ەڭبەك جانە حالىقتى الەۋمەتتىك قورعاۋ مينيسترلىگى ەڭبەك كىتاپشاسىنىڭ ماڭىزدىلىعىن جانە ونى تسيفرلىق فورماتقا كوشىرۋدىڭ نەگىزگى تەتىكتەرىن ءتۇسىندىردى، دەپ حابارلايدى BAQ.KZ ءتىلشىسى.

مينيسترلىك مالىمەتىنشە، ەڭبەك كىتاپشاسى — جۇمىسكەردىڭ بۇكىل ەڭبەك قىزمەتىن راستايتىن باستى قۇجاتتاردىڭ ءبىرى. وندا جۇمىسقا قابىلداۋ، باسقا قىزمەتكە اۋىستىرۋ جانە ەڭبەك شارتىن توقتاتۋ تۋرالى دەرەكتەر حرونولوگيالىق رەتپەن تىركەلەدى. بۇل قۇجات ەڭبەك ءوتىلى بار ازاماتتار ءۇشىن جۇمىسقا ورنالاسۋ كەزىندە تاجىريبەنى دالەلدەيتىن نەگىزگى قۇرال بولىپ سانالادى.

سونىمەن قاتار ەڭبەك كىتاپشاسى بەلگىلى ءبىر سالاداعى كاسىبي تاجىريبەنى نەمەسە بىلىكتىلىكتى راستاۋ ماقساتىندا دا قولدانىلادى.

الەۋمەتتىك كودەكسكە سايكەس، جاسىنا بايلانىستى زەينەتاقى تولەمدەرىن ەسەپتەۋ كەزىندە ەڭبەك ءوتىلى 1998 جىلعى 1 قاڭتارعا دەيىنگى كەزەڭ ءۇشىن ەڭبەك كىتاپشاسىمەن راستالادى. ەگەر ەڭبەك كىتاپشاسى جوق بولسا نەمەسە وندا ءتيىستى جازبالار جۇرگىزىلمەگەن جاعدايدا، ەڭبەك ءوتىلىن راستايتىن وزگە قۇجاتتار نەمەسە سوت شەشىمى نەگىزگە الىنادى.

2020 جىلعى 4 مامىردا ەڭبەك كودەكسىنە ەنگىزىلگەن وزگەرىستەرگە سايكەس، جۇمىس بەرۋشىلەر ەندى قىزمەتكەرلەرمەن ەڭبەك شارتىن جاساۋ جانە توقتاتۋ تۋرالى اقپاراتتى ەڭبەك شارتتارىن ەسەپكە الۋدىڭ بىرىڭعاي جۇيەسىنە ەنگىزۋگە مىندەتتى.

بۇل جۇيە ۋاكىلەتتى مەملەكەتتىك ەڭبەك ورگانى بەلگىلەگەن تارتىپپەن جۇرگىزىلەدى جانە 2020 جىلدان باستاپ جۇمىسكەردىڭ ەڭبەك قىزمەتى تەك قاعاز تۇرىندەگى قۇجاتتارمەن عانا ەمەس، سونىمەن قاتار تسيفرلىق بازا ارقىلى دا راستالۋى مۇمكىن.

Abai.kz