قازاقستانداعى جۋرناليستەر قاڭتار وقيعاسىنان كەيىن شەتەلگە كەتىپ قالعان «ەسكى قازاقستان» وكىلدەرىنىڭ الماتىعا كەلىپ-كەتۋىن تورۋىلداي باستادى.

سوۆمين ەمحاناسىندا جاتقان سارا الپىسقىزىنىڭ جاعدايىن ءبىلۋ ءۇشىن بۇرىنعى يستيبليشمەنتتىڭ ءبىراز وكىلى الماتىعا ات باسىن بۇرۋى ءتيىس. مەملەكەت تە ءوز تاراپىنان سارا الپىسقىزىمەن قوشتاسۋ ءراسىمىن پىسىقتاۋدا. الماتى اكىمدىگىنە «ءتيىستى شارالاردى قازىردەن باستاپ قاراستىرا بەرسىن» دەگەن بەيرەسمي حابارلاما كەلگەن. قازىر سارا الپىسقىزى 84 جاستا. DALA INSIDE دەرەككوزى دە سارا الپىسقىزىنىڭ دەنساۋلىعى كۇرت سىر بەرگەنىن راستاپ وتىر.

«ول كىسىنىڭ جاعدايى سوڭعى ەكى جىلدا قاتتى ناشارلادى. تولىق مەديتسينالىق كۇتىم جاسالسا دا، كارىلىكتىڭ اتى كارىلىك. نازارباەۆقا قاتىستى ءتۇرلى الىپ-قاشپا اڭگىمەلەر دە جۇرەكتى اۋىرتتى. قاڭتار وقيعاسى جانعا باتتى. وسىنىڭ بارلىعى جيناقتالا كەلە اعزاعا اۋىر سالماق بولدى»، - دەيدى، دەرەككوز.

قازاقستان حالقىنىڭ سارا الپىسقىزىنا كوزقاراسى جامان ەمەس. ول كىسى تاۋەلسىزدىكتىڭ العاشقى 5-7 جىلىندا عانا تۇڭعىش پرەزيدەنتتىڭ قاسىندا بولدى. بيزنەسكە، تاققا ارالاسپادى. قايىرىمدىلىقپەن اينالىستى. نۇرسۇلتان نازارباەۆپەن 2005-2010 جىلدار ارالىعىندا رەسمي اجىراسىپ، ارتىنان ءوزىنىڭ قوناقاەۆا تەگىنە قايتا ورالدى. سارا الپىسقىزى 1941 جىلدىڭ اقپانىندا قاراعاندى وبلىسىندا دۇنيەگە كەلگەن. ول نۇرسۇلتان نازارباەۆپەن 1962 جىلى وتاۋ قۇردى. بۇل وتباسى ومىرگە داريعا، دينارا مەن ءاليا ەسىمدى ءۇش قىز اكەلىپ، تاربيلەپ ءوسىردى.

دەرەككوزدىڭ ايتۋىنشا، سارا الپىسقىزى ومىردەن وتكەن جاعدايدا، ۇكىمەت قوشتاسۋ راسىمىنە مەملەكەتتىك ستاتۋس بەرىپ، ءتيىستى دەڭگەيدە وتكىزبەك. ول كىسىگە قازىر ەل باسقارىپ ولتىرعان كوپتەگەن تۇلعالاردىڭ ءىلتيپاتى ەرەكشە. سارا قوناقاەۆا قازىرگى تاڭدا ەكس-پرەزيدەنتتىڭ وتباسى مۇشەسى بولىپ سانالمايدى. سوندىقتان ونىڭ دەنساۋلىق جاعدايىنا قاتىستى اقپارات مەملەكەتتىك قۇپيا ەمەس.

Abai.kz