قازاقستان پارلامەنتى ءماجىلىسىنىڭ توراعاسى ەرلان قوشانوۆ پەن قىرعىز رەسپۋبليكاسى جوگوركۋ كەنەشىنىڭ توراعاسى نۋرلانبەك تۋرگۋنبەك ۋلۋ استانادا قازاقستان-قىرعىزستان پارلامەنتارالىق ىنتىماقتاستىق كەڭەسىنىڭ ءۇشىنشى وتىرىسىن وتكىزدى. وندا تاراپتار ەكىجاقتى ىنتىماقتاستىقتى كەڭەيتۋ جانە پارلامەنتارالىق بايلانىستى دامىتۋ بويىنشا جوعارى دەڭگەيدەگى كەلىسىمدەردى جۇزەگە اسىرۋ بارىسىن تالقىلادى.

جوگوركۋ كەنەش دەلەگاتسياسىن قارسى العان ءماجىلىس سپيكەرى قازاق پەن قىرعىز حالىقتارىن ەجەلدەن ورتاق تاريحى، ۇقساس ءتىلى، سالت-ءداستۇرى مەن مادەنيەتى بىرىكتىرەتىنىن اتاپ ءوتتى.  ال ەكى ەل اراسىنداعى دوستىق پەن تاتۋ كورشىلىك قارىم-قاتىناستىڭ تامىرى تەرەڭدە جاتىر.

سۋرەتتى تۇسىرگەن ج. جۇمابەكوۆ، ت.تانىباەۆ.

– مەملەكەت باسشىلارىمىز قاسىم-جومارت كەمەلۇلى توقاەۆ پەن سادىر نۋرگوجوەۆيچ جاپاروۆتىڭ ساليقالى ساياساتىنىڭ، ءوزارا تۇسىنىستىك پەن دوستىعىنىڭ ارقاسىندا بۇگىندە ەكى ەل اراسىنداعى ىنتىماقتاستىق وتە قارقىندى دامىپ كەلەدى. ءبىزدىڭ كوشباسشىلارىمىزدىڭ ەكىجاقتى كەزدەسۋلەرىنىڭ قارقىندىلىعى پارلامەنتارالىق بايلانىستاردىڭ جيىلىگىنە دە تىكەلەي اسەر ەتەدى. ءبىزدىڭ ەندىگى ماقساتىمىز – وسى ەكپىندى ساقتاپ، ودان ءارى نىعايتۋ، – دەدى ە.قوشانوۆ.

ءماجىلىس سپيكەرى پرەزيدەنتتەرىمىز ىقپالداستىقتىڭ باسىم باعىتتارىن ايقىنداپ، ولاردى جۇزەگە اسىرۋ ءۇشىن ناقتى مىندەتتەر جۇكتەگەنىن باسا ايتتى. ونىڭ نەگىزگىلەرىنىڭ ءبىرى – 2030 جىلعا قاراي ەكى ەل اراسىنداعى تاۋار اينالىمىن 3 ميلليارد اقش دوللارىنا دەيىن جەتكىزۋ. ءماجىلىس ەكى اپتا بۇرىن راتيفيكاتسيالاعان قازاقستان مەن قىرعىزستان اراسىنداعى وداقتاستىق قاتىناستاردى تەرەڭدەتۋ جانە كەڭەيتۋ تۋرالى شارتتا ىنتىماقتاستىقتىڭ جاڭا ينستيتۋتسيونالدىق نەگىزدەرى ايقىن كورسەتىلگەن.

سۋرەتتى تۇسىرگەن ج. جۇمابەكوۆ، ت.تانىباەۆ.

– بۇل اۋقىمدى قۇجات پارلامەنتارالىق بايلانىستى نىعايتۋ ءۇشىن جاڭا مۇمكىندىكتەر بەرىپ وتىر. ءبىزدىڭ پارلامەنتتەرگە جوعارى دەڭگەيدە قول جەتكىزىلگەن ۋاعدالاستىقتاردىڭ ىسكە اسىرىلۋىن قاداعالاۋ فۋنكتسياسى جۇكتەلگەن. وسى رەتتە ەكى ەل ۇكىمەتى بەلسەندى جۇمىس ىستەپ جاتقانىن اتاپ وتكەن ءجون. ءوز كەزەگىندە ءبىزدىڭ پارلامەنتتەر ولاردى زاڭنامالىق تۇرعىدان قولداۋدى قامتاماسىز ەتۋدە، – دەدى ە.قوشانوۆ.

سونداي-اق ول قازاق-قىرعىز قارىم-قاتىناسىنىڭ بارلىق سالاسىن قامتيتىن 150-دەن استام قۇجاتتان تۇراتىن بەرىك شارتتىق-قۇقىقتىق بازاسى قالىپتاسقانىن ايتتى. ولاردىڭ ىشىندەگى ەڭ ماڭىزدىلارى – ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىم، «قاراسۋ» جانە «اق-تىلەك» اۆتوجول وتكىزۋ پۋنكتتەرى ماڭىندا يندۋستريالىق ساۋدا-لوگيستيكالىق كەشەندى قۇرۋ جانە ونىڭ قىزمەتىن رەتتەۋ تۋرالى كەلىسىم.

ءوز كەزەگىندە نۋرلانبەك تۋرگۋنبەك ۋلۋ ەكىجاقتى ماسەلەلەردى شەشۋدە پارلامەنتارالىق ىنتىماقتاستىق كەڭەسىنىڭ ءرولىن ەرەكشە اتاپ ءوتتى.

