شەرزات ءىسى بويىنشا كەزەكتى پروتسەسستىڭ الدىندا سۋديا ەرجان جانۇزاقوۆ ۇندەۋ جاساپ، سوتقا قىسىم جاساۋعا جول بەرىلمەيتىنى تۋرالى مالىمدەدى.

ەرجان جانۇزاقوۆ:

قۇرمەتتى سوت پروتسەسىنە قاتىسۋشىلار!

الەۋمەتتىك جەلىلەردە ىسكە مۇلدەم قاتىسى جوق بلوگەرلەر مەن باسقا دا ازاماتتار تەرگەۋ ارەكەتتەرى مەن سوت تالقىلاۋى بارىسىنا قاتىستى جەكە پىكىرىن ءبىلدىرىپ، سۋبەكتيۆتى باعا بەرىپ جاتىر.

وسىعان بايلانىستى ەسكە سالامىز: قازاقستان رەسپۋبليكاسى كونستيتۋتسياسىنىڭ 75-بابىنىڭ 1-تارماعىنا سايكەس، قازاقستان رەسپۋبليكاسىندا سوت تورەلىگىن تەك سوت قانا جۇزەگە اسىرادى. سونىمەن قاتار، سوت تورەلىگىن جۇزەگە اسىرۋ جونىندەگى سوت قىزمەتىنە قانداي دا ءبىر ارالاسۋعا جول بەرىلمەيدى جانە ول زاڭدا بەلگىلەنگەن جاۋاپتىلىققا اكەپ سوعادى.

ءىس قارالىپ ءبىتىپ، ۇكىم شىعىپ جانە ول زاڭدى كۇشىنە ەنگەنگە دەيىن سوت پروتسەسىن تۇسىندىرۋگە، اسىرەسە وعان قۇقىقتىق باعا بەرۋگە جول بەرىلمەيدى.

سوت ءىس بويىنشا بارلىق ءمان-جايدى جان-جاقتى، تولىق جانە وبەكتيۆتى تۇردە زەرتتەۋگە، ايىپتاۋ مەن قورعاۋ تاراپتارىنىڭ دالەلدەمەلەرىن تەكسەرۋگە مىندەتتى. ءىستى قارايتىن سۋديا تاۋەلسىز ءارى وبەكتيۆتى بولۋى، ءىستىڭ ناتيجەسىنە جەكە مۇددەلىلىگى بولماۋى جانە مۇددەلى تاراپتاردىڭ ىقپالىنا تۇسپەۋى ءتيىس.

سوت تەك زاڭعا سۇيەنە وتىرىپ، بەيتاراپ تورەشى رەتىندە ارەكەت ەتەدى.

قازىرگى ۋاقىتتا ءىس سوت تەرگەۋ ساتىسىندا. قورىتىندى ۇكىم ءالى شىعارىلعان جوق. سوت شەشىمدى تەك وبەكتيۆتى جانە داۋسىز دالەلدەر نەگىزىندە قابىلدايدى. ۇكىم شىققانعا دەيىن سوتقا قىسىم جاساۋعا، نەگىزسىز جانە دالەلسىز سىن ايتۋعا جول بەرىلمەيدى.

ىسكە قاتىستى سۋبەكتيۆتى پىكىرلەر تاراتۋعا بولمايدى. بۇل كەيبىر جاعدايلاردا سوتقا قىسىم جاساۋ ارەكەتى رەتىندە باعالانۋى مۇمكىن.

سوت جۇيەسىنە قۇرمەت كورسەتۋ جانە سوتقا دەگەن سەنىم — قۇقىقتىق مەملەكەت پەن ءادىل سوت تورەلىگىنىڭ نەگىزى بولىپ تابىلادى.

وسىعان بايلانىستى بلوگەرلەر مەن باسقا دا جەلى قولدانۋشىلارىن ارانداتۋشىلىق سيپاتتاعى ارەكەتتەردەن اۋلاق بولۋعا شاقىرامىز.

سوت پروتسەسى اشىق تۇردە ءوتىپ جاتىر جانە سوت وبەكتيۆتى ءارى نەگىزدەلگەن ۇكىم شىعاراتىنىنا كەپىلدىك بەرەدى.

Abai.kz