداۋ باستالادى

بيىل ءبىرىنشى سىنىپقا ءوتىنىش قابىلداۋ 1 ساۋىردە باستالىپ، 2025 جىلدىڭ 31 تامىزىنا دەيىن جالعاسادى.

«ءبىلىم تۋرالى» زاڭعا سايكەس، 1-سىنىپقا اتا-اناسىنىڭ ءوتىنىشى بويىنشا بالالار 6 جاستان باستاپ قابىلدانادى. قۇجاتتاردى مەملەكەتتىك egov.kz ەلەكتروندىق ۇكىمەتى، سونداي-اق قاعاز نۇسقادا 1 ءساۋىر - 31 تامىز ارالىعىندا تاپسىرۋعا بولادى.

قازاقستاندا قاعاز تۇرىندەگى ەڭبەككە جارامسىزدىق پاراعى جويىلادى

2025 جىلدىڭ 1 ساۋىرىنەن باستاپ قازاقستاندا تەك تسيفرلىق فورماتتاعى ەڭبەككە جارامسىزدىق پاراقتارى قولدانىلادى. بۇل وزگەرىس ازاماتتاردىڭ مەديتسينالىق مەكەمەلەرمەن ءوزارا بايلانىسىن جەڭىلدەتۋ ماقساتىندا ەنگىزىلىپ وتىر.

جاڭا جۇيە ارقىلى ەڭبەككە جارامسىزدىق تۋرالى مالىمەتتەر تىكەلەي جۇمىس بەرۋشىگە جولدانادى، سونىمەن قاتار، بۇل قۇجاتتاردى قولدان جاساۋ قاۋپىن تومەندەتۋگە كومەكتەسەدى.

ەلەكتر ەنەرگياسىنىڭ ءتاريفى كوتەرىلەدى

اقتوبە وبلىسىندا 1 ساۋىردەن باستاپ ەلەكتر ەنەرگياسىنىڭ ءتاريفى قىمباتتاۋى مۇمكىن. قازىرگى 34,64 تەڭگە بولاتىن 1 كۆت/ساع قۇنى 46 تەڭگەگە دەيىن ءوسۋى ىقتيمال.

ەگەر ايىنا 172 كۆت ەلەكتر ەنەرگياسى جۇمسالسا، جارىققا كەتەتىن شىعىن 1225 تەڭگەگە عانا ارتادى، — دەپ ءتۇسىندىردى “ەنەرگوسيستەما” جشس ساتۋ دەپارتامەنتىنىڭ ديرەكتورى البەك دۋسمۇحامبەتوۆ.

ەلەكتر ەنەرگياسىن ساتىپ الۋ باعاسى 17,83 تەڭگەدەن 18,17 تەڭگەگە دەيىن كوتەرىلمەك. سونىمەن قاتار، ەلەكتر ەنەرگياسىن جەتكىزۋگە كەتەتىن شىعىندار مەن جابدىقتاۋ ۇستەمەسى دە 1,60 تەڭگەگە دەيىن وسەدى.

دەرەككوز: BAQ.KZ

Abai.kz