وتكەن جىلى قازاقستان مەن بولگاريا اراسىنداعى تاۋار اينالىمى 4 ەسەگە جۋىق وسكەن.

20 مامىردا سوفيادا (بولگاريا رەسپۋبليكاسى) ەكونوميكالىق ىنتىماقتاستىق جونىندەگى قازاقستان-بولگاريا ۇكىمەتارالىق كوميسسياسىنىڭ 5-وتىرىسى وتكىزىلدى. ءىس-شارا قازاقستان رەسپۋبليكاسى پرەمەر-ءمينيسترىنىڭ ورىنباسارى-ۇلتتىق ەكونوميكا ءمينيسترى سەرىك جۇمانعارين مەن بولگاريا رەسپۋبليكاسىنىڭ ەكونوميكا جانە ونەركاسىپ ءمينيسترى پەترا ديلوۆتىڭ توراعالىعىمەن ءوتتى.

سۋرەت: gov.kz سايتىنان الىندى.

بىرلەسكەن كوميسسيا توراعالارى قازاقستان مەن بولگاريا اراسىندا ديپلوماتيالىق قاتىناس ورناعان 30 جىلدان اسا ۋاقىتتان بەرى ەكى ەل دوستىق پەن ارىپتەستىك بايلانىستى بەرىك ۇستانىپ كەلە جاتقانىن ريزاشىلىقپەن اتاپ ءوتتى. تاراپتار ساۋدا مەن ينۆەستيتسيا، كولىك، ونەركاسىپ، اۋىل شارۋاشىلىعى، تۋريزم، ەنەرگەتيكا، مادەنيەت پەن ءبىلىم بەرۋ سالاسىنداعى ءوزارا ءىس-قيمىلدى تەرەڭدەتۋ ماسەلەسىن ەگجەي-تەگجەيلى تالقىلادى.

سۋرەت: gov.kz سايتىنان الىندى.

وتىرىسپەن قاتار ەكى ەل ىسكەر توپتارى وكىلدەرى قاتىسقان قازاقستان-بولگار بيزنەس-فورۋمى وتكىزىلدى.

جيىن قورىتىندىسىندا تاراپتار تۇراقتى بايلانىستى ساقتاپ، ەكى ەل اراسىنداعى ءوزارا ءتيىمدى قارىم-قاتىناستى ودان ءارى كەڭەيتۋ ءۇشىن كۇش-جىگەرىن قوسۋعا دايىن ەكەنىن ءبىلدىردى. قول جەتكىزىلگەن ۋاعدالاستىق بەسىنشى ۇكىمەتارالىق كوميسسيا حاتتاماسىنا قول قويۋمەن بەكىتىلدى.

سۋرەت: gov.kz سايتىنان الىندى.

بۇگىندە قازاقستاندا بولگاريانىڭ تاۋ-كەن، وڭدەۋ ونەركاسىبى، قۇرىلىس، كولىك، بولشەك ساۋدا مەن عىلىمعا قاتىستى 60-تان استام كاسىپورىنى تابىستى جۇمىس ىستەيدى. تاراپتار كووپەراتسيانى تەرەڭدەتۋدىڭ پەرسپەكتيۆاسىن اۋىل شارۋاشىلىعى ءونىمىن بىرلەسىپ وڭدەۋ، لوگيستيكالىق حابتى دامىتۋ، جاڭا يندۋستريالىق جوبالاردى ىسكە قوسۋدان كورەدى.

سۋرەت: gov.kz سايتىنان الىندى.

2024 جىلعى قورىتىندى بويىنشا قازاقستان مەن بولگاريا اراسىنداعى ءوزارا ساۋدا كولەمى 2023 جىلمەن سالىستىرعاندا ءتورت ەسە ارتىپ، 375,2 ملن اقش دوللارىنا جەتتى. وتكەن جىلى قازاقستان ەكونوميكاسىنا سالىنعان بولگار ينۆەستيتسياسىنىڭ كولەمى 7,8 ملن دوللار. بۇل بۇرناعى جىلمەن سالىستىرعاندا 86,5%-عا ارتىق. 2025 جىلعى قاڭتار-ناۋرىزداعى تاۋار اينالىمى 66,6 ملن. اقش دوللارى. بۇل وتكەن جىلعى سايكەس كەزەڭمەن سالىستىرعاندا 93,3%-عا جوعارى (34,5 ملن. اقش). بۇل رەتتە قازاقستاننىڭ بولگارياعا ەكسپورتى بيىلعى ءبىرىنشى توقساندا 2,4 ەسە ءوسىپ، 51,4 ملن. اقش دوللارىنا جەتتى.

Abai.kz