بۇرىن ەليتالىق پرەزيدەنت رەزيدەنتسياسى بولعان پاۆلودار وبلىسىنداعى «جانباقى-ارناسى» (قازىرگى «Jasybai Resort» دەمالىس ورنى) مەملەكەت مەنشىگىنە قايتارىلدى.

بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ پاۆلودار وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى اسەت وسپانوۆ حابارلادى. 

«بۇرىن ەليتالىق رەزيدەنتسيا بولعان «Jasybai Resort» دەمالىس ورنى مەملەكەت مەنشىگىنە قايتارىلدى. ەرەكشە قورعالاتىن تابيعي اۋماقتا ورنالاسقان ەليتالىق دەمالىس ءۇيى جەكەشەلەندىرۋگە جاتپايدى. الايدا باسىندا ءبىر جاۋاپكەرشىلىگى شەكتەۋلى سەرىكتەستىك بۇل دەمالىس ءۇيىنىڭ يەسى بولعان. كەيىن ونى باسقا جشس يەلەنگەن. پاۆلودار وبلىسى اكىمدىگىنىڭ قاۋلىسىمەن «Jasybai Resort» دەمالىس ءۇيى باياناۋىل اۋدانى اكىمدىگىنىڭ بالانسىنا بەرىلدى»، - دەيدى اسەت وسپانوۆ.

جاسىباي كولىنىڭ جاعاسىنداعى بۇرىنعى پرەزيدەنت رەزيدەنتسياسى جەكەشەلەندىرۋگە جاتپايدى. سوت بۇرىنعى ساتىپ الۋ-ساتۋ شارتىن جانە مۇلىكتى جارعىلىق كاپيتالعا قابىلداۋ-تاپسىرۋ اكتىسىن جارامسىز دەپ تانىعان.

انتيكور سوڭعى بەس جىلدا ەرتىس ورمانىنىڭ 2 مىڭ تەكشە مەترى وتالىپ كەتكەنىن انىقتاعان.

Abai.kz