دۇنيەجۇزىلىك تەاتر مەرەكەسىن كەڭ كولەمدە اتاپ ءوتۋ داستۇرگە اينالىپ كەلەدى. بىرنەشە جىل بۇرىن تەاترلار ءۇشىن ماۋسىمنىڭ اشىلۋى مەن جابىلۋى عانا كىشىگىرىم مەرەكە بولسا، بۇگىندە تەاتر ونەرى ءوزىنىڭ ءتول مەرەكەسىن قارقىندى اتاپ وتۋدە.

ۇلتتىق مەرەكەمىز ناۋرىز بەن تەاتر كۇنى قارساڭىندا ەلىمىزدەگى بىرنەشە تەاتر وزدەرىنە ەسەپ بەرۋ، تەاتردىڭ ىشكى شىعارماشىلىق تىنىسىن باعامداۋ ماقساتىندا تەاترىشىلىك فەستيۆالدەر وتكىزدى. الماتىلىق ع.مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترى «Altyn saqa»، استانالىق ق.قۋانىشباەۆ اتىنداعى قازاق ۇلتتىق مۋزىكالىق دراما تەاترى سپەكتاكلدەر شەرۋى, اتىراۋلىق ماحامبەت اتىنداعى قازاق دراما تەاترى «ۇزدىك» تەاترىشىلىك فەستيۆالىن وتكىزسە، اقتاۋلىق ن.ءجانتورين اتىنداعى مۋزىكالىق دراما تەاترى «NJ FEST» تەاترىشىلىك  فەستيۆالىن ۇيىمداستىردى.  اتالمىش ونەر دودالارىنىڭ كوشىن جالعاپ «تەمىرقازىق - 2025» اتپەن قوستاناي وبلىسىنىڭ ءىلياس وماروۆ اتىنداعى قازاق دراما تەاترى دا تەاترىشىلىك فەستيۆالىن باستادى. فەستيۆالدىڭ نەگىزگى باعدارلاماسىنا 3 قويىلىم كىرسە، ءبىر سپەكتاكلدىڭ فەستيۆالدەن تىس كورسەتىلىمى ءوتتى. جۇيەلەنبەگەن رەپەرتۋار سىندى سەزىلگەنىمەن، قوستاناي توپىراعىن كۇندە باسا بەرمەسپىز دەپ، ۇسىنعاننىڭ ءبارىن كورۋگە تىرىستىق. فەستيۆال باعدارلاماسى جاڭا قويىلىمدارعا ەمەس، جالپى رەپەرتۋارداعى قويىلىمدارعا قۇرىلعان.

ساحنا ونەرى -  ادامزاتتىڭ ىشكى وي-جۇيەسىمەن عانا سەزىنەتىن دۇنيەلەرىنىڭ كوز بەن كوڭىلدى سەندىرەرلىك قۇدىرەتىنە يە كۇردەلى مادەني كەڭىستىك. ونىڭ ىشىندە،  تەاتر ونەرى كۇن سايىن بولىپ جاتقان وزگەرىستەردى يگەرمەسە قۇلدىراۋعا ۇشىرايدى. تەاتردىڭ جاڭا باسشىلىعى «جاس كەلسە - ىسكە» ۇستانىمىمەن بىرنەشە كۇردەلى جوبالاردى قولعا الىپ جاتقانىن تىلگە تيەك ەتتى. جوبالاردىڭ باستاماسى كاسىبي تەاترتانۋشىلاردى قويىلىمدارعا ارنايى شاقىرىپ، تەاتردىڭ باعىت-باعدارىن ناقتىلاۋعا تىرىسۋى بولعانى ءبىزدى قۋانتىپ وتىر.

ازىرگە، كورگەنىمىز ءhام تۇيگەنىمىز تۋرالى ءسوز قوزعاساق.

«ايتماتوۆ الەمى» رەجيسسەرلەردى قىزىقتىرا بىلەتىن، ومىرشەڭدىگىمەن باعالى، قۇندى الەم. فەستيۆال اياسىندا ەكى شىڭعىس ايتماتوۆتىڭ ەكى شىعارماسىن كوردىك.  العاشقى كۇنى «قۇس جولى» ن.ابدۋكادىروۆتىڭ (قىرعىزستان) رەجيسسۋراسىمەن كورىنسە، ەكىنشى كۇنى «تەڭىز جاعالاي جۇگىرگەن تارعىل توبەت» د.ءفيلليپوۆيچتىڭ (بەلورۋس) رەجيسسەرلىك شەشىمىنە ارقاۋ بولعان.

«قۇس جولى» پوۆەستىنىڭ جەلىسىمەن تۇڭعىش ۇلت تەاترىنان باستاپ بىرنەشە تەاترلاردا ءتۇرلى ينتەرپرەتاتسياعا تولى قويىلىمدار كوپشىلىككە جول تارتىپ كەلەدى. ءداستۇرلى باعىتتا ساحنالاعان رەجيسسەر مۇمكىندىگىنشە شىعارمانىڭ ءون بويىنداعى بوياۋىن ساقتاعىسى كەلگەن. بىراق، ول ءساتتى شىقپاعان. كەز-كەلگەن قويىلىمنىڭ شىعارمانىڭ يدەياسىنان بولەك ايتار ويى مەن ماقساتى بولۋى كەرەك. ول ناقتىلىق پەن كوركەمدىك بيىك دەڭگەيگە جەتكىزەتىن باستى قۇرال. ال، جالپىلاما بەيبىتشىلىككە ۇندەۋ، سوعىستىڭ بولماۋىن تىلەۋ سپەكتاكلگە ارقاۋ بولا المايدى. ول مەكتەپتە، دارىستە ايتىلۋى مۇمكىن. بىراق، ساحنادا ول وي ناقتى شەشىمدەرگە اينالۋى قاجەت. قويىلىمدا بىرنەشە تەاتر ەلەمەنتتەرى قولدانىلعان. شارتتى تەاتر، كولەڭكەلى تەاتر سىندى باعىتتاردى قوسقانىمەن قويىلىمنىڭ قۇرىلىمىنا ساي تولىق يگەرىلمەگەن. كولەمدى شىعارمانىڭ ساحنالىق نۇسقاسىن (ينستسەنيروۆكا) جاساۋدا بايانداۋ سارىنى باسىم. اجال مەن جەر انا كەيىپكەرلەرىنىڭ اعاشاياق (حودۋلي) ءمىنىپ شىعىپ، تولعانايمەن ديالوگ قۇرۋى استە، ساناعا سىيىمسىز. تەك ءولىم ساحنالارى بولاتىن كەزدە شىقسا نەمەسە ءوزىنىڭ ءبىر ساتتىك كورىنۋىمەن كورەرمەنگە وي سالسا تۇسىنەر ەدىك. ساحناعا بىرنەشە رەت شىعىپ، اينالا ءجۇرۋى كەيىپكەر ماقساتىن تۇسىنۋگە كەدەرگى كەلتىرمەسە، ەش كومەك بولعان جوق. قويىلىمنىڭ قۇنىن ءتۇسىرىپ تۇرعان تاعى ءبىر شەشىم – دەكوراتسيا. ءيا، كوپ دەتالدەر وقيعانىڭ ءوتىپ جاتقان كەزەڭىن كورسەتۋ ءۇشىن قولدانىلعان. بىراق، ايشىقتاي تۇسەتىن كوركەمدىك دەڭگەيگە كوتەرىلە الماعان.

سپەكتاكلدىڭ رەپەرتۋاردا ءجۇرىپ كەلە جاتقانىنا بەس جىلدان استام ۋاقىت بولعانىن ەسكەرسەك، قازىرگى قويىلىمنىڭ بار جۇگى اكتەرلەردىڭ يىعىنا اسىلىپ تۇر. اتاپ ايتقاندا ءاليمان - د.تۇرسىن مەن تولعاناي - ز.بەگايداروۆا بەينەلەرىنە قۇرىلعان وقيعا ەكى اكتريسانىڭ شەبەرلىگىمەن ۇشتاسىپ، ساحنانى ساندەي تۇسەدى. تۇتاس ءداۋىر اۋىرتپالىعىن ارقالاعان ەكى بەيباقتىڭ ءرولدى دامىتۋ ەۆوليۋتسيالارى كوز سۇيسىنتەرلىك. جاس تولعاناي بەينەسىنەن قاسىرەتتى جىلدارعا دەيىنگى ارالىق تا سەنىمدى. انا ءhام دانا تولعانايعا اينالدىراتىن بارلىق وقيعانى ءوز بيىگىندە ورنەكتەگەن زامزاگۇل بەگايداروۆا سول كەزەڭدەگى انالار بەينەسىن اسقاقتاتا تۇسەدى. اق جاۋلىعىن شەشپەي ءجۇرىپ، تاعدىردىڭ تاۋقىمەتىن تارتاتىن ول، مەيىرىمدىلىك پەن ادامدىقتىڭ سيمۆولى رەتىندە كورىنەدى. ادەتتە، سىرتتان شاقىرتىلعان رەجيسسەرلەرمەن جۇمىس سول ۋاقىتىندا ۇجىم ءۇشىن پايدالى بولعانىمەن، كەيىنىرەك جاڭادان قوسىلاتىن قۇرام ءۇشىن تەاتردىڭ رەجيسسەردى قايتا شاقىرتىپ، سپەكتاكلدى «تازالاۋ» مۇمكىندىگى بولا بەرمەيتىنى كەرى اسەرىن تيگىزەتىنى تاعى بار. سپەكتاكلدىڭ رەجيسسەرمەن جۇمىس جاساعان قۇرامى دەپ بولەك قاراستىرىپ الىپ جاتاتىنىمىز دا سودان. بۇل ماسەلە اتالمىش سپەكتاكلدى اينالىپ وتپەگەن. قويىلىمعا قوسىلعان جاس بۋىن ارتيستەر سپەكتاكلدىڭ سالماعىن، فورماسىن تۇسىنگەنمەن نەگىزگى لينيالاردى، قاي كەيىپكەرگە باسىمدىق بەرىلەتىنىن ۇعىنىپ ۇلگەرمەگەن. سودان بولار سوعىس كەزىندەگى بالالار «تىم» باقىتتى، ايعايعا تولى ساتتەرى كوپ. قويىلىمدا مىلتىق ۇستاۋ، بالداق ۇستاۋ، مۇگەدەكتەر ارباسىندا وتىرۋ، مىلقاۋ كەيىپكەر بولۋ سىندى ينەنىڭ جاسۋىنداي قاتەلىكتى كوتەرمەيتىن بەينەلەر بولادى. «قۇس جولىندا» تانىندە مۇكىستىگى بار پوچتاشى تەمىر ءرولىن سومداعان نۇرلىبەك كەنجەاحمەتوۆ اكتەرلىك شەبەرلىگىن ايتىپ وتكەن ءجون. بەينەنىڭ شىنايىلىعى مەن دالدىگىن ءدوپ باسقان ويىن ورنەگى بىرازعا دەيىن ۇمىتىلماستاي شىققان. ستسەنوگرافيالىق شەشىمدەرى كوركەمدىك جاعىنان كوز تويدىرا الماعانىمەن، كيىم ۇلگىلەرىنىڭ سۋرەتشىسى ساحنالىق ەستەتيكا مەن شىنايىلىقتىڭ ادەمى نۇكتەسىن تابا بىلگەن. مايسالبەك، قاسىم، جايناقتا شىنايىلىق، ساحنالىق تازالىق بار. ءوز كەزەگىندە، قۋانىشتان قايعىعا ءجۇرىپ وتەتىن بارلىق كەزەڭدى ءساتتى كەسكىندەگەن ءاليمان-ديانا تۇرسىننىڭ ەركىن كوسىلۋىنە ۇلەستەرىن قوسا العان.

كەلەسى كۇنى بەردىبەك سوقپاقباەۆتىڭ «مەنىڭ اتىم-قوجا» سپەكتاكلىنىڭ كورەرمەندەرى قاتارىنان تابىلدىق. جاس رەجيسسەر ەرالحان مىرزاحمەتتىڭ تىرناقالدى تۋىندىلارىنىڭ ءبىرى بولعان قويىلىم العاشقى ساحناسىنان-اق باۋراي ءبىلدى. بىرىنشىدەن، رەجيسسەردىڭ ءار قيلى تەاتر تاسىلدەرىن قولدانۋى سپەكتاكلدىڭ ويىمەن ۇندەس بولۋى قاجەت. وسى سۇرانىستىڭ ۇدەسىنەن شىعىپ شىمىلدىق اشىلماي تۇرىپ، قوجا – بەيبارىس قۇربانعالي اۆانستسەنادا ءوزى تۋرالى ءسوز باستايدى. پوۆەستەگى «بالاعا ات قويۋ» تۋرالى ويلاردى ۇتىمدى قولدانىپ، ساحنالىق نۇسقانىڭ وزىنە ساي ەرەكشەلىگىن تاپقان. كەيبىر تەاترلاردا اتالمىش سپەكتاكل ءفيلمنىڭ كوشىرمەسى بولىپ جۇرگەنى جاسىرىن ەمەس. كورەرمەنمەن بايلانىس ورناتۋ، ولاردى قويىلىمعا «قاتىسۋشى» ەتۋ ءتاسىلى ادەتتە، زاماناۋي دراماتۋرگيانى يگەرگەندە عانا قولدانىلادى. ال، مۇندا وتكەن داۋىردە جازىلعان شىعارمانىڭ بۇگىنگى كۇنمەن ۇندەستىگى تابىلعان. «مەن قوجامىن» دەپ شىعاتىن ءۇش كەيىپكەردىڭ ءوزارا ايتىسى، كورەرمەندەردىڭ ەسىمدەرىن سۇراۋى، جاسوسپىرىمدەردى وزىنە ەلىتىپ اكەتە الدى. ساحنادا باسى ارتىق دەكوراتسيا جوق، اۆانستسەنادان تومەن جايىلعان كىلەم توسەكپەن جالعاسىپ تومەنگە قاراي سوزىلىپ جاتىر. كيىم ىلگىشتە اكەسى قادىردىڭ كيگەن شينەلى مەن باس كيىمى جانە ساحنا شەتىندە وقۋ ۇستەلى قويىلعان.

مۋزىكالىق كوركەمدەۋ تۇرعىسىنان ۇلتتىق كولوريتتەرى ساقتالعان اندەر ءساتتى تاڭدالعان. «ساعىندىرعان اۋىلىم»، «احاۋ بيكەم»، «16 قىز»، «كۋا بول»، «ايگولەك»، «جايدارمان» سىندى جاس بۋىننىڭ ەسىنەن شىعىپ بارا جاتقان ەسكى دە ەستى اندەر قويىلىمنىڭ كوركىن اشا تۇسەدى.

قوجا مەن جاناردىڭ دويبى وينايتىن ساحناسىن زاماناۋي تىلدە شەشۋ، رەجيسسەرلىك يدەيا وقىلادى. دەگەنمەن، قوجانىڭ دويبى تاقتاسىن سىندىرىپ تاستاۋى، ارتيستەردىڭ سوزدەردى انىق ايتپاۋى كەي جەردە كورۋشىگە كەدەرگى كەلتىرگەنىن ايتا كەتۋ كەرەك. ءتورتىنشى قابىرعانى بۇزۋ، كەيىپكەردىڭ «وقشاۋلانۋ» ءادىسى قولدانىلعان سوڭ، ارتيست ءاربىر جاڭا دۇنيەگە دايىن، يمپروۆيزاتسيا مەن تەرەڭ ىزدەنىسكە دەن قويۋى شارت. جانە ول ساحنا زاڭدىلىقتارى شەگىنەن شىعىپ كەتسە دە، قويىلىمنىڭ بىرتۇتاستىعى ءاپ ساتتە شىتىنايدى. وسى تۇرعىدان قوجا-بەيبارىس قۇربانعاليعا اباي بولۋ قاجەت. جاس رەجيسسەردىڭ وزىندىك ءۇنى مەن سۋرەتكەرلىك كوزقاراسى ءۇشىن قول سوعۋعا بولادى.

بۇگىنگى تەاتر ونەرى كۇن سايىن ەمەس، ءسات سايىن تۇرلەنىپ جاتىر. الەم تەاترلارى تەرەڭ فيلوسوفياعا تولى كۇردەلى شىعارمالاردى يگەرۋدە. ە.حەمينگۋەيدىڭ «شال مەن تەڭىزى» سياقتى ش.ايتماتوۆتىڭ «تەڭىز جاعالاي جۇگىرگەن تارعىل توبەتى» تەرەڭ پسيحولوگياعا قۇرىلعان، ادام ءومىرىنىڭ بۋىن ساباقتاستىعى مەن تىرشىلىك فيلوسوفياسىن ارقاۋ ەتكەن شىعارمالار. ەكزيستەنتسياليزم جانرىنداعى تۋىندىلاردىڭ نوبەل سىيلىعىنا ۇسىنىلۋى دا جاي ەمەس. وسى شىعارماعا وزگەشە ءوڭ بەرۋگە تىرىسقان بەلورۋس رەجيسسەرى -دانيل فيلليپوۆيچ. جارىق پەن بوس كەڭىستىكتى بارىنشا يگەرۋگە تىرىسقان رەجيسسەردىڭ شەشىمدەرى نانىمدى. العاشقى ساحنالاردا تەڭىزگە شىعاتىن ادامداردىڭ تۇيىنشەككە توپىراقتى سالىپ الۋ ساتتەرى، كيريسكتىڭ اناسى مەن اكەسىنىڭ ديالوگى ارقىلى الداعى وقيعالارعا سىلتەمە جاساۋى، ءبىر جانۇياعا ءتونىپ تۇرعان قاۋىپ، شىڭعىس ايتماتوۆتىڭ شىنايى ومىردەگى وقيعالارىن دا قوسا وربىتەدى.

