رەسەيدىڭ ءبىلىم ءمينيسترى سەرگەي كراۆتسوۆ دەگەن ادام مەملەكەتتىك دۋماداعى ۇكىمەت ساعاتىندا: «تمد-نىڭ بىرقاتار ەلدەرىنىڭ تاريح وقۋلىقتارىندا كەڭەستىك وتكەن تاريح تۋرالى بۇرمالانعان مالىمەتتەر بار»، - دەپ دابىل قاقتى.  

«تمد ەلدەرىنىڭ كەيبىرىندە تاريحي ماتەريالدى جاريالاۋدا بەلگىلى ءبىر قيىندىقتار مەن ماسەلەلەر بار. تاريح جانە وبەكتيۆتىلىك پرينتسيپتەرىنە سايكەسسىزدىكتەر بار. بۇل ەڭ الدىمەن ءبىزدىڭ ورتاق وتكەنىمىزگە قاتىستى»، - دەدى ول.

كراۆتسوۆتىڭ پىكىرىنشە، تمد ەلدەرىندە كەڭەس وداعىنىڭ قۇرامىندا بولعان كەزەڭنىڭ سيپاتتاماسىنا قاتىستى تەرىس پىكىرلەر قالىپتاسقان. ول بويىنشا رەسەي قازىرگى ۋاقىتتا تمد ەلدەرىمەن بەلسەندى جۇمىس جۇرگىزىپ جاتىر-مىس.

«ورتاق تاريحي وتكەنىمىزگە قاتىستى بۇرمالاۋشىلىقتاردى بولدىرماۋ ءۇشىن اتالعان ەلدەردىڭ قۇزىرلى مينيسترلىكتەرىمەن ءتيىستى جۇمىستار جۇرگىزىلۋدە. ءبىز بىرلەسىپ ءبىرتۇتاس ءبىلىم بەرۋ، مادەني جانە رۋحاني كەڭىستىكتى، سونىمەن بىرگە ءبىر-ءبىرىمىزدى تۇسىنەتىن تاتۋ كورشىلىككە باعىتتالعان ەۋرازيالىق كونتينەنتتىڭ بولاشاعىن قۇرۋدامىز»، - دەيدى كراۆتسوۆ.

بۇعان دەيىن رەسەي عىلىم اكادەمياسىنىڭ قوعامدىق عىلىمدار جونىندەگى عىلىمي اقپارات ينستيتۋتىنىڭ (ينيون رعا) عالىمدارى بۇرىنعى كسرو ەلدەرى مەن جانە تاياۋ شىعىس ەلدەرىنەن 10 تاريح وقۋلىعىن ساراپتاپ: «بۇل وقۋلىقتاردا رەسەي نەگىزىنەن وتارشىل مەملەكەت جانە ءوز مۇددەسىن كوزدەيتىن اگرەسسور رەتىندە كورسەتىلگەن»، - دەپ دابىل قاققان.

رەسەي پرەزيدەنتى ءپۋتيننىڭ ريتوريكاسى بارعان سايىن اگرەسسيۆتى بولىپ بارادى. ول ۋكراينانى عانا ەمەس، بۇرىنعى كسرو قۇرامىنداعى بارلىق تاۋەلسىز رەسپۋبليكالارعا قوقان-لوقى جاساۋعا كوشكەنى دە جاسىرىن ەمەس.

كرەمل باسشىسى رەسەيلىك تاريح وقۋلىقتارىنىڭ اۆتورلارىمەن كەزدەسۋىندە دە الاڭداتارلىق مالىمدەمە جاسادى.

وعان دەيىن، پۋتين اگرەسسيۆتى ساياساتتى اقتاۋ ءۇشىن تاعى دا جالعان تاريحي تەزيستەردى قولداندى. ول پوستكەڭەستىك كەڭىستىكتە ەگەمەندى مەملەكەتتەردىڭ ءومىر ءسۇرۋ فاكتىسىن جوققا شىعارا سويلەگەن.

پۋتين ۋكرايناعا قاراتا: «ەشقاشان بولماعان تاۋەلسىز مەملەكەتتەردى قۇرۋ يدەياسى» لەنيندىكى بولعان»، - دەپ سويلەگەن. وسىلايشا، پۋتين ۋكراينانى جانە كسرو-نىڭ باسقا رەسپۋبليكالارىن تولىققاندى ەلدەر رەتىندە قابىلدامايتىنىن اشىق ايتتى.

بۇل ءوڭىر ءۇشىن الاڭداتارلىق بەلگى. ءپۋتيننىڭ مالىمدەمەسى جاي ءسوز ەمەس، كرەمل كۇشپەن جۇزەگە اسىرۋعا دايىن جۇيەلى ساياساتتىڭ ءبىر بولىگى.

سونىمەن، پۋتين مەن كراۆتسوۆ رەسەيمەن كورشىلەس تمد مەملەكەتتەرىنىڭ تاۋەلسىزدىگىنە اشىق كۇمان كەلتىرىپ وتىر.

كەرىمسال جۇباتقانوۆ،

تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz