تومەنگى پالاتا دەپۋتاتى كەنجەعۇل سەيىتجان 14 مامىردا وتكەن جالپى وتىرىستا 1 ماۋسىم – بالالاردى قورعاۋ كۇنىن مەملەكەتتىك مەرەكە جانە سايكەسىنشە، دەمالىس كۇنى ەتىپ بەلگىلەۋدى ۇسىندى.

ەڭبەك جانە حالىقتى الەۋمەتتىك قورعاۋ مينيسترلىگى ءماجىلىس دەپۋتاتى كەنجەعۇل سەيىتجاننىڭ بالالاردى قورعاۋ كۇنى تۋرالى ۇسىنىسىنا قاتىستى ءوز ۇستانىمىن ءبىلدىردى، دەپ حابارلايدى inbusiness.kz سايتى.

"بالالاردىڭ وزدەرى ءۇشىن 1 ماۋسىم دەمالىستىڭ باستالۋىمەن، دەمالۋعا، كوڭىل كوتەرۋگە جانە قىزىقتى نارسەلەرمەن اينالىسۋعا مۇمكىندىك بەرۋمەن بايلانىستى. ءداستۇر بويىنشا بۇل كۇنى اتا-انالار بالالارىن ويىن-ساۋىق ساياباقتارىنا، ويىن ورتالىقتارىنا سەرۋەندەتىپ، جالپى مەرەكەلىك كوڭىل-كۇي قالىپتاستىرادى", – دەدى مينيستر.

ونىڭ ايتۋىنشا، بۇل مەرەكە اتا-انالار مەن بالالارعا بىرگە ۋاقىت وتكىزۋگە، مادەني-تانىمدىق جانە قوعامدىق شارالارعا قاتىسۋعا مۇمكىندىك بەرەدى. بۇل، سۆەتلانا جاقىپوۆا اتاپ وتكەندەي، بالانىڭ پسيحوەموتسيونالدىق جاعدايىنا وڭ اسەر ەتەدى جانە ونىڭ وتباسىنىڭ جانىندا ءوزىن تولىق قاۋىپسىز سەزىنۋگە مۇمكىندىك بەرەدى.

"جوعارىدا ايتىلعانداردى نەگىزگە الا وتىرىپ، سونداي-اق ەلىمىزدە وتباسى جانە وتباسىلىق قۇندىلىقتار ينستيتۋتىن نىعايتۋ ماقساتىندا 1 ماۋسىمدى ۇلتتىق مەرەكە – بالالاردى قورعاۋ كۇنى رەتىندە بەلگىلەۋدى مۇمكىن دەپ سانايمىز", – دەپ قورىتىندىلادى ەڭبەك مينيسترلىگىنىڭ باسشىسى.

Abai.kz