العاشىندا اۆتور رەتىندە شىعاتىن كيريسكىنىڭ (ماديار ادىلدابەكوۆ) بويىنان ۇرەي مەن قورقىنىش لەبى ەسكەنىمەن، ايتماتوۆ كەيىپكەرىنە ءتان وجەتتىلىك اڭعارىلمادى. كوبىنە بىرجاقتى زەرتتەۋ بولىپ، جاس ءارتيستىڭ تەرەڭدەي تۇسۋىنە ىشكى قورى جەتپەي جاتتى. وسى قارقىن كۇشى قويىلىمنىڭ كۋلميناتسياسىنا جەتە قويار ما ەكەن دەگەن كۇدىگىمىز، سوڭىندا سەيىلىپ اكتەر تابيعاتى اشىلا ءتۇستى. بۇل بەينەنى بۋىرقانعان داۋىلعا دەيىنگى جانە كەيىنگى كيريسك دەپ قاراستىرساق بولادى. جاس بالاعا ءتان كوزسىز باتىلدىق بىلىنە باستاعان سوڭعى ساحنالار وقيعاعا وزگەشە كوزقاراسپەن قاراۋىمىزعا اسەر ەتتى. شىعارمانىڭ جازىلۋ حرونيكاسىن اۆتوردىڭ ومىربايانىمەن پاراللەلدى كورسەتۋى رەجيسسەردىڭ ويىن نىقتاي تۇسەدى. دەيتۇرعانمەن، ونىڭ جەتكىزۋ فورماسى كوپشىلىك ساحناداعى پلاستيكالىق شەشىمدەردە قويىلىمنىڭ ءون بويىنا قابىسپادى. ەسكەكسىز قايىقتىڭ ۇستىندە، تۇمان اراسىندا قالىپ قويىپ، عۇمىرداعى ەشبىر تەپە-تەڭدىك بويىن بيلەي الماي تۇرعانىن جەتكىزگەن مىلگۋن – ەرحان باراقوۆ اشۋ-ىزانى دا قۇر ايعاي ەمەس، قاتقىل ءۇن مەن ىشكى ۇرەيىن جەڭۋگە دەگەن جانۇشىرعان حالمەن بەرۋى سەنىمدى. ال، مۋزلۋك - ديانا تۋرسىنوۆانىڭ جاس ەرەكشەلىگى ەمەس، ىشكى كۇيى ۇلكەن ەكەنى كورىنىپ، كيريسكپەن بولاتىن بالالىق تازالىعى باسىم ساحنالار سەنىمدىلىك سىيلاي المادى. رەجيسسەر افوريزمگە اينالاتىن ەڭ ماڭىزدى سوزدەردى قالدىرعان. بىراق، سول ويلار پالساپالىق تەرەڭدىككە بويلاي الماي، كوپ رەتتە كورەرمەن قۇلاعىنا جەتكەنمەن، جۇرەك تۇكپىرىنە جەتپەي جاتتى. ورگان قارت رولىندەگى قونىسبەك بەگايداروۆ بولمىس-ءبىتىمى، ومىرلىك جيعان قورى ايتماتوۆ تىلىمەن ايتقاندا «قۇرلىق پەن سۋلىقتىڭ ۇزىنا بويىنا جايلاعان ەكى زۇلمات دۇنيەنىڭ دامىلسىز ماڭگى-باقي شايقاسى» تۋرالى وقيعانىڭ تەرەڭدىگىن اشا تۇسەدى. ساحنانىڭ جوعارى جاعىنا ىلىنگەن عالامشار ىسپەتتى دوڭگەلەك اۆتوردىڭ وسى ويىن ناقتىلاي تۇسەدى. شىعارماداعى ءۇش ەرەسەك پەن ءبىر بالانىڭ ىشكى قايشىلىقتارى مەن ارپالىسى نەگىزگى ساحنالاردا جەتپپەي جاتتى.

