قازاقستاندا قانداستارعا ارنالعان ستيپەنديالىق باعدارلاماعا قۇجات قابىلداۋ باستالدى...

قازاقستان شەتەلدىك تالاپكەرلەرگە ەلىمىزدىڭ جوعارى وقۋ ورىندارىندا ءبىلىم الۋعا مۇمكىندىك بەرەتىن ستيپەنديالىق باعدارلاما جاريالادى. قۇجات قابىلداۋ 2025 جىلعى 30 ناۋرىز بەن 31 مامىر ارالىعىندا ونلاين تۇردە جۇرگىزىلەدى. ۇمىتكەرلەر وتىنىمدەرىن studyin.kz/admission سايتى ارقىلى تاپسىرا الادى.

بيىل بولىنگەن گرانت سانى:

باكالاۆريات – 490 گرانت

ماگيستراتۋرا – 50 گرانت

PhD دوكتورانتۋرا – 10 گرانت

باعدارلامانىڭ وپەراتورى – «حالىقارالىق باعدارلامالار ورتالىعى» اق.

بۇل باستاما شەتەلدىك جاستار ءۇشىن قازاقستاندا ساپالى ءبىلىم الۋعا جول اشىپ قانا قويماي، ەلىمىزدىڭ ءبىلىم بەرۋ جۇيەسىن حالىقارالىق دەڭگەيدە ىلگەرىلەتۋگە دە سەرپىن بەرمەك. ۇمىتكەرلەر ءوتىنىمدى قازاق، ورىس نەمەسە اعىلشىن تىلىندە تاپسىرا الادى.

باكالاۆرياتقا تۇسۋشىلەرگە قويىلاتىن نەگىزگى تالاپتار:

• جەكە باسىن كۋالاندىراتىن قۇجاتتىڭ (سونىڭ ىشىندە بوسقىن كۋالىگى بولسا – ونىڭ دا) كوشىرمەسى;
• ورتا ءبىلىم تۋرالى قۇجات پەن ترانسكريپتتىڭ نوتاريالدى كۋالاندىرىلعان اۋدارماسى (قازاق، ورىس نەمەسە اعىلشىن تىلىندە);
• ورتاشا وقۋ ۇلگەرىمى كەمىندە “جاقسى” بولۋى قاجەت (بوسقىن مارتەبەسى بار ۇمىتكەرلەرگە تالاپ جەڭىلدەۋى مۇمكىن);
• ورتا ءبىلىم قۇجاتى بولماعان جاعدايدا – وقۋ ورنىنان انىقتاما مەن اعىمداعى باعالار كورسەتىلگەن قۇجات (اۋدارماسىمەن بىرگە);
• قازاق، ورىس نەمەسە اعىلشىن تىلىندەگى ۋاجدەمەلىك ەسسە;
• بۇرىنعى وقۋ ورنىنان نەمەسە جۇمىس بەرۋشىدەن ەكى ۇسىنىم حات;
• دەنساۋلىق جاعدايى تۋرالى مەديتسينالىق انىقتاما جانە ايتۆ/جقتب جوقتىعىن راستايتىن انىقتاما;
• تولتىرىلعان ساۋالناما (https://bolashak.gov.kz/.../mitkerge-ojylatyn-talaptar);
• قازاقستاندىق جوعارى وقۋ ورنىنان شاقىرۋ حاتى (ەگەر بار بولسا).

ەرەكشە اتاپ ايتاتىن ءبىر ءتۇيىن: بۇل باعدارلاما اياسىندا اسىرەسە شەتەلدەگى قازاق دياسپوراسىنا ەرەكشە مۇمكىندىك بەرىلىپ وتىر. قازاقستان شەكاراسىنان تىسقارى جاتقان قانداس جاستاردىڭ تاريحي وتانىندا ءبىلىم الۋىنا بارلىق جاعداي جاسالۋدا. بۇل –تاۋەلسىز قازاقستاننىڭ الەمدەگى قازاققا ارناعان شىنايى جاناشىرلىعىنىڭ كورىنىسى.

مەملەكەت شەتەلدەگى قانداستاردىڭ ءبىلىم الىپ، ەلگە قىزمەت ەتۋىنە جول اشۋ ارقىلى ۇلت بىرلىگىن نىعايتۋ، رۋحاني بايلانىستاردى بەكەمدەۋ جانە ءبىلىمدى جاستاردى ەل دامۋىنا جۇمىلدىرۋدى كوزدەيدى.

ستيپەنديالىق باعدارلاما اياسىندا ءبىلىم الۋ عانا ەمەس، شاكىرتاقى، جاتاقحانا، مەديتسينالىق ساقتاندىرۋ جانە وزگە دە الەۋمەتتىك قولداۋلار قاراستىرىلعان. بۇل – قازاقستاننىڭ حالىقارالىق ءبىلىم نارىعىنداعى تارتىمدىلىعىن ارتتىرۋمەن قاتار، ءوز ۇلتىنا دەگەن جاناشىر ساياساتىنىڭ ءبىر كورىنىسى.

تولىق اقپاراتتى https://bolashak.gov.kz/kz/ctipendiyaly-badarlama سايتىنان قاراڭىز.

Abai.kz