ەلىمىزدەگى ەڭ ءىرى ونلاين اۆتو-حابارلاندىرۋ پلاتفورماسىنىڭ مالىمەتىنشە، 2024 جىلى ەلىمىزدە 205 111 كولىك ساتىلعان. بۇل كورسەتكىش الدىڭعى جىلمەن سالىستىرعاندا 3,2%-عا جوعارى.

وعان قوسا قازاقستاننىڭ اۆتوموبيل نارىعىنداعى توپ-3 كولىك ماركاسى دا بەلگىلى بولدى. بىلتىر ەلىمىزدەگى اۆتوسالوندار 44 218 Hyundai كولىگىن ساتقان. ەكىنشى ورىندا 30 927 داناسى ساۋدالانعان Chevrolet ماركاسى. ۇزدىك ۇشتىكتى 23 045 دانا ساتىلىممەن Kia كولىگى تۇيىندەيدى.

ۇلتتىق ستاتيستيكا بيۋروسى ۇسىنعان اقپاراتتارعا سۇيەنسەك، 2025 جىلدىڭ 1 ناۋرىزىنا دەيىن ەلىمىزدە 5 791 674 اۆتوكولىك تىركەلگەن. ونىڭ 5 101 862-ءسى جەڭىل كولىك. ودان بولەك 573 659 جۇك كولىگى مەن 116 153 اۆتوبۋس بار.

اۆتوموبيل سانى بويىنشا الماتى قالاسى كوش باسىندا. وڭتۇستىك استانادا 671 163 كولىك تىركەلگەن. تىزبەكتى 612 907 ماشينامەن الماتى وبلىسى جالعاستىرادى. ءۇشىنشى ورىن 429 229 كولىگى بار استانا قالاسىنا تيەسىلى. ءاۆتوموبيلدى ەڭ از قولداناتىن ءوڭىر — ۇلىتاۋ وبلىسى. وندا 26 725 كولىك تىركەلگەن.

قازاقستاندا بارلىعى 5 791 674 تىركەلگەن. وڭىرلەرگە كەلەر بولساق:

اباي — 69 493

اقمولا — 241 623

اقتوبە — 221 886

الماتى — 612 907

اتىراۋ — 158 783

باتىس قازاقستان — 176 368

جامبىل — 300 445

جەتىسۋ — 79 690

قاراعاندى — 361 674

قوستاناي — 244 353

قىزىلوردا — 178 645

ماڭعىستاۋ — 194 720

وڭتۇستىك قازاقستان — 147 231

پاۆلودار — 213 191

سولتۇستىك قازاقستان — 178 007

تۇركىستان — 333 625

ۇلىتاۋ — 26 725

شىعىس قازاقستان — 333 648

استانا قالاسى — 429 229

الماتى قالاسى — 671 163

شىمكەنت قالاسى — 247 552

ديپلوماتيالىق نومىرلەر — 52 232

ءوڭىرى كورسەتىلمەگەن — 318 484

ەلىمىزدەگى تەمىر تۇلپارلاردىڭ 82%-ى، ناقتىراق ايتساق، 4 740 115-ءى بەنزين تۇتىنادى. 412 099 كولىك ديزەل وتىنىمەن، 13 356 كولىك گازبالونمەن جۇرەدى. ال 421 232-سى گيبريدتى اۆتوموبيلدەر. وعان قوسا قازاقستاندا 13 599 ەلەكتر ماشينالارى بار. قالعان 188 273 كولىكتىڭ قولداناتىن وتىن ءتۇرى كورسەتىلمەگەن.

Abai.kz