اقتوبە وبلىسىندا «ايبىن-2025» اسكەري-پاتريوتتىق جيىنى باستالدى. ءبىر كۇن بۇرىن دالالىق لاگەر اۋماعىنا 50-دەن استام كوماندا، ونىڭ ىشىندە 5 شەتەلدىك كوماندا كەلدى. جيىنعا قاتىسۋشىلاردىڭ جالپى سانى 700-دەن استام ۇل مەن قىز.  

ءبىرىنشى كۇنى كوماندالار ءۇشىن «ايبىن دارىنى» زياتكەرلىك ويىنى، پنەۆماتيكالىق مىلتىقتان اتۋ، «Smart sarbaz» تەحنولوگيالىق بايقاۋى جانە كالاشنيكوۆ اۆتوماتىن تولىق بولشەكتەۋ جانە قۇراستىرۋ سەكىلدى ءتورت بايقاۋ قاراستىرىلعان.

– «ايبىن» حالىقارالىق اسكەري-پاتريوتتىق جيىنىنىڭ بارلىق كونكۋرستارى قاتىسۋشىلارعا قيىن ءارى قىزىقتى بولاتىنداي ەتىپ جاسالدى. كوماندالىق جارىستار جولداستىق سەزىمدى دامىتادى، ينتەللەكتۋالدى-ويلاۋعا جانە كۇردەلى ماسەلەلەردى شەشۋگە ءماجبۇر ەتەدى. سپورت – ەرىك-جىگەردى قاتايتۋعا كومەكتەسەدى. ءبىز، ۇيىمداستىرۋشى رەتىندە جارىس سوڭىندا قاتىسۋشىلار جاڭا داعدىلارعا، جاڭا بىلىمگە جانە، ارينە، جاڭا دوستارعا يە بولاتىنىنا سەنىمدىمىز، - دەپ اتاپ ءوتتى «جاس سارباز» اسكەري-پاتريوتتىق قوزعالىسىنىڭ توراعاسى مايور مەيىربەك مەڭدىعاليەۆ.

«ايبىن دارىنى» كۆيز-ويىنى جاڭا جاستار ءحوببيى فورماتىندا وتكىزىلەدى. بايقاۋعا لوگيكا، تاريحتى ءبىلۋ، مەديتسينا نەگىزدەرى جانە جالپى ەرۋديتسيا ماسەلەلەرى كىرەدى. قاتىسۋشىلار دۇرىس جانە جىلدام جاۋاپ بەرىپ، رەيتينگتىك ۇپايلار جيناۋى كەرەك.

پنەۆماتيكالىق مىلتىقتان اتۋعا 5 ادامنان تۇراتىن كوماندالار قاتىسادى. ماقسات – نىساناعا 10 مەتر قاشىقتىقتان ءدوپ تيۋ. ورىندار ۇپاي سانىنا قاراي بولىنەدى.

«Smart sarbaz» ونەرتاپقىشتىق-تەحنولوگيالىق بايقاۋىنا جيىنعا قاتىسۋشىلار جاساعان روبوتوتەحنيكا سالاسىنداعى ازىرلەمەلەر قاتىسادى. بۇل جاۋىنگەرلىك جاعدايلاردا ادامدى الماستىراتىن روبوتتار مەن روبوتتىق قۇرىلعىلاردىڭ مودەلدەرى. بۇل بايقاۋ بالالاردى وزىنە دەگەن سەنىمدىلىكتى، سىني ويلاۋدى جانە كوماندادا جۇمىس ىستەۋ قابىلەتىن دامىتا وتىرىپ، ەكسپەريمەنت جاساۋعا بەيىمدەيدى.

«ايبىن-2025» حالىقارالىق اسكەري-پاتريوتتىق جاستار جيىنى اقتوبە وبلىسىندا 23-28 ماۋسىم ارالىعىندا وتەدى. ءىس-شارا ۇلى جەڭىستىڭ 80 جىلدىعى مەن كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالعان.

جيىن 11-ءشى رەت وتكىزىلىپ وتىر جانە وسى ۋاقىت ىشىندە وعان 10 مىڭنان استام بالالار مەن جاسوسپىرىمدەر قاتىستى.

Abai.kz