قر تۋريزم جانە سپورت ءمينيسترى ەربول مىرزابوسىنوۆ قىتايدا وتكەن شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ سپورتقا جاۋاپتى مينيسترلەرىنىڭ كەڭەسى اياسىندا وزبەكستان سپورت ءمينيسترىنىڭ ورىنباسارى مۋراد يسمايلوۆپەن كەزدەستى.

كەزدەسۋ بارىسىندا تاراپتار سپورت سالاسىنداعى ءوزارا ءىس-قيمىلدىڭ وزەكتى ماسەلەلەرىن تالقىلادى. اتاپ ايتقاندا، ەكى ەل سپورتشىلارىنىڭ حالىقارالىق جارىستارعا قاتىسۋى، بىرلەسكەن وقۋ-جاتتىعۋ جيىندارىن ۇيىمداستىرۋ، سونداي-اق سپورت فەدەراتسيالارى اراسىنداعى ىنتىماقتاستىقتىڭ بولاشاعى ءسوز بولدى.

سۋرەت: QR Turizm jäne sport ministrlıgı تەلەگرام ارناسىنان الىندى.

«قازاقستان مەن وزبەكستان اراسىندا سپورت سالاسىندا دوستىققا نەگىزدەلگەن، مازمۇندى قارىم-قاتىناس قارقىندى دامىپ كەلەدى. وزبەكستاندىق سپورتشىلاردىڭ ەلىمىزدە وتەتىن جارىستارعا بەلسەندى قاتىسۋىن جوعارى باعالايمىز. سونداي-اق وقۋ-جاتتىعۋ جيىندارى اياسىنداعى ەكىجاقتى تاجىريبە الماسۋدىڭ وڭ ديناميكاسى بايقالادى. پاريجدەگى وليمپيا ويىندارىندا وزبەكستان قۇراماسىنىڭ ءساتتى ونەر كورسەتۋىن جانە ەلىمىزدە وتكەن 5-ءشى دۇنيەجۇزىلىك كوشپەندىلەر ويىندارىنىڭ تابىستى وتۋىنە قوسقان زور ۇلەسىن ەرەكشە اتاپ وتكىم كەلەدى. بۇل ويىنداردا ءداستۇرلى ۇلتتىق سپورت تۇرلەرى لايىقتى دەڭگەيدە دارىپتەلدى. ءبىز ىنتىماقتاستىقتى ودان ءارى تەرەڭدەتۋگە، سپورت عىلىمىن دامىتۋ، جاتتىقتىرۋشىلاردى دايارلاۋ جانە سپورت ارقىلى مادەني قۇندىلىقتاردى ىلگەرىلەتۋ باعىتىندا جاڭا باستامالاردى بىرلەسە جۇزەگە اسىرۋعا دايىنبىز. ءبىزدىڭ ارىپتەستىگىمىزدىڭ الەۋەتى زور ەكەنىنە سەنىمدىمىن. ورتالىق ازيادا مىقتى سپورتتىق ورتانى قالىپتاستىرۋعا بىرگە ۇلەس قوسا الامىز»، – دەدى ەربول مىرزابوسىنوۆ.

كەزدەسۋ سوڭىندا مۋراد يسمايلوۆ ەربول مىرزابوسىنوۆتى وزبەكستانعا جۇمىس ساپارىمەن كەلۋگە شاقىردى.

Abai.kz