كەشە رەسەي پرەزيدەنتى پۋتين بۇگىن ستامبۇلدا باستالاتىن ۋكراينا مەن رەسەي كەلىسسوزىنە بايلانىستى كەڭەس وتكىزدى. جيىننان كەيىن كەلىسسوزگە قاتىساتىن رەسەي وكىلدەرىنىڭ قۇرامى بەلگىلى بولدى. ولار: رەسەي پرەزيدەنتىنىڭ كەڭەسشىسى ۆلاديمير مەدينيسكي، سىرتقى ىستەر ءمينيسترىنىڭ ورىنباسارى ميحايل گالۋزين، قورعانىس ءمينيسترىنىڭ ورىنباسارى الەكساندر فومين، رەسەي قارۋلى كۇشتەرى باس شتابىنىڭ باسقارماسىنىڭ جەتەكشىسى يگور كوستيۋكوۆ قاتارلىلار.

كورىپ وتىرعانىمىزداي رەسمي تىزىمدە پۋتين تۇگىلى لاۆروۆ تا، يۋري ۋشاكوۆ تا جوق. الەم جۇرتى كەلىسسوزگە پۋتين قاتىسسا وزگەرىس بولاتىنىنا، سوعىس توقتايتىنىنا ءۇمىت ارتقان ەدى. اراب ەلدەرىن ارالاپ جۇرگەن اقش پرەزيدەنتى ترامپ تا پۋتين كەلىسسوزگە كەلسە، ءوزىنىڭ دە تۇركياعا ايالدايتىنىن ايتقان ەدى. ءتىزىمدى كورگەن سوڭ ول دا تۇركياعا كەلمەيتىنىن مالىمدەدى. اقش تارابىنان كەلىسسوزدى اقش مەملەكەت ىستەر حاتشىسى رۋبيو، ترامپتىڭ ارنايى وكىلى ۋيتكوفف، ۋكراينا مەن رەسەي ماسەلەسى جونىندەگى وكىلى كيت كەللوگ باقىلايدى.

بۇگىن تاڭەرتەڭ ءپۋتيننىڭ ءباسپاسوز حاتشىسى پەسكوۆ كەزدەسۋدىڭ تۇركيا پرەزيدەنتى ەردوعاننىڭ ستامبۋلداعى رەزيدەنتسياسىندا وتەتىنىن حابارلادى. زەلەنسكيدىڭ كەشە تۇندە تۇركياعا اتتانعانى ءمالىم بولعان ەدى.

ساراپشىلار رەسەي قۇرامىنىڭ دەڭگەيىنە قاراپ، كەلىسسوزدەن ۇلكەن ناتيجە شىقپايتىنىن بولجاپ وتىر. رەسەي قۇرامىن باستاپ باراتىن مەدينسكي 2022 جىلى ەردوعاننىڭ اراعايىندىعىمەن وتكەن كەلىسسوزگە دە جەتەكشى بولعان ەدى. ول جولعى كەلىسسوزدە ۋكراينانىڭ ناتو-عا مۇشە بولماۋى، ەۋروپا ەلدەرىنىڭ كيەۆكە اسكەري كومەگىن دەرەۋ توقتاتۋى سياقتى تالاپتار ايتىلعان-دى. ۋكراينا ول تالاپتاردان باس تارتقان. وسى جولعى كەلىسسوزدە سول ەسكى اۋەنمەن وتەدى دەپ بولجانۋدا.

سونى بىلگەندەي ەۋروپا ەلدەرى كەشە رەسەيگە قارسى 17-ءشى رەتكى سانكتسياسىن جاريالادى. وندا رەسەيدىڭ سانكتسيادان جالتاراتىن، كولەڭكەدەگى 200 مۇناي تاسيتىن كەمەسىنە، 30 اسكەري وندىرىسپەن بايلانىسى بار كومپانياعا، 70 جەكە جانە زاڭدى تۇلعالارعا شەكتەۋ ەنگىزىلگەن.

مامىردىڭ 13-ءى كۇنى قىتايدا ساپاردا جۇرگەن برازيليا پرەزيدەنتى لۋلا دا پۋتين مەن زەلەنسكيدى ستامبۇلدا بەتپە-بەت كەزدەسۋگە شاقىرىپ، قىتاي باسشىسىمەن بىرگە "قىتاي مەن برازيليانىڭ ۋكراينا ماسەلەسى جونىندەگى بىرلەسكەن مالىمدەمەسىن" جاريالاپ، ەكى ەل باسشىسىن تىكە كەزدەسىپ، سوعىستى ءبىر جولاتا توقتاتۋعا ۇندەدى. ناقتى جاعداي كورسەتكەندەي اق باسشىسى ترامپتىڭ دا، ءپۋتيننىڭ وداقتاستارىنىڭ دا كۇتكەن ءۇمىتى اقتالمايتىنى ءمالىم بولدى. كرەمل قوجايىنى تاعى دا تۇلكىبۇلاڭعا باستى.

Abai.kz