قازاقستان مەن سلوۆەنيا بيزنەس كەڭەسىن قۇرۋ قاجەت. بۇل تۋرالى اقوردادا ەلىمىزگە رەسمي ساپارمەن كەلگەن سلوۆەنيا پرەزيدەنتى ناتاشا پيرتس-مۋسارمەن كەڭەيتىلگەن قۇرامداعى كەلىسسوز بارىسىندا مەملەكەت باسشىسى قاسىم-جومارت توقاەۆ ايتتى.

«- قازىر عانا وتە جەمىستى كەلىسسوز وتكىزدىك. ءتىپتى حالىقارالىق احۋالعا قاتىستى وتە سەزىمتال سەكتورلار دا تالقىعا ءتۇستى. ارينە، ءبىز بارىنشا وڭ ناتيجەگە قول جەتكىزۋگە باعىتتالعان بىرلەسكەن كۇش-جىگەردەن، سونىمەن قاتار ءوزارا ىنتىماقتاستىقتان اينىمايمىز. سلوۆەنيا ءبىز ءۇشىن ەۋروپاداعى وتە ماڭىزدى سەرىكتەس سانالادى جانە مەن اتاپ وتكەن بارلىق اسپەكتىگە قول جەتكىزۋ ءۇشىن بارلىق كۇش-جىگەرىمىزدى جۇمسايمىز. وسىعان بايلانىستى ەرتەڭ بيزنەس فورۋمعا بارىپ، سىزدەردىڭ بيزنەسمەندەرىڭىزدىڭ، سونىمەن قاتار قازاقستاندىق بيزنەسمەندەردىڭ الدىندا ەلىمىزدەگى بيزنەس-قوعامداستىقتاردىڭ ونىمدەرىن ۇسىنباقپىن»، - دەدى پرەزيدەنت.

مەملەكەت باسشىسىنىڭ ايتۋىنشا، سلوۆەنيا پرەزيدەنتىمەن شاعىن قۇرامداعى كەلىسسوز بارىسىندا الداعى ىنتىماقتاستىق ءۇشىن ساۋدا مەن ينۆەستيتسيا، اتوم ەنەرگەتيكاسى، ترانزيت جانە لوگيستيكا، جاڭاراتىن ەنەرگيا كوزدەرى مەن جاسىل ءوسىم، دەنساۋلىق ساقتاۋ، تسيفرلاندىرۋ، تۋريزم سىندى ماڭىزدى سالالار اتالعان.

«- ولاردىڭ قاتارىندا مۇناي مەن گازدىڭ دا ىنتىماقتاستىعىمىزدىڭ باستى ءارى ماڭىزدى اسپەكتىسى بولۋى تيىستىگىن دۇرىس اتاپ ءوتتىڭىز. ءبىز قازاقستاندا سلوۆەنيا بيزنەسى ءۇشىن قولايلى جاعداي جاساۋعا، رەتتەۋشىلىك، اشىقتىق، ينۆەستيتسيالىق قورعانىس جانە ەكونوميكانى ءارتاراپتاندىرۋدى قوسا العاندا اسا ماڭىزدى جوبالاردى قولدانۋعا نيەتتىمىز. مەن تۇراقتى نەگىزدە جۇمىس ىستەيتىن بيزنەس كەڭەس بەلگىلەۋدى نەمەسە قۇرۋدى ۇسىندىم. بۇل كەلەشەكتەگى جۇمىس ءۇشىن اسا ماڭىزدى قادام بولار ەد»ى، - دەدى قاسىم-جومارت توقاەۆ.

Abai.kz