– بۇگىنگى پارلامەنتارالىق كەڭەستىڭ وتىرىسى جاي عانا جوسپارلى كەزدەسۋ ەمەس. بۇل – ەكى جاقىن مەملەكەتتىڭ اراسىنداعى اشىق ءارى سىندارلى ديالوگتىڭ جالعاسى. وسى تۇرعىدا پارلامەنتتىك ديالوگتىڭ ورنى ەرەكشە. پارلامەنتتەر حالىقتىڭ مۇددەسىن قورعايدى. دەمەك، پارلامەنتارالىق ىنتىماقتاستىق ارقىلى ءبىز ءوزارا تۇسىنىستىكتى قولداپ قانا قويماي، ونى تەرەڭدەتە الامىز. بىرلەسكەن ءىس-ارەكەتتەر ارقىلى ورتاق مۇددەلەردى حالىقارالىق الاڭداردا قورعاۋعا مۇمكىندىك جاسايمىز، – دەدى جوگوركۋ كەنەش توراعاسى.

سۋرەتتى تۇسىرگەن ج. جۇمابەكوۆ، ت.تانىباەۆ.

كەڭەس وتىرىسى بارىسىندا دەپۋتاتتار ساۋدا-ەكونوميكا جانە لوگيستيكا سالالارىنداعى ارىپتەستىكتى نىعايتۋ ماسەلەلەرىن ورتاعا سالدى. اتاپ ايتقاندا،  قازاقستان-قىرعىزستان شەكاراسىنداعى يندۋستريالىق ساۋدا-لوگيستيكالىق كەشەن قۇرىلىسىن ودان ءارى جۇزەگە اسىرۋ، شەكارالىق باقىلاۋ-وتكىزۋ پۋنكتتەرىنىڭ ينفراقۇرىلىمىن جاقسارتۋ جۇمىستارىن جانداندىرۋ، سونداي-اق الماتى-ىستىقكول اۆتوجولىن سالۋ جوباسى بار.

سونىمەن قاتار تاراپتار ەكىجاقتى فورماتتا جانە ورتالىق ازيا ەلدەرى ايەلدەرىنىڭ ديالوگى، تۇركپا جانە باسقا دا حالىقارالىق پارلامەنتتىك ۇيىمدار اياسىندا ىنتىماقتاستىقتى دامىتۋدىڭ ماڭىزدىلىعىن اتاپ ءوتتى.

وتىرىستا ينۆەستيتسيالىق، مادەني-گۋمانيتارلىق ىنتىماقتاستىق ماسەلەلەرى، تۋريزم، ەكولوگيا جانە كليماتتىڭ وزگەرۋى سالالارىنداعى جوبالار دا قاراستىرىلدى. ءماجىلىس سپيكەرى قىرعىزستاننىڭ مۇزدىقتاردى ساقتاۋ جانە حالىقارالىق تاۋ ديالوگىن بەلسەندى دامىتۋ جونىندەگى باستامالارىن قولدايتىنىن ايتىپ، حالىقارالىق ارالدى قۇتقارۋ قورى اياسىنداعى جۇمىستى ودان ءارى جالعاستىرۋعا شاقىردى.

سۋرەتتى تۇسىرگەن ج. جۇمابەكوۆ، ت.تانىباەۆ.

ساپار بارىسىندا جوگوركۋ كەنەش توراعاسى قازاقستان رەسپۋبليكاسى پرەزيدەنتىنىڭ تەلەراديوكەشەنىنىڭ قۇرامىنا كىرەتىن Jibek Joly رەسپۋبليكالىق تەلەارناسىندا بولدى. نۋرلانبەك تۋرگۋنبەك ۋلۋنا تەلەراديوكومپانيانىڭ نەگىزگى جۇمىس باعىتتارى مەن «Silk Way Central Asia» حالىقارالىق مەديا جوباسى تانىستىرىلدى. جوبانىڭ ماقساتى – ورتالىق ازيادا ءبىرتۇتاس اقپاراتتىق كەڭىستىك قالىپتاستىرۋ جانە جاھاندىق مەديا الاڭدا ايماق ەلدەرىنىڭ مۇددەلەرىن ىلگەرىلەتۋ. Silk Way تەلەارناسى التى تىلدە، سونىڭ ىشىندە قىرعىز تىلىندە حابار تاراتادى. حابار تاراتۋ اۋماعى 300 ميلليوننان استام الەۋەتتى اۋديتورياسى بار 120 ەلدى قامتيدى. الداعى ۋاقىتتا قىرعىزستان، وزبەكستان، تۇرىكمەنستان جانە تاجىكستاننىڭ ۇلتتىق تەلەكومپانيالارىمەن كونتەنت الماسۋ جانە ارىپتەستىك قارىم-قاتىناستى دامىتۋ جوسپارلانىپ وتىر.

ساپار  اياسىندا پارلامەنتتەر دەلەگاتسيالارى قاليبەك قۋانىشباەۆ اتىنداعى قازاق ۇلتتىق مۋزىكالىق-دراما تەاترىنا بارادى. قوناقتاردىڭ نازارىنا شىڭعىس ايتماتوۆتىڭ ايگىلى شىعارماسى بويىنشا قازاقستاننىڭ حالىق ءارتىسى تالعات تەمەنوۆ قويعان «قىزىل ورامالدى شىنارىم» دراماسى ۇسىنىلادى.

Abai.kz