كيريسك تارعىل توبەت قىراتىنىڭ جاعالاۋىنا جەتۋدى اڭسايتىن، ءوزىنىڭ العاشقى كۇرەسى تەك وسى ءتۇن ءۇشىن ەمەس عۇمىر بويىنا جالعاساتىنىن ءبىلىپ تۇرسا دا، ونىڭ قازىر ومىردەن باس تارتار ويى جوق. ول ەسكەكسىز قايىق ۇستىندە، تاماعىن جىبىتەر سۋى ءبىر قاسىق قالسا دا، اشتىقتان اسقازانى ەشنارسە سەزبەي، ءالى كەتسە دە قاراڭعى تۇننەن، جەل مەن تولقىننان دا قايمىقپايدى. ولارعا ات قويىپ، جاقىنداي تۇسۋگە تىرىسادى. كۇن شىقسا ۇشى-قيىرى جوق تەڭىزدە تاعى دا جالعىز قالارىن بىلسە دە، ءۇمىتىن ۇزبەك ەمەس. بۇل - بارلىق جاڭا، جاس بۋىنعا ءتان جارقىن كوزقاراس. سولاي بولۋى زاڭدىلىق تا. وسى ويلار كيريسك  ويىنىندا اڭعارىلادى. ۇلكەن داۋىلدا قايىققا قاۋىپ تەك سۋدان كەلەدى. وسى تەڭىزدىڭ تاسيتىن ءساتىن ساحنا شەتىنەن سۋ شاشۋمەن كورسەتۋى، جارىقتىڭ دۇرىس بەرىلمەۋىنەن سونداي جالاڭ، سەنىمسىز بولىپ جاتتى. اكتەر ويىنىنا كومەك بولار تۇستار كەرىسىنشە، كەدەرگى بولعانداي. شەكسىز سۋدىڭ ورتاسىندا تۇرىپ، سۋ سۇراپ، شولدەن ولۋدەن وتكەن سۇمدىق بار ما ەكەن. ادامداردىڭ ورتاسىندا عۇمىر كەشىپ، ادامدىق قاسيەتتى تاپپاعان بولمىس سەكىلدى، شاراسىزدىق. جاس اكتەر قويىلىم سوڭىنا قاراي وسى ماقساتقا جەتە جىعىلدى. انا مەن بالا اراسىنداعى نازىك يىرىمگە قۇرۋى سپەكتاكلدىڭ ومىرشەڭدىگىن ارتتىرىپ تۇردى. ۇرپاق ءۇشىن بولاتىن جانكەشتىلىك پەن تاۋەكەل تۋرالى قويىلىم الەم تەاتر كەڭىستىگىندەگى تاجىريبەلەردى قولدانۋىمەن ۇتىمدى.

ءىلياس وماروۆ اتىنداعى قازاق دراما تەاترى ءوز ولكەسىنىڭ عانا ەمەس، قازاق تەاتر كەڭىستىگىنىڭ قازىناسى. تەاتر عيماراتىنىڭ قازاقى ناقىشتاعى ديزاينىنىڭ ءوزى ۇلتتىق مۇددەگە قىزمەت اتقارۋى كەرەكتىگىن تانىتىپ تۇرعانداي. تەاتردىڭ ىشكى-سىرتقى مۇمكىندىگى مول ەكەنىن كوردىك. تەك، وسى پروتسەسس توقتاماۋى قاجەت. تەاتر - كورەرمەنىمەن عانا تەاتر. ءبىز كورگەن كەيبىر قويىلىمداردا كورەرمەن سانىنان ساحناداعى اكتەرلەر سانى كوپ ەكەنىن اڭعاردىق. بۇل -  ۇلكەن ماسەلە. جاقسى قويىلىم بولعان جەردە كورەرمەن بولادى. ادەتتە، ايماقتىق تەاترلار كورەرمەننىڭ كەلمەۋىن قالا حالقىنان، جاستاردىڭ جوقتىعىنان، بيۋدجەتتىڭ ازدىعىنان، مەنتاليتەتتىڭ وزگەشەلىگىنەن كورەدى. تەك، «وزدەرىنەن» كورمەيدى. قوستانايلىق قازاق تەاترى وزدەرىندەگى ولقىلىقتاردى كورە بىلەتىندىگمەن جانە ەندى عانا شيرەك عاسىرعا تولاتىن تەاتردىڭ جۇمىسىن جاقسارتۋعا دەگەن تالپىنىستارىمەن ءتانتى ەتتى. جاقسى كۇندەردىڭ، جاعىمدى جاڭالىقتاردىڭ كۋاسى بولۋعا اسىق ەكەنىمىزدى جاسىرمادىق.

بەيبىت الكەەۆا،

تەاترتانۋشى، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ وقىتۋشىسى

Abai